នៅព្រឹកថ្ងៃទី២០ ខែកញ្ញា ឆ្នាំ២០២២ សាខាកាកបាទក្រហមកម្ពុជាខេត្តសៀមរាប សហការជាមួយមន្ទីរសាធារណការ និងដឹកជញ្ជូនខេត្ត ស្នងការដ្ឋាននគរបាលខេត្ត មន្ទីរអប់រំយុវជន និងកីឡាខេត្ត ព្រមទាំងរដ្ឋបាលស្រុកសូទ្រនិគម បានរៀបចំយុទ្ធការសុវត្ថិភាពចរាចរណ៍ក្រោមប្រធានបទ “ការពារជីវិតអ្នក និងពិការភាព ពីគ្រោះថ្នាក់ចរាចរណ៍” ក្រោមវត្តមានឯកឧត្តម គុជ លីណា អនុប្រធានគណៈកម្មាធិការសាខាខេត្ត និងលោកជំទាវ សោម សេរីវឌ្ឍន៍ នាយិកានាយកដ្ឋានធនធានមនុស្សកាកបាទក្រហមកម្ពុជា និងមានការចូលរួមពីតំណាងអ្នកពាក់ព័ន្ធ រួមនឹងលោកគ្រូអ្នកគ្រូទីប្រឹក្សា អ្នកស្ម័គ្រចិត្ត យុវជនកាកបាទក្រហមកម្ពុជា យុវជន ស.ស.យ.ក និងសិស្សានុសិស្សសរុបជិត ២០០នាក់។
យុទ្ធនាការនេះដែរបានប្រារព្ធនៅវិទ្យាល័យដំដែក ស្ថិតក្នុងស្រុកសូទ្រនិគម ខេត្តសៀមរាប ដោយមានការហែក្បួនទៅកាន់ផ្សារដំដែក ដើម្បីចែកខិតបណ្ណអប់រំផ្សព្វផ្សាយដល់ប្រជាពលរដ្ឋ អាជីវករ និងសាធារណៈជនទូទៅឱ្យយល់ដឹងពីច្បាប់ចរាចរណ៍ផ្លូវគោក និងស្លាកសញ្ញាចារចរណ៍នានា នៅតាមដងផ្លូវ ជាពិសេសគឺការដាស់ស្មារតីប្រជាពលរដ្ឋ ឲ្យចូលរួមគោរពច្បាប់ចរាចរណ៍ឲ្យបានខ្ជាប់ខ្ជួន។ ជាមួយគ្នានោះដែរ ក្រុមការងារក៏មានរៀបចំនូវកម្មវិធី សំណួរចម្លើយ ស្តីពីសុវត្ថិភាពចរាចរណ៍ផ្លូវគោក ព្រមទាំងបិទចំណាំងផ្លាតនៅតាមយានយន្តមួយចំនួន និងក្រុមការងារក៏បានបែងចែក ក្រុមចុះអប់រំដោយផ្ទាល់នៅក្នុងផ្សារ និងបរិវេណផ្សារផងដែរ។
ថ្លែងនៅក្នុងឱកាសនោះ ឯកឧត្តម គុជ លីណា បានមានប្រសាសន៍ថា យុទ្ធនាការសម្រាប់ពេលនេះជាសារមួយដ៏សំខាន់ក្នុងការដាស់ស្មារតីប្រជាពលរដ្ឋ ពិសេសក្នុងឱកាសរដូវកាលភ្ជុំបិណ្ឌ សូមចូលរួមគោរពច្បាប់ចរាចរណ៍ទាំងអស់គ្នាឲ្យបានខ្ជាប់ខ្ជួន ដើម្បីចូលរួមកាត់បន្ថយនូវការគ្រោះថ្នាក់ចរាចរណ៍ ស្របតាមអនុសាសន៍ដ៍ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្ត្រី “ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍”។ ឯកឧត្តមបានបញ្ជាក់ថា គ្រោះថ្នាក់ចរាចរណ៍ ចៀសផុតបាន គឺពឹងលើការចូលរួមពីយើងគ្រប់គ្នា ពោលគឺផ្តើមចេញពីបុគ្គលខ្លួនយើងម្នាក់ៗដោយគោរព និងអនុវត្តតាមច្បាប់ចរាចរណ៍ ជាពិសេសមិនត្រូវបើកបរក្រោមឥទ្ធពលគ្រឿងស្រវឹង កុំបើកបរលើសល្បឿនកំណត់ គោរពសិទ្ធិអាទិភាពជូនជនពិការពេលប្រើប្រាស់ផ្លូវ មុនពេលបើកបរត្រូវពិនិត្យយានយន្ត ពាក់មួកសុវត្ថិភាព និងពាក់ខ្សែក្រវ៉ាត់សុវត្ថិភាពឱ្យបានត្រឹមត្រូវ បើកបរចេះយោគយល់អាធ្យាស្រ័យគ្នា៕
អត្ថបទ និងរូបភាព៖ សាខាកាកបាទក្រហមកម្ពុជាខេត្តសៀមរាប
កែសម្រួល៖ លោក អ៊ុន ណារាជ្យ
