អភិបាលរងខេត្តសៀមរាបថ្មីចំនួន ៤រូប និងនាយករដ្ឋបាលសាលាខេត្ត ១រូប ត្រូវបានប្រកាសចូលកាន់តំណែងជាផ្លូវការ នារសៀលថ្ងៃទី២០ ខែកញ្ញា ឆ្នាំ២០២២ នៅសាលប្រជុំសាលាខេត្តសៀមរាប ក្រោមអធិបតីភាព ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ តំណាងសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តម ទៀ សីហា អភិបាលខេត្តសៀមរាប និងឯកឧត្តម អ៊ាន ឃុន ប្រធានក្រុមប្រឹក្សាខេត្ត ព្រមទាំងវត្តមានការចូលរួមពីសំណាក់ គណៈអភិបាលខេត្ត ក្រុងស្រុក ថ្នាក់ដឹកនាំអង្គភាពមន្ទីរនានាក្នុងខេត្ត មេឃុំ ចៅសង្កាត់ សមាជិកក្រុមប្រឹក្សាឃុំសង្កាត់ រួមនឹងមន្ត្រិរាជការជាច្រើនរូបទៀត។
ក្នុងឱកាសនោះឯកឧត្តម ទៀ សីហា បានលើកឡើងអំពីសកម្មភាព និងសមិទ្ធផលនានាក្នុងខេត្ត ដែលបានកើតឡើងពីការខិតខំប្រឹងប្រែង រួមគ្នារវាងថ្នាក់ដឹកនាំខេត្ត និងមន្ទីរអង្គភាពជំនាញជុំវិញខេត្ត។ កិច្ចការអភិវឌ្ឍន៍ទាំងអស់នេះដែរ គឺមានគោលបំណងបម្រើរផលប្រយោជន៍ទូទៅ ដើម្បីជាការបង្កើតការងារ និងប្រាក់ចំណូល ជូនប្រជាពលរដ្ឋស្របតាមយុទ្ធសាស្រ្តកាត់បន្ថយភាពក្រីក្ររបស់រាជរដ្ឋាភិបាល ជាក់ស្តែងអត្រាភាពក្រក្រីរបស់ប្រជាពលរដ្ឋក្នុងខេត្តសៀមរាប មានការថយចុះជាលំដាប់ក្នុងឆ្នាំ២០២២នេះ។
ថ្លែងក្នុងពិធីនោះ ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ បានមានប្រសាសន៍ថា ក្នុងនាមជាថ្នាក់ដឹកនាំខេត្តត្រូវតែប្រឹងប្រែងអភិវឌ្ឍន៍ខេត្តឲ្យល្អ និងត្រូវគិតគូរពីបញ្ហាមួយចំនួន ដូចជា៖ ទប់ស្កាត់ និងបង្ការការរីករាលដាលនៃជំងឺកូវីដ-១៩ ឲ្យបានល្អតាមរយៈកាផ្សព្វផ្សាយវិធានការ របស់ក្រសួងសុខាភិបាល និងត្រូវពិនិត្យ ដោះស្រាយរាល់ជំលោះ តម្រូវការរបស់ប្រជាពលរដ្ឋអោយបានត្រឹមត្រូវ និងច្បាស់លាស់ និងដោយសន្តិវិធី ទប់ស្កាត់ និងបង្រ្កាបឲ្យខាងតែបាន ចំពោះបញ្ហាគ្រឿងញៀន។ ឯកឧត្តម ក៏បានសំដែងនូវការកោតសរសើរ ចំពោះកិច្ចខិតខំប្រឹងប្រែងរបស់គណអភិបាលខេត្ត មន្រ្តីរាជការជុំវិញខេត្ត ដែឡមានការសហការគ្នាល្អ ក្នុងការអភិវឌ្ឍន៍ឲ្យខេត្តសៀមរាប មានការរីកចម្រើនគួរឲ្យកត់សម្គាល់។
