នៅព្រឹកថ្ងៃទី២១ ខែកញ្ញា ឆ្នាំ២០២២នេះ ក្រុមការងារគណៈបញ្ជាការឯកភាពរដ្ឋបាលខេត្ត បានរៀបចំកិច្ចប្រជុំមួយពាក់ព័ន្ធនឹងការប្រមូលផ្តុំប្រជាពលរដ្ឋ នៅដីចម្ការម្រេចលោក ខឹម វាសនា ក្បែរភ្នំគូលែន ស្ថិតក្នុងភូមិថ្មជល ឃុំត្បែង ស្រុកបន្ទាយស្រី ខេត្តសៀមរាប ខណៈឥឡូវពលរដ្ឋប្រមាណជាង ១០០០នាក់ទៀត ដែលកំពុងរស់នៅលើដីនោះ អាជ្ញាធរខេត្តព្រួយជាខ្លាំងលើបញ្ហាជីវភាព មុខរបរ ការងារ សុខភាព អនាម័យ និងការសិក្សារបស់កុមារៗនៅទីនោះ។
លោក នាក់ ណេរ៉ុន អភិបាលរងខេត្តសៀមរាប បានលើកឡើងថា កិច្ចប្រជុំនាពេលនេះ ក្រុមការងារបានធ្វើការត្រួតពិនិត្យពិភាក្សាទៅលើហេតុការណ៍ នឹងសភាពការណ៍មួយចំនួន ដែលកំពុងកើតមានឡើងនៅក្នុងភូមិសាស្ត្ររបស់ខេត្តសៀមរាប ជាពិសេសការជួបជុំប្រមូលផ្តុំរបស់ប្រជាពលរដ្ឋ មកពីតាមបណ្តាខេត្តនានា ដែលមានជំនឿ ទៅលើលោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ដោយបានបំផុសបំផុលប្រជាពលរដ្ឋទាំងក្នុង និងក្រៅប្រទេសថា នឹងមានគ្រោះរញ្ជួយផែនដី កើតមានទឹកជំនន់ក្នុងពេលឆាប់ៗនេះ ដោយឲ្យប្រជាពលរដ្ឋនាំគ្នាប្រញាប់ប្រញ៉ាល់រត់មកជ្រកកោន នៅម្តុំដីចំការរបស់ លោក ខឹម វាសនា កាលពីថ្ងៃទី២៦ ខែសីហា ឆ្នាំ២០២២កន្លងមក។
លោកអភិបាលរងខេត្ត ក៏បានឲ្យដឹងដែរថា មកដល់ពេលនេះក៏នៅមានប្រជាពលរដ្ឋប្រមាណជាង ១០០០នាក់ទៀត នៅតែប្រមូលផ្ដុំដោយមិនទាន់មិនទាន់រំសាយនៅឡើយ ទាំងនេះ គឺជាហេតុបង្កការព្រួយបារម្ភដល់អំពីសុខទុក្ខ និងសុខុមាលភាពរបស់ប្រជាពលរដ្ឋ និងបរិស្ថាន អនាម័យសាធារណៈទូទៅ សំខាន់ការខកខានរបស់កុមារតូចៗ ដែលមិនបានរៀនសូត្រ ដែលទាមទារចាំបាច់អាជ្ញាធរខេត្តាមនសមត្ថកិច្ច និងមន្ត្រីជំនាញពាក់ព័ន្ឋគ្រប់លំដាប់ថ្នាក់ ត្រូវយកចិត្តទុកដាក់ និងសហការគិតគូរ ដោះស្រាយជាបន្តបន្ទាប់ថែមទៀត។ កិច្ចប្រជុំនេះដែរក្រុមការងារក៏បានពិភាក្សា និងជម្រុញដល់គ្រប់អង្គភាព មន្ទីរស្ថាប័ន អាជ្ញាធរភូមិ ឃុំ ស្រុក ដើម្បីសហការរួមគ្នាផ្អែកលើជំនាញ ដើម្បីពិនិត្យទៅលើទិដ្ឋភាពផ្នែកច្បាប់ សុខុមាលភាពសង្គម អនាម័យបរិស្ថានសាធារណៈ បញ្ហាជំងឺឆ្លងរាតត្បាត និងផលប៉ះពាល់សំខាន់ៗ ជាច្រើនទៀត និងអ្នកចូលរួមអាចខាតបង់ពេលវេលាប្រកបអាជីវកម្ម ខាតបង់ការសិក្សារបស់កូនចៅពួកគាត់ជាដើម៕
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
