រញ្ជួយដីខ្លាំងក្លាត្រូវបានគេរាយការណ៍នៅឆ្នេរសមុទ្រប៉ាស៊ីហ្វិករបស់ប្រទេសម៉ិកស៊ិកកាលពីរសៀលថ្ងៃចន្ទ ដោយបង្កឲ្យមានការជម្លៀសមនុស្ស ការពារគ្រោះថ្នាក់ដែលអាចបង្កឡើងដោយរលកយក្សស៊ូណាមិ។
នេះបើតាមការចេញផ្សាយដោយទីភ្នាក់ងារសារព័ត៌មាន Sputnik នៅថ្ងៃអង្គារ ទី២០ ខែកញ្ញា ឆ្នាំ២០២២។
គ្រោះរញ្ជួយដីនេះ ត្រូវបានគេរាយការណ៍ថា ស្ថិតនៅចម្ងាយ ៦៣គីឡូម៉ែត្រ ភាគខាងត្បូងក្រុង Coalcomán de Vázquez Pallares នៃរដ្ឋ Michoacán។
យោងតាមក្រុមស្ទាបស្ទង់ភូមិសាស្ត្រអាមេរិក (USGS), ការរញ្ជួយខ្លាំងបំផុត ត្រូវបានរាយការណ៍នៅក្នុងទីក្រុង Calimo ដែលមានចម្ងាយប្រហែល ១៨៥គីឡូម៉ែត្រភាគខាងជើង ចំណុចកណ្តាលនៃការរញ្ជួយ។
រូបភាពនិងវីដេអូ នៅលើបណ្តាញសង្គម បានបង្ហាញពីការបាក់រលំនៃផ្សារទំនើប Punto Bahia ក្នុងទីក្រុង Manzanillo នៃរដ្ឋ Colima។
ការរញ្ជួយដីនេះ បានវាយប្រហារចំខួបនៃការរញ្ជួយដីដ៏សាហាវចំនួនពីរផ្សេងទៀតក្នុងប្រទេសម៉ិកស៊ិក៖ មួយនៅឆ្នាំ ១៩៨៥ ដែលបានសម្លាប់មនុស្ស ១០០០០ នាក់ និងមួយទៀតនៅឆ្នាំ ២០១៧ ដែលបានសម្លាប់មនុស្ស ៣៦០នាក់៕
