ការខូចខាតដ៏ធំធេង ត្រូវបានរាយការណ៍នៅទូទាំងកោះ ព័រតូរីកូ បន្ទាប់ពីព្យុះសង្ឃរា Fiona ចាប់ផ្តើមវាយប្រហារកាលពីរសៀលថ្ងៃអាទិត្យទី១៨ខែកញ្ញា។
នេះបើតាមការចេញផ្សាយដោយទីភ្នាក់ងារសារព័ត៌មាន Daily Mail នៅថ្ងៃអង្គារ ទី២០ ខែកញ្ញា ឆ្នាំ២០២២។
ផ្លូវនានា ត្រូវបានប្រែក្លាយទៅជាទន្លេដែលមានទឹកហូរខ្មួលខ្មាញ់ ហើយសូម្បីតែស្ពាន ដែលទើបសាងសង់បន្ទាប់ពីព្យុះសង្ឃរា Maria ក្នុងឆ្នាំ២០១៧ ក៏ត្រូវបានទឹកហូរបុកកម្ទេចផងដែរ។
អគ្គិសនីត្រូវបានកាត់ផ្តាច់ទាំងស្រុងដោយធ្វើឲ្យកោះមានប្រជាជនប្រហែល ៣.២លាននាក់មួយនេះ ធ្លាក់ចូលទៅក្នុងភាពងងឹត។ ខ្យល់កន្ត្រាក់បានវាយបំប៉ើងដំបូលផ្ទះ ខណៈភ្លៀងធ្លាក់ខ្លាំងបណ្តាលឲ្យបាក់ដីទៀតផង។
ព្យុះសង្ឃរា Fiona បានវាយប្រហារនៅចម្ងាយប្រហែល ២៤គីឡូម៉ែត្រពីភាគអាគ្នេយ៍ទីក្រុង Mayaguez ជាមួយនឹងកម្លាំងខ្យល់អតិបរមា ១៣៦គីឡូម៉ែត្រក្នុងមួយម៉ោង។
កាលពីព្រឹកថ្ងៃអាទិត្យ ប្រធានាធិបតីអាមេរិកលោក Joe Biden បានយល់ព្រមឲ្យប្រកាសអាសន្ននៅតំបន់នោះ។ កំពង់ផែរបស់ព័រតូរីកូត្រូវបានបិទ ហើយជើងហោះហើរចេញពីអាកាសយានដ្ឋានសំខាន់ ត្រូវបានលុបចោល។
