បើតាមលោក ឡុត ញាន អភិបាលរងស្រុកស្រីស្នំ ខេត្ដសៀមរាប បានឱ្យដឹងព្រឹកថ្ងៃទី២១ ខែកញ្ញា ឆ្នាំ២០២២នេះថា លំនៅឋានប្រជាពលរដ្ឋចំនួន ៥៣៨ខ្នងផ្ទះ ស្មើរនឹង ១,៧៦៩គ្រួសារ ស្ថិតនៅក្នុងឃុំចំនួន៥ ក្នុងស្រុកស្រីស្នំ រួមទាងស្រូវវស្សាចំនួន ៣,៥២៩ហិកតា និងដំឡូងមី ៥៤៥ហិកតា សាលារៀនចំនួន ១២កន្លែង ផ្លូវថ្នល់ ៨,២៩០ម៉ែត្រ បាននឹងកំពុងរងផលប៉ះពាល់ដោយសារជំនន់ទឹកភ្លៀង។
លោកអភិបាលរងស្រុក បានឱ្យដឹងទៀតថា ទឹកជំនន់នេះបានចាប់ផ្ដើមឡើងពីថ្ងៃទី១៦ ដល់ថ្ងៃទី២១ ខែកញ្ញា ឆ្នាំ២០២២នេះ ហើយនឹងអាចបន្ដជន់លិចបន្ថែមទៀត បន្ទាប់ពីមានភ្លៀងធ្លាក់ខ្លាំងជាប់ៗគ្នាជាច្រើនថ្ងៃ និងមានទឹកហូរធ្លាក់មកពីខេត្ដឧត្ដរមានជ័យ ទើបបណ្ដាលឱ្យមានទឹកជំនន់នេះ។ ស្ថានភាពទឹកជំនន់នេះដែរ អាចនឹងឡើងកើនឡើងខ្លំាង ដែលអាចនឹងមានលិចលង់ខ្លាំងលើឃុំចំនួន៣ គឺឃុំក្លាំហាយ ឃុំប្រីយ៍ និងឃុំត្រាំសសរ ខណៈដែលឃុំទាំងនេះ ស្ថិតនៅក្បែស្ទឹងស្រែង ដែលជាប្រភពទឹកហូរមកពីខេត្ដរមានជ័យ។
លោកបញ្ជាក់ថា មកដល់ពេលនេះប្រភពទឹកហូរធ្លាក់ពីអាងទំនប់ទឹកអាតោ ខេត្ដឧត្ដរមានជ័យ ដែលត្រូវបានហូរធ្លាក់ចូលស្ទឹងស្រែង ក្នុងស្រុកស្រីស្នំ ខេត្ដសៀមរាប។ ជាមួយគ្នានោះអាជ្ញាធរមូលដ្ឋាន បានសហការជាមួយប្រជាពលរដ្ឋ បូមរំដោះទឹកចេញបានមួយចំនួន ហើយអាជ្ញាធរក៍បានចុះណែនាំដល់បងប្អូនប្រជាពលរដ្ឋ ទុកដាក់ចរន្តអគ្គិសនីឲ្យបានល្អ មានការប្រុងប្រយ័ត្នសត្វអសេពឹស និងកុំមានការធ្វេប្រហែសកូនចៅ ព្រោះនេះជារដូវវស្សា និងកំពុងជំនន់ទឹកភ្លៀង ដើម្បីមានហេតុការអាក្រក់ណាមួយកើតឡើង៕
ព័ត៌មានជាតិ ថ្មីៗ
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
