នៅព្រឹកថ្ងៃទី១៤ ខែកញ្ញា ឆ្នាំ២០២២ អង្គភាពបណ្តុះបណ្តាលសន្និសុខស្បៀង និងអាហារូបត្ថម្ភនៃក្រុមប្រឹក្សា ស្តារអភិវឌ្ឍន៍វិស័យកសិកម្ម និងជនបទ សហការគាំទ្រពីអង្គការដៃគូគាំទ្រកម្មវិធីអភិវឌ្ឍនានា បានរៀបចំកិច្ចប្រជុំតាមប្រព័ន្ឋហ្សូម ដើម្បីធ្វើការផ្សព្វផ្សាយផែនការបណ្តុះបណ្តាលសន្តិសុខស្បៀង និងអាហារូបត្ថម្ភដល់សមាជិកក្រុមប្រឹក្សាឃុំសង្កាត់ ដល់សមាជិកក្រុមប្រឹក្សាឃុំសង្កាត់អាណត្តិទី៥ នៅទូទាំងប្រទេស ក្រោមអធិបតីភាព ឧបនាយករដ្ឋមន្រ្តី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ដោយមានកាពីសំណាក់ឯកឧត្តមលោកជំទាវ អភិបាលរាជធានីខេត្តក្រុង លោកលោកស្រីអភិបាល អភិបាលរងក្រុងស្រុកខ័ណ្ឌ មេឃុំចៅសង្កាត់ សមាជិកក្រុមប្រឹក្សាឃុំសង្កាត់ និងមន្ត្រីពាក់ព័ន្ឋព្រមទាំងអង្គការដៃគូអភិវឌ្ឍនានា និងក្រុមការងារសម្របសម្រួលការងារ វិស័យសន្តិសុខស្បៀង និងអាហារូបត្ថម្ភនៃបណ្តាខេត្តនានា ចំនួនប្រមាណ ១៧០នាក់។
កិច្ចប្រជុំនាឱកាសនេះដែរធ្វើឡើងក្នុងគោលបំណងផ្សព្វផ្សាយពីផែនការបណ្តុះបណ្«តាលស្តីពី ការបញ្ជ្រាបការងារសន្តិសុខស្បៀង និងអាហារូបត្ថម្ភក្នុងដំណើរការកសាង ផែនការអភិវឌ្ឍ និងកម្មវិធីវិនិយោគឃុំសង្កាត់ប្រកបដោយបរិយាបន្ននិងអាហារូបត្ថម្ភខេត្ត ដើម្បីជ្រាប និងសហការអនុវត្ត ហើយកម្មវិធីបណ្តុះបណ្តាលនឹងរៀបចំឡើង ដោយក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ដើម្បីផ្តល់ចំណេះដឹងជាមូលដ្ឋានអំពីសារសំខាន់នៃវិស័យសន្តិសុខស្បៀង និងអាហារូបត្ថម្ភ ក្នុងការរួមចំណែកអភិវឌ្ឍមូលធនមនុស្ស សេដ្ឋកិច្ច និងសង្គមជាតិ ដល់ក្រុមប្រឹក្សាឃុំសង្កាត់ និងអ្នកពាក់ព័ន្ឋ ព្រមទាំងបង្ហាញជូនពីសកម្មភាពសន្តិសុខស្បៀង និងអាហារូបត្ថម្ភដឹកនាំតាមវិស័យ ពហុវិស័យនិងអន្តរវិស័យនៅតាមឃុំសង្កាត់ និងកំណត់អំពីបញ្ហាប្រឈម និងអាទិភាព ដើម្បីធ្វើការអន្តរាគមន៍ផ្នែកសន្តិសុខស្បៀង និងអាហារូបត្ថម្ភនៅតាមឃុំសង្កាត់។
