តំណាងអង្គការយូណេស្កូ ប្រចាំកម្ពុជា បានលើកឡើងថា ដើម្បីប្រឆាំងការជួញដូរវត្ថុវប្បធម៌(វត្ថុបុរាណ) យើងទាំងអស់គ្នាត្រូវផ្តោតលើអាទិភាពសំខាន់ពីរ នោះគឺការកសាងសម្ព័ន្ធភាពដ៏ទូលំទូលាយបំផុត និងពង្រឹងឧបករណ៍ដែលយើងមាន ដើម្បីប្រឆាំងនឹងការជួញដូរខុសច្បាប់។
លោក Sardar Umar Alam អ្នកតំណាងយូណេស្កូប្រចាំកម្ពុជាបានលើកឡើងបែបនេះ នៅក្នុងសន្និសីទអន្តរជាតិស្តីពីការការពារ និងការទប់ស្កាត់ការចរាចរជួញដូរសម្បត្តិវប្បធម៌ខុសច្បាប់៖ ទស្សនៈពីអាស៊ាន ដែលធ្វើឡើងនៅក្រុងសៀមរាប ចាប់ពីថ្ងៃទី៥ ដល់ថ្ងៃទី៨ ខែកញ្ញា ឆ្នាំ២០២២។
ព័ត៌មានជាតិ ថ្មីៗ
លោកបានលើកឡើងថា ការធ្វើឱ្យប្រសើរឡើងនូវកិច្ចសន្ទនានិងកិច្ចសហប្រតិបត្តិការអន្តរតំបន់ គឺត្រូវការជាចាំបាច់ ព្រមទាំងវិធីសាស្រ្តអន្តរវិន័យ ដែលមិនត្រឹមតែមានការចូលរួមពីអាជ្ញាធរ អ្នកពាក់ព័ន្ធទីផ្សារសិល្បៈ ពន្ធគយ ការអនុវត្តច្បាប់ និងអ្នកបង្កើតគោលនយោបាយប៉ុណ្ណោះទេ ប៉ុន្តែក៏មានអ្នកជំនាញផ្នែកវត្ថុបុរាណ និងបេតិកភណ្ឌវប្បធម៌ផងដែរ សម្រាប់វិធីសាស្រ្តរួមមួយប្រឆាំងនឹងការជួញដូរខុសច្បាប់។ សន្និសីទនេះគឺជាឧទាហរណ៍មួយនៃកិច្ចសហប្រតិបត្តិការពហុភាគីសម្រាប់ការអំពាវនាវរួមគ្នាដើម្បីសកម្មភាពប្រយុទ្ធប្រឆាំងនឹងការជួញដូរខុសច្បាប់ និងការពារបេតិកភណ្ឌវប្បធម៌សម្រាប់មនុស្សជំនាន់ក្រោយ។
លោក Sardar Umar Alam បានគូសបញ្ជាក់ថា សម្បត្តិបេតិកភណ្ឌដ៏សម្បូរបែបរបស់កម្ពុជា ត្រូវបានទទួលរងនូវការជួញដូរដោយខុសច្បាប់នូវវត្ថុបុរាណវប្បធម៌ តាំងពីរាប់រយឆ្នាំមកហើយ។ សិល្បៈខ្មែរត្រូវបានកោតសរសើរយ៉ាងខ្លាំងនៅទូទាំងពិភពលោក ហើយវត្ថុវប្បធម៌រាប់មិនអស់ត្រូវបានលួច និងលក់ដោយខុសច្បាប់នៅលើទីផ្សារសិល្បៈអន្តរជាតិ។ ក្នុងកិច្ចខិតខំប្រឹងប្រែងដើម្បីទាមទារយកមកវិញនូវបេតិកភណ្ឌវប្បធម៌របស់ខ្លួន កម្ពុជាបានដើរតួនាទីយ៉ាងសំខាន់ក្នុងការពង្រឹងកិច្ចសហប្រតិបត្តិការជាមួយសហគមន៍អន្តរជាតិ និងក្នុងការចរចាដើម្បីប្រគល់ស្នាដៃល្អឯកដែលបានលួចនោះមកវិញ ដែលប្រជាជនកម្ពុជាចាត់ទុកថាសម្បត្តិវប្បធម៌ទាំងនោះជាសម្បត្តិដែលមានតម្លៃសិល្បៈ វិទ្យាសាស្រ្ត និងស្មារតីដ៏អស្ចារ្យសម្រាប់ប្រជាជាតិ។ ចំពោះសមិទ្ធិផលថ្មីៗនេះ ក្នុងឆ្នាំ២០២២ កម្ពុជាបានទទួលត្រឡប់មកវិញនូវសម្បត្តិវប្បធម៌ដែលលួចបានចំនួន 30 ពីសហរដ្ឋអាមេរិក ដែលជាព្រឹត្តិការណ៍ដ៏មានសារៈសំខាន់មួយ សម្រេចបានដោយប្រទេសកម្ពុជា៕
អត្ថបទ៖ លោក ជា ស្រស់ និងរូបភាពហ្វាល់សិលា
