លោក លី សំរិទ្ធ អភិបាលរងខេត្តសៀមរាប បានណែនាំដល់មន្ត្រីមានសមត្ថកិច្ចពាក់ព័ន្ធទាំងអស់ក្នុងខេត្ត ត្រូវសហការគ្នាបង្ក្រាបល្បែងស៊ីសងគ្រប់ប្រភេទឲ្យអស់ពីមូលដ្ឋាន បូករួមទាំងការជួញដូរមនុស្ស ការសម្អាតលុយកខ្វក់ និងបទល្មើសគ្រឿងញៀន ដែលកើតមានត្រូវបង្ក្រាបឲ្យគ្រប់ជ្រុងជ្រោយ។ ជាមួយគ្នានោះសមត្ថកិច្ចត្រូវកំណត់ទីតាំង ដែលធ្លាប់ធ្វើអាជីវកម្មល្បែងស៊ីសងខុសច្បាប់ឲ្យបានជាក់លាក់ និងត្រូវបន្តធ្វើកិច្ចសន្យាឲ្យម្ចាស់ទីតាំងទាំងនោះទទួលខុសត្រូវ ចំពោះមុខអាជ្ញាធរដោយធានាថា មិនឲ្យមានការលេងល្បែងស៊ីសងខុសច្បាប់។
លោក លី សំរិទ្ធ អភិបាលរងខេត្ត ថ្លែងយ៉ាងដូច្នេះក្នុងឱកាសតំណាងឲ្យឯកឧត្តម ទៀ សីហា អភិបាលខេត្តសៀមរាប អញ្ជើញជាអធិបតីក្នុងកិច្ចប្រជុំ គណៈបញ្ជាការឯកភាពរដ្ឋបាលខេត្តសៀមរាប នៅព្រឹកថ្ងៃទី២១ ខែកញ្ញា ឆ្នាំ២០២២នេះ ដោយកិច្ចប្រជុំនេះដែរក៏មានការចូលរួមពីអភិបាលរងខេត្ត ព្រះរាជអាជ្ញាអមសាលាដំបូងខេត្ត ប្រធានមន្ទីរអង្គភាពពាក់ព័ន្ធជុំវិញខេត្ត កងកម្លាំងប្រដាប់អាវុធទាំងបីប្រភេទ អភិបាលក្រុងស្រុកទាំង១២ ។ កិច្ចប្រជុំនេះដែរដើម្បីធ្វើការពិភាក្សា និងដោះស្រាយលើបញ្ហាបង្ក្រាបបទល្មើស ល្បែងស៊ីសងគ្រប់ប្រភេទ បទល្មើសគ្រឿងញៀន និងការជួញដូរមនុស្ស ក្នុងភូមិសាស្ត្រខេត្តសៀមរាប បន្ទាប់ពីមានការណែនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី កាលពីពេលថ្មីៗកន្លងទៅនេះ។
លោកអភិបាលរងខេត្ត បានបញ្ជាក់ថា គិតមកដល់ពេលនេះល្បែងស៊ីសងខុសច្បាប់គ្រប់ប្រភេទដាច់ខាតត្រូវតែបង្ក្រាបឲ្យអស់ពីមូលដ្ឋាន រួមនឹងសកម្មភាពជួញដូរមនុស្ស និងបទល្មើសគ្រឿងញៀនផងដែរ។ ជាមួយគ្នានេះដែរសមត្ថកិច្ចទាំងអស់ ហាមដាច់ខាតមិនត្រូវមានជាប់ពាក់ព័ន្ធជាមួយនឹងបទល្មើសល្បែងស៊ីសងគ្រប់ប្រភេទឲ្យសោះ។ ជាងនេះទៅទៀតមេបញ្ជាការកងកម្លាំងប្រដាប់អាវុធទាំងបី ក៏ត្រូវធ្វើការណែនាំបន្ថែមដល់មន្ត្រីរបស់ខ្លួននៅឯមូលដ្ឋាន កុំឱ្យពាក់ព័ន្ធ កុំនៅពីក្រោយ កុំអន្តរាគមន៍ និងកុំបិទបាំង ជុំវិញករណីទាំងនេះជាដាច់ខាត់។ ក្នុងនោះដែរគណៈបញ្ជាការឯកភាពរដ្ឋបាលក្រុងស្រុក ក៏បន្តសហការជាមួយស្ថាប័នអយ្យការអមសាលាដំបូងខេត្ត ដោយត្រូវដើរទន្ទឹមគ្នាទាំងនីតិបញ្ញត្តិ នីតិប្រតិបត្តិ និងតុលាការ រួមទាំងសារព័ត៌មាន ត្រូវបន្តនូវកិច្ចសហការឈានទៅបង្ក្រាបឲ្យបានជោគជ័យ។
លោក លី សំរិទ្ធ ក៏បានបញ្ជាក់បន្ថែមជុំវិញបញ្ហានៅតាមទីតាំងបញ្ជាំនានាក្នុងខេត្ត ដែលកន្លងមកមានករណីជាច្រើនដែលម្ចាស់ទីតាំងនោះ បានក្លាយជាទីតាំងទទួលទិញរបស់ចោរកម្ម ព្រោះជាទីតាំងដែលគ្មានច្បាប់អនុញ្ញាតត្រឹមត្រូវ ដែលជាកត្តាជម្រុញឲ្យករណីលួច ប្លន់ មានការកើតឡើងផងដែរ ហើយទាមទាដល់សមត្ថកិច្ចគ្រប់ជាន់ថ្នាក់ ត្រូវយកចិត្តទុកដាក់ឲ្យបានខ្ពស់ ក្នុងការចុះត្រួតពិនិត្យទៅលើទីតាំងទាងនោះ ថាតើទីតាំងណាខ្លះមានច្បាប់ត្រឹមត្រូវ ទីតាំងណាដែលមិនមានច្បាប់។
លោក មាស ច័ន្ទពិសិដ្ឋ ព្រះរាជអាជ្ញានៃអយ្យការអមសាលាដំបូងខេត្តសៀមរាប បានលើកឡើងថា ការបង្ក្រាបល្បែងស៊ីសងខុសច្បាប់ គឺជាការជួយសង្គ្រោះប្រជាពលរដ្ឋ ឲ្យរួចផុតពីភាពក្រីក្រ ក៏ដូចជាការលើកស្ទួយដល់ជីវភាពគ្រួសារ ព្រមទាំងធ្វើឲ្យភូមិឃុំ មានសុវត្ថិភាពទៀតផង។ ដូច្នេះអាជ្ញាធរមានសមត្ថកិច្ចត្រូវធ្វើការដោយយកចិត្តទុកដាក់ ដើម្បីចាត់វិធានការបង្ក្រាបបទល្មើសទាំងនោះ ចំពោះទីតាំងលេងល្បែងស៊ីសងតាមអនឡាញ ត្រូវធ្វើការត្រួតពិនិត្យឲ្យបានច្បាស់លាស់ បើមិនមានការលេងល្បែងភ្នាល់ដាក់ប្រាក់ទេ គឺយើងត្រូវអនុញ្ញាតឲ្យគាត់បើកលក់ដូរ ឬលក់កាហ្វេ ដោយមើលព័ត៌មាន ឬមើលរឿងផ្សេងៗ តាមទូរទស្សន៍បាន ដោយពុំមានការហាមឃាត់ទេ៕
អត្ថបទ និង រូបភាព៖ លោក អ៊ុន ណារាជ្យ