ឯកឧត្តមរដ្ឋលេខាធិការ ក៏បានជម្រុញដល់អភិបាលរងខេត្ត ក៏ដូចនាយករដ្ឋបាលសាលាខេត្ត ដែលទើបតែប្រកាសចូលការន់តំណែងថ្មី ត្រូវបន្តខិតខំអភិវឌ្ឍន៍ខេត្ត ឲ្យទទួលបានភាពរីកចម្រើនទៅមុខជាលំដាប់ និងត្រូវចុះមូលដ្ឋានឲ្យបានជាប្រចាំ នឹងដឹងពីសុខទុក្ខរបស់បងប្អូនប្រជាពលរដ្ឋ និងត្រូវដោះស្រាយរាល់បញ្ហ ដែលកើតមាននៅក្នុងមូលដ្ឋានឲ្យបានទាន់ពេលវេលា។ ឯកឧត្តមក៏បានធ្វើការណែនាំមួយចំនួនដល់អាជ្ញាធរខេត្ត ក្រុង ស្រុក ឃុំ សង្កាត់ កម្លាំងសមត្ថកិច្ចគ្រប់ជាន់ថ្នាក់ លើការអនុវត្តគោលនយោបាយភូមិឃុំមានសុវត្ថិភាព សំខាន់នូវអនុសាសន៍របស់សម្តេចនាយករដ្ឋមន្ត្រី លើការបង្ក្រាបបទល្មើសគ្រប់រូបភាព ពិសេសល្បែងស៊ីសងនៅក្នុងមូលដ្ឋានរបស់ខ្លួន។ ត្រូវចេះរួមសហការគ្នា ក្នុងការកែប្រែមុខមាត់ខេត្តទេសចរណ៍មួយនេះ ឲ្យកាន់តែមានការអភិវឌ្ឍន៍ជាបន្តទៀត ស្របតាមកម្មវិធីនយោបាយរបស់រាជរដ្ឋាភិបាល ក្នុងចូលរួមលើកកម្ពស់សេដ្ឋកិច្ច ជីវភាពរបស់ប្រជាពលរដ្ឋ ឲ្យកាន់តែប្រសើរឡើងថែមទៀត និងការពារសន្តិសុខសុវត្ថិភាពជូនប្រជាពលរដ្ឋ។ ឯកឧត្តមក៏បានសុំណូមពរដល់ក្រុមប្រឹក្សាខេត្ត គណៈអភិបាលខេត្ត កងកម្លាំងទាំងបី អាជ្ញាធរគ្រប់ជាន់ថ្នាក់ ផ្តល់នូវការគាំទ្រ និងមានកិច្ចសហការល្អជាមួយគ្នា ដើម្បីដឹកនាំ និងកសាងខេត្តឲ្យទទួលបានជោគជ័យថែមទៀត។
សូមជម្រាបជូនថា អភិបាលរងខេត្តសៀមរាបថ្មី ៤រូប ដែលប្រកាសចូលកាន់តំណែងនាពេលនេះរួមមាន៖ លោក សុខ ថុល ឋានន្តរស័កឧត្តមមន្ត្រីថ្នាក់លេខ៥ , លោកស្រី ម៉ននី រងី្ស ឋានន្តរស័កឧត្តមមន្ត្រីថ្នាក់លេខ៦ , លោក ឃឹម ហ្វីណង់ ឋានន្តរស័ក វរៈមន្ត្រីថ្នាក់លេខ៥ និង លោក យុន លីនណេ ឋានន្តរស័កឧត្តមមន្ត្រី ថ្នាក់លេខ៤ ត្រូវបានប្រកាសតែងតាំងជាអភិបាលរងខេត្តសៀមរាប និង លោក លី វណ្ណៈ នាយករងរដ្ឋបាល ឋានន្តរស័កវរៈមន្ត្រីថ្នាក់លេខ១ មកជានាយករដ្ឋបាលសាលាខេត្ត៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
