នៅថ្ងៃទី២០ ខែកញ្ញា ឆ្នាំ២០២២ ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការប្រតិបត្តិនៃក្រុមប្រឹក្សាជាតិគាំពារសង្គម បានដឹកនាំក្រុមការងារចុះពិនិត្យស្ថានភាពនៃការរស់នៅរបស់បងប្អូនប្រជាពលរដ្ឋដែលព្រមផ្លាស់ប្តូរលំនៅដ្ឋានពីតំបន់រមណីយដ្ឋានអង្គរ និងតាមមាត់ស្ទឹងសៀមរាប មកកាន់ភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ខេត្តសៀមរាប។
ក្នុងឱកាសចុះពិនិត្យនេះមានការចូលរួមពីតំណាងក្រសួងផែនការ ក្រសួងសង្គមកិច្ច អតីតយុទ្ធជន និងយុវនីតិសម្បទា តំណាងអគ្គលេខាធិការដ្ឋានក្រុមប្រឹក្សាជាតិ គាំពារសង្គមកម្ពុជា និងអាជ្ញាធរពាក់ព័ន្ធ ក្នុងគោលបំណងចុះពិនិត្យ សំណេះសំណាល និងសម្របសម្រួលជំរុញការផ្តល់កិច្ចគាំពារសង្គមផ្សេងៗ និងការផ្តល់បណ្ណសមធម៌ជូនប្រជាពលរដ្ឋ ដែលជាការប្រតិបត្តិតាមប្រសាសន៍ណែនាំដ៏ខ្ពង់ខ្ពស់របស់សម្តេចតេជោ ហ៊ុន សែន និងតាមការចង្អុលបង្ហាញរបស់ ឯកឧត្តមអគ្គបណ្ឌិត សភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគាំពារសង្គម។
ឯកឧត្តម រស់ សីលវ៉ា មានប្រសាសន៍ថា ក្រោមការដឹកនាំដ៏ត្រឹមត្រូវប្រកបដោយចក្ខុវិស័យវែងឆ្ងាយ និងភាពប្រាកដនិយមរបស់សម្តេចតេជោ ហ៊ុន សែន ព្រះរាជាណាចក្រកម្ពុជា ទទួលបានសុខសន្តិភាពពេញលេញ ការបង្រួបបង្រួមជាតិ ស្ថេរភាពនយោបាយ និងសណ្តាប់ធ្នាប់សង្គម ដែលជាបុរេលក្ខខណ្ឌដ៏ចាំបាច់មួយ មិនអាចខ្វះបានសម្រាប់ការអភិវឌ្ឍសេដ្ឋកិច្ច-សង្គម។ បច្ចុប្បន្នកម្ពុជាបាននឹងកំពុងជំរុញការអនុវត្តគោលនយោបាយជាតិគាំពារសង្គម ជាពិសេសការជួយគាំពារគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩។ ជាក់ស្តែងប្រជាពលរដ្ឋក្រីក្រពិតប្រាកដដែលងាយរងផលប៉ះពាល់ផ្នែកសេដ្ឋកិច្ចដោយសារតែវិបត្តិកូវីដ-១៩ ប្រមាណ ៧០ម៉ឺនគ្រួសារ ស្មើនឹងជិត ៣លាននាក់ ទទួលបានការឧបត្តម្ភជាសាច់ប្រាក់ប្រចាំខែ ចាប់ពីខែមិថុនា ឆ្នាំ២០២០ រហូតមកដល់បច្ចុប្បន្ន ដោយរាជរដ្ឋាភិបាលកម្ពុជា បានចំណាយអស់ជាង ៣ពាន់ ១រយប៊ីលាន ស្មើនឹងប្រមាណ ៧៧៥លានដុល្លារអាមេរិក គិតត្រឹមខែសីហា ឆ្នាំ២០២២នេះ ដែលជាថវិកាផ្តល់សេវាគាំពារសង្គមដ៏ធំមួយមិនធ្លាប់មានពីមុនមក។
ព័ត៌មានជាតិ ថ្មីៗ
ឯកឧត្តមរដ្ឋលេខាធិការ មានប្រសាសន៍ទៀតថា តាមការណែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ក្រុមការងារនៃក្រុមប្រឹក្សាជាតិគាំពារសង្គម នឹងសហការជាមួយក្រសួងស្ថាប័នពាក់ព័ន្ធនានា សម្របសម្រួលផ្តល់សេវាគាំពារសង្គមនានាជូនបងប្អូនដែលព្រមផ្លាស់ប្តូរលំនៅដ្ឋានពីតំបន់រមណីយដ្ឋានអង្គរ និងតាមមាត់ស្ទឹងសៀមរាប មកកាន់ភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ខេត្តសៀមរាប នៅខែតុលា ឆ្នាំ២០២២ខាងមុខនេះ តាមរយៈការចេញបណ្ណសមធម៌ (បណ្ណក្រីក្រ) ក៏ដូចជាដើម្បីទទួលបានការឧបត្ថម្ភសាច់ប្រាក់ពីកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩។ ឯកឧត្តម ក៏បានស្នើរឱ្យគ្រប់តំណាងភាគីពាក់ព័ន្ធសហការគ្នាដើម្បីសម្រួលដល់ការផ្លាស់ទីលំនៅរបស់ប្រជាពលរដ្ឋឱ្យបានរលូន។ ទន្ទឹមនឹងនេះ ឯកឧត្តមរដ្ឋលេខាធិការ ក៏បានស្នើគិតគូរលទ្ធភាពផ្តល់ការគាំទ្រនានា ដោយក្នុងនោះការងារផ្តល់សេវាគាំពារសង្គមដល់ប្រជាពលរដ្ឋដែលជួបការលំបាកដោយការផ្លាស់ប្តូរទីលំនៅផងដែរ។
សូមបញ្ជាក់ជូនថា ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានដាក់ចេញនូវគោលនយោបាយមួយចំនួន ដើម្បីអភិវឌ្ឍ និងលើកកម្ពស់សុខុមាលភាព ប្រជាពលរដ្ឋ ដែលនឹងត្រូវផ្លាស់មកតាំងទីថ្មីនៅតំបន់ភូមិធម្មជាតិរុនតាឯកនេះ។ គោលនយោបាយទាំងនោះ រួមមានការធានាការដឹកជញ្ជូនសម្ភារពីទីតាំងចាស់មកទីតាំងថ្មី ផ្តល់ថវិកា ១,២០០,០០០រៀល ស័ង្កសី ៣០សន្លឹក ក្នុងមួយគ្រួសារ ដើម្បីរួមចំណែកកសាងលំនៅឋាន និងផ្តល់សមធម៌ ទាំងសម្រាប់ពលរដ្ឋទើបស្ម័គ្រចិត្តមកថ្មី នៅភូមិត្រពាំងសេស និងទក្សិណត្បូង សង្កាត់គោកចក ក្រុងសៀមរាប និងពលរដ្ឋ ៥៩៤គ្រួសារ ដែលរើមកពីតំបន់មាត់ស្ទឹងសៀមរាប ក្នុងឆ្នាំ២០២០ផង៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
