នៅសាលប្រជុំសាលាខេត្តសៀមរាប នាថ្ងៃទី២១ ខែកញ្ញា ឆ្នាំ២០២២ លោក លី សំរិទ្ឋ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលខេត្ត និងជាប្រធានគណៈបញ្ជការឯកភាពរដ្ឋបាលខេត្តសៀមរាប បានដឹកនាំកិច្ចប្រជុំគណៈបញ្ជការឯកភាពរដ្ឋបាលខេត្ត ដោយមានវត្តមានចូលរួមពីសំណាក់លោក លោកស្រីអភិបាលរងខេត្ត នាយករដ្ឋបាលសាលាខេត្ត ព្រះរាជអាជ្ញាអមសាលាដំបូង តុលាការ មេបញ្ជាការ មេបញ្ជាការរងកម្លាំងប្រដាប់អាវុធគ្រប់ថ្នាក់ អភិបាលក្រុង ស្រុក ប្រធាន-អនុប្រធានមន្ទីរ អង្គភាពជុំវិញខេត្ត នាយកនាយករងទីចាត់ការសាលាខេត្ត និងមន្ត្រីពាក់ព័ន្ធជាច្រើនរូប។
កិច្ចប្រជុំនេះធ្វើឡើងក្នុងបំណងពិភាក្សាការងារទៅលើរបៀបវារៈសំខាន់ៗ ចំនួន៣ គឺ ៖ ១.បទបញ្ជាការបង្ក្រាបបទល្មើសល្បែងស៊ីសងគ្រប់ប្រភេទ ក្នុងភូមិសាស្ត្រខេត្ត, ២.ការត្រៀមបង្ការ ការតាមដាន និងវិធានការឆ្លើយតបពាក់ព័ន្ឋនឹងការគ្រប់គ្រងគ្រោះមហន្តរាយក្នុងខេត្ត និង៣.របាយការណ៍របស់ស្នងការនៃស្នងការដ្ឋាននគរបាលខេត្ត មេបញ្ជាការកងរាជអាវុធហត្ថខេត្ត ប្រធានគណ:បញ្ជាការឯកភាពរដ្ឋបាលក្រុង ស្រុកនិង បញ្ហាផ្សេងៗ និងសំណូមពរមួយចំនួនដើម្បីមានវិធានការនិងដំណោះស្រាយ។
មានប្រសាសន៍ក្នុងឱកាសនោះ លោក លី សំរិទ្ឋ អផិបាលរងខេត្ត បានវាយតម្លៃខ្ពស់ ចំពោះលទ្ឋផលការងារកន្លងមកដែលគ្រប់ជំនាញ គ្រប់ផ្នែកវិស័យ បានខិតខំប្រឹងប្រែងអនុភាពបានល្អប្រសើរទៅតាមតួនាទីភារកិច្ចរបស់ខ្លួន។ ទន្ទឹមនឹងនោះ លោកអភិបាលរងខេត្ត ក៍បានជំរុញដល់អភិបាលក្រុងស្រុក អាជ្ញាធរមូលដ្ឋាន កងកម្លាំងមានសមត្ថកិច្ចគ្រប់ពាក់ព័ន្ឋសហការតាមដានបង្ក្រាបការលេងល្បែងស៊ីសងខុសច្បាប់គ្រប់ប្រភេទ ដាច់ខាតត្រូវតែបង្ក្រាប ឲ្យអស់ពីមូលដ្ឋាន បូករួមទាំងការជួញដូរមនុស្ស ការសម្អាតលុយកខ្វក់ និងបទល្មើសគ្រឿងញៀនដែលកើតមានត្រូវបង្ក្រាបឲ្យគ្រប់ជ្រុងជ្រោយ។ បន្ថែមពីនេះសមត្ថកិច្ចជំនាញ ត្រូវកំណត់ទីតាំងដែលធ្លាប់ធ្វើអាជីវកម្មល្បែងស៊ីសងខុសច្បាប់ ត្រូវបន្តធ្វើកិច្ចសន្យាឲ្យម្ចាស់ទីតាំងទាំងនោះទទួលខុសត្រូវចំពោះមុខអាជ្ញាធរដោយធានាថា មិនឲ្យមានការលេងល្បែងស៊ីសងខុសច្បាប់បន្តទៀតនោះឡើយ។
ព័ត៌មានជាតិ ថ្មីៗ
លោក លី សំរិទ្ធ ក៏បានលើកផងដែរថា សេចក្តីសម្រេចក្នុងការបង្ក្រាបល្បែងស៊ីសងគ្រប់ប្រភេទ យើងមានកាលពីក្នុងឆ្នាំ១៩៩៦មកម្លេះ ព្រមទាំងកំណត់ និងបែងចែកគណៈ កម្មាធិការគ្រប់គ្រងគ្រោះមហន្តរាយ នៅតាមក្រុងស្រុករួចជាស្រេចហើយដែរ ជាមួយគ្នានោះយើងក៏មានគោលនយោបាយភូមិឃុំ មានសុវត្ថិភាពផងដែរ។ ដូច្នេះអ្វីដែលត្រូវការចំពោះមុខនោះ គឺការអនុវត្តលើការបង្ក្រាបល្បែងស៊ីសង ដែលតែងកើតមាន ឡើងនៅតាមមូលដ្ឋានភូមិឃុំ។ ក្នុងនោះលោកក៏បានលើកផងដែរ អំពីល្បែងស៊ីសងនៅតាមប្រព័ន្ធអ៊ីនធើណេត ដែលធ្វើឲ្យមានការស្មុកស្មាញដល់សមត្ថកិច្ចយើងក្នុងការបង្ក្រាបបទល្មើសនេះ។
សូមរំលឹកថា កាលពីថ្ងៃទី១៧ ខែកញ្ញា ឆ្នាំ២០២២ កន្លងទៅសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្ញើសារសម្លេងពិសេស ដោយបានអំពាវនាវដល់អាជ្ញាធរថ្នាក់ក្រោមជាតិ សមត្ថកិច្ច និងប្រជាពលរដ្ឋ ពាក់ព័ន្ធនឹងវិធានការបង្ក្រាបល្បែងស៊ីសងខុសច្បាប់ នៅទូទាំងប្រទេស និងប្រមានដកហូតតំណែងចំពោះថ្នាក់ដឹកនាំខេត្តគ្រប់អង្គភាព ដែលមិនអនុវត្តនូវវាធានការបង្គ្រាបបទល្មើសនេះនៅក្នុងមូលដ្ឋានទៀតផង៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