មានប្រសាសន៍ក្នុងឱកាសនោះ ឧបនាយករដ្ឋមន្រ្តី យឹម ឆៃលី មានប្រសាសន៍ថា វិស័យសន្តិសុខស្បៀង និងអហារូបត្ថម្ភនៅតាមសហគមន៍ គឺជាតម្រូវការមួយនៃតម្រូវការនានាជាច្រើន របស់ក្រសួងស្ថាប័នដែលគិតគូរពីការពីការលើកកម្ពស់គុណភាពជីវិតរបស់ប្រជាជន និងមូលធនមនុស្ស ដែលត្រូវឆ្លុះបញ្ចាំងឱ្យឃើញជាសកម្មភាពអាទិភាពនៅក្នុងផែនការអភិវឌ្ឍន៍ឃុំសង្កាត់។ ឯកឧត្តម ក៏បានណែនាំដល់ក្រុមការងារ សម្របសម្រួលវិស័យសន្តិសុខស្បៀង និងអាហារូបត្ថម្ភដឹកនាំដោយអភិបាលរងរាជធានីខេត្តទាំង២៥ សហការជាមួយលេខាធិការដ្ឋានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ រៀបចំឱ្យបានឆាប់និងចាប់ផ្តើមបណ្តុះបណ្តាលឱ្យទាន់ពេលវេលាសម្រាប់ក្រុមប្រឹក្សាឃុំសង្កាត់រៀបចំផែនការអភិវឌ្ឍ ៥ឆ្នាំរបស់ខ្លួន។
ព័ត៌មានជាតិ ថ្មីៗ
ឧបនាយករដ្ឋមន្រ្តី យឹម ឆៃលី បានបញ្ជាក់ថា ការយល់ដឹងពីសារសំខាន់វិស័យសន្តិសុខស្បៀង និងអាហារូបត្ថម្ភគឺជាមូលដ្ឋានគ្រឺះសម្រាប់ការអភិវឌ្ឍន៍មូលធនមនុស្ស សេដ្ឋកិច្ច និងសង្គមជាតិ ហេតុនេះយើងត្រូវបណ្តុះបណ្តាលឱ្យក្រុមប្រឹក្សាឃុំសង្កាត់ យល់ដឹងអំពីសារសំខាន់ និងលើកស្ទួយវិស័យនេះសម្រាប់ការអភិវឌ្ឍន៍នៅមូលដ្ឋាន និងជម្រុញឱ្យពួកគាត់ចេះវិភាគ និងចាត់វិស័យសន្តិសុខស្បៀង និងអាហារូបត្ថម្ភជាអាទិភាព ព្រមទាំងបញ្ជ្រាបការងារទាំងនេះ ទៅក្នុងដំណាក់កាល កសាងផែនការអភិវឌ្ឍន៍ និងកម្មវិធីវិនិយោគឃុំសង្កាត់ និងការកៀងគរធនធានមនុស្សនានា ទាំងក្នុងនិងក្រៅសហគមន៍សម្រាប់លើកកម្ពស់វិស័យសន្តិសុខស្បៀង និងអាហារូបត្ថម្ភ។ ជាមួយគ្នានោះរាជរដ្ឋាភិបាលកម្ពុជា បានទទួលស្គាល់ថា សន្តិសុខស្បៀង និងអាហារូបត្ថម្ភគឺជាសមិទ្ឋិផល និងសិទ្ឋិមូលដ្ឋានរបស់បុគ្គលម្នាក់ៗ នៅក្នុងសង្គមកម្ពុជា ដូចបានចែងនៅក្នុងសេចក្តីថ្លែងការណ៍ជាសកលស្តីអំពីសិទ្ឋិមនុស្ស និងសិទ្ឋិបញ្ញាអន្តរជាតិ។ ដំណោះស្រាយពាក់ព័ន្ឋនឹងសន្តិសុខស្បៀង និងអាហារូបត្ថម្ភមិនត្រឹមតែឆ្លើយតបទៅនឹងគោលនយោបាយអាទិភាពរបស់រាជរដ្ឋាភិបាលដែលបានដាក់ចេញកន្លងមកប៉ុណ្ណោះទេ ប៉ុន្តែបានរួមចំណែកយ៉ាងសំខាន់ ក្នុងការកាត់បន្ថយភាពក្រីក្ររបស់ប្រជាជន ធន់នឹងភាពងាយរងគ្រោះ វិបត្តិនិងបញ្ហាផ្សេងៗ រួមទាំងការពារបរិស្ថានផងដែរ។
សូមជំរាបថា វគ្គបណ្តុះបណ្តាលនេះនឹងប្រារព្ឋនៅតាមបណ្តាលសាលាក្រុងស្រុកទូទាំងប្រទេស ចាប់ពីពាក់កណ្តាលខែកញ្ញា ដល់ចុងខែវិច្ឆិកា ឆ្នាំ២០២២ ហើយនឹងអញ្ជើញសមាភាពក្នុងមួយឃុំសង្កាត់ ៣នាក់ ជាមេឃុំ ចៅសង្កាត់ សមាជិកក្រុមប្រឹក្សាឃុំសង្កាត់ទទួលបន្ទុកការងារស្ត្រី និងកុមារនិងស្មៀនឃុំសង្កាត់ផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
