ក្រុមការងារនៃក្រសួងផែនការ បានមមាញឹកបន្ដធ្វើបណ្ណសមធម៌ដំណាក់កាលទី២ ដល់ប្រជាពលរដ្ឋដែលបានស្ម័គ្រចិត្ដចាកចេញពីតំបន់រមណីយដ្ឋានអង្គរ ទៅរស់នៅភូមិធម្មជាតិរុនតាឯក ស្រុកបន្ទាយស្រី និងភូមិពាក់ស្នែង ស្រុកអង្គរធំ ខេត្ដសៀមរាប។យុទ្ធនាការជំហ៊ានទី២នេះ ធ្វើឡើងនៅខាងមុខអង្គរវត្ដ ចាប់ពីថ្ងៃទី១៧ខែតុលារហូតដល់គ្រប់ចំនួនប្រជាពលរដ្ឋដែលត្រូវផ្ដល់បណ្ណសមធម៌។
ឯកឧត្ដម ផេង បញ្ញាធន ប្រតិភូរាជរដ្ឋាភិបាលកម្ពុជា ទទួលបន្ទុកអគ្គនាយកដ្ឋានផែនការ និងជាប្រធានក្រុមការងារធ្វើបណ្ណសមធម៌ មានប្រសាសន៍ថា ការផ្ដល់បណ្ណសមធម៌ដំណាក់កាលទី២ មានចំនួន៤៧៩៣គ្រួសារ ក្នុងនោះប្រជាពលរដ្ឋស្ម័គ្រចិត្ដទៅភូមិធម្មជាតិរុនតាឯកស្រុកបន្ទាយស្រីចំនួន១៨៥៣គ្រួសារ និងនៅភូមិពាក់ស្នែងស្រុកអង្គរធំ មានចំនួន២៧៩០គ្រួសារ។ ឯកឧត្ដមបានបន្ដថា យុទ្ធនាការបានរៀបចំជាប្រព័ន្ធ ដោយមានមន្ដ្រីបំពេញការងារចំនួន៦០នាក់ គឺលឿនរហ័សមិនឱ្យប្រជាពលរដ្ឋរងចាំយូរ ដោយផ្ដល់ឱកាសឱ្យពួកគាត់ចូលសម្ភាសន៍ម្ដងៗចំនួន៣០គ្រួសារ នឹងទទួលបានបណ្ណសមធម៌ភ្លាម ជាពិសេសទៀតនោះ ពួកគាត់ក្រោយពីទទួលបានបណ្ណសមធម៌ហើយ អាចចុះបញ្ជីទទួលលេខកូដសម្រាប់បើកប្រាក់នៅបញ្ជរវឹងនៅជិតៗទីនេះភ្លាម។ឯកឧត្ដម បញ្ជាក់ថា ប្រជាពលរដ្ឋដែលមានបណ្ណក្រីក្រ២ ត្រូវប្ដូរជាបណ្ណក្រីក្រប្រភេទមួយវិញ ដែលបណ្ណនេះមានរយៈពេល១០ឆ្នាំ ប៉ុន្ដែមានសុពលភាព៣ឆ្នាំត្រូវផ្លាស់ប្ដូរម្ដង។ចំណែកកាផ្ដល់ទឹកប្រាក់សម្រេចលើរាជរដ្ឋាភិបាលចាត់ចែង។
ប្រជាពលរដ្ឋដែលត្រូវមកធ្វើបណ្ណសមធម៍ ត្រូវនាំយកមក ជាប់ខ្លួននូវឯកសារចាំបាច់មួយចំនួន ដូចជាសៀវភៅគ្រួសារ សៀវភៅស្នាក់នៅ បង្កាន់ដៃទីតាំងដីឡូតិ៍ និង អត្តសញ្ញាណបណ្ណសញ្ចាតិខ្មែរ ។
សូមបញ្ជាក់ថា ក្រសួងផែនការ បើកយុទ្ធនាការកំណត់ និងផ្ដល់បណ្ណសមធម៌ ជូនប្រជាពលរដ្ឋនៅតំបន់អង្គរដលស្ម័គចិត្តទៅរស់នៅភូមិធម្មជាតិរុនតាឯក ស្រុកបន្ទាយស្រី ខេត្ដសៀមរាប លើកទី១មានប្រជាពលរដ្ឋទៅទទួលបណ្ណសមធម៌មានចំនួនមានចំនួន ៤២២៩គ្រួសារ និងយុទ្ធនាការលើកទី២ មានប្រជាពលរដ្ឋដែលបានស្ម័គ្រចិត្ដប្ដូរទីលំនៅទៅទាំងពីរទីតាំងនេះ ពួកគាត់បានទទួលបណ្ណសមធម៌មានចំនួន៤៧៩៣គ្រួសារ ដែលមកដល់ពេលនេះ ប្រជាពលរដ្ឋទៅដែលបានស្ម័គ្រចិត្ដចាកចេញមាត់ស្ទឹង តំបន់រមណីយដ្ឋានអង្គរ ទៅរស់នៅភូមិពាក់ស្នែង និងទៅរស់នៅរុនតាឯកថ្មីៗ និងកាលពី២ឆ្នាំមុនបានទទួលបណ្ណសមធម៌ប្រមាណជិត១ម៉ឺនគ្រួសារ៕
អត្ថបទ និងរូបភាព៖ លោក បូ សាវី
