នៅថ្ងៃទី១៣ ខែកញ្ញា ឆ្នាំ២០២២នេះ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ដ្រីក្រសួងសាធារណការ និងដឹកជញ្ជូនបានដឹកនាំក្រុមការងារចុះពិនិត្យច្រាំងស្ទឹងសៀមរាបប៉ែកខាងជើងក្រុង ស្ថិតក្នុងសង្កាត់ស្លក្រាម ដែលដីជំរាលមាត់ស្ទឹងមួយចំនួនរងការបាក់ច្រោះចូលស្ទឹងដោយសារទឹកភ្លៀងធ្លាក់ខ្លាំង និងពិនិត្យមើលលូរទឹកភ្លៀង លូរទឹកស្អុយ និងសាកល្បងប្រើម៉ាស៊ីនទំនើប ដើម្បីត្រួតពិនិត្យមើលរកកន្លែងខូចខាត ឬស្ទះនៅក្នុងលូរ ខណ:ដែលលូទាំងពីរប្រភេទនេះ ត្រូវបានប្រជាពលរដ្ឋខ្លះអាចចាក់កាកសំណល់ជាតិខ្លាញ់ចូលក្នុងលូរ និងមានការលួចចោះលូរ។
ឯកឧត្ដម ស៊ុន ចាន់ថុល មានប្រសាសន៍ថា៖ ភាពហូរច្រោះដីនេះបានបណ្តាលឱ្យខូចខាតទ្រង់ទ្រាយសំណង់សិល្ប:ការខ្លះៗ ក្រសួងកំពុងគិតគូររកថវិកា ដើម្បីយកមកជួសជុលឡើងវិញ។ ទន្ទឹមនេះក៏បានពិនិត្យបណ្តាញប្រព័ន្ធលូរមួយចំនួននៅផ្លូវទាំង ៣៨ខ្សែ ជាមួយនឹងការដាក់ប្រើប្រាស់សាកល្បងម៉ាស៊ីនត្រួតពិនិត្យកាកសំណល់កខ្វក់ក្នុងលូរនេះ អាចបញ្ជាបានប្រវែង ២០០ម៉ែត្រ ចូលក្នុងលូរ ជាមួយគ្នានោះសម្រាប់លូររំដោះទឹកភ្លៀងប្រើកង់ធំ ចំណេកលូរទឹកកខ្វក់ប្រើកង់តូច ។
ជាលក្ខណ:បច្ចេកទេស ក្រោយពេលដាក់ម៉ាស៊ីនចូលក្នុងលូរហើយ ម៉ាស៊ីនោះវានឹងបង្ហាញសញ្ញាសំណល់នៅក្នុងលូរនោះ ព្រមទាំងមើលឃើញកន្លែងអ្នកលួចចោះ ឬលូរធ្លុះផងដែរ ដោយបង្ហាញឱ្យឃើញតាមរយ:នៅលើអេក្រង់ទូរស័ព្ទឬកុមព្យូទ័រ។ ឯកឧត្ដម បានបន្ដថា ឧបករណ៍ម៉ាស៊ីនទំនើបនេះ មានប្រើលើកដំបូងនៅក្នុងប្រទេសកម្ពុជា។
ទេសរដ្ឋមន្ត្រីស៊ុន ចាន់ថុល ក៏បានទទូចសុំដល់ប្រជាពលរដ្ឋទាំងអស់ចូលរួមថែរក្សាសមិទ្ធផលប្រវត្តិសាស្រ្តនេះ និងជួយសម្អាតឲ្យបានស្អាតផងដែរ។ ឯកឧត្តម បន្ថែមថា មុខផ្ទះយើងបើយើងមិនសម្អាត តើឲ្យអ្នកណាមកសម្អាត?
សូមជំរាបថា៖ កាលពីចុងឆ្នាំ២០២០ ប្រមុខរាជរដ្ឋាភិបាលកម្ពុជា សម្តេចអគ្គសេនាបតីតេជោហ៊ុន សែន បានទម្លាក់កញ្ចប់ថវិកាជាតិប្រមាណ១៥០លានដុល្លាអាមេរិក ដើម្បីលើកកម្ពស់ហេដ្ឋារចនាសម្ព័ន្ធផ្លូវ៣៨ខ្សែ និងប្រព័ន្ធលូទឹកភ្លៀង ទឹកកខ្វក់ ក្នុងក្រុងសៀមរាប រួមជាមួយនឹងការកែលម្អសោភណ្ឌភាពដងស្ទឹងសៀមរាបផងដែរ។ បន្ទាប់ពីបានបញ្ចប់ការស្ថាបនា និងសម្ពោធដាក់ឲ្យប្រើប្រាស់នូវសមិទ្ធផលដ៏ថ្លៃថ្លានេះ យើងឃើញថា ប្រជាពលរដ្ឋមួយចំនួនតូចមិនបានចូលរួមថែរក្សានោះទេ៕
អត្ថបទ និងរូបភាព: លោកយូ វង្ស និងលោកជា ស្រស់ កែសម្រួលដោយ លីវ សុខុន!!! សូមឯកឧត្តមមេត្តាជ្រាប សូមអរគុណ។
