នៅថ្ងៃទី២៧ ខែតុលា ឆ្នាំ២០២២ ក្រសួងព័ត៌មាន សហការជាមួយក្រសួងសេដ្ឋកិច្ច និងហិរញ្ញវត្ថុ មានរៀបចំសិក្ខាសាលាស្តីពីវិធាននិងនីតិវិធីនៃការរៀបចំ និងការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ ជូនដល់លោក លោកស្រីជាប្រធាន និងមន្ត្រីជំនាញ នៃមន្ទីរព័ត៌មានរាជធានី ខេត្តទូទាំងប្រទេស ដើម្បីបង្កើនសមត្ថភាព និងយល់ដឹងកាន់តែច្បាស់ពីនីតិវិធីចុះបញ្ជីសារពើភណ្ឌទ្រព្យសម្បត្តិរដ្ឋ ជាពិសេសការចុះបញ្ជីដោយប្រើប្រាស់លើប្រព័ន្ធ SARMIS។
ថ្លែងបើកសិក្ខាសាលានេះ ឯកឧត្តម ថាច់ ផែន រដ្ឋលេខាធិការ និងជាប្រធានក្រុមការងារកំណែទម្រង់ការគ្រប់គ្រងហិរញ្ញវត្ថុសាធារណ: នៃក្រសួងព័ត៌មាន លើកឡើងថា ប្រព័ន្ធបច្ចេកវិទ្យាព័ត៌មានគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ ហៅកាត់ថា SARMIS នេះ គឺជាការអនុវត្តផែនការសកម្មភាពនៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាលកម្ពុជា ដែលនឹងធ្វើទំនើបកម្ម ឆ្ពោះទៅកាន់ប្រព័ន្ឋហិរញ្ញវត្ថុសាធារណ: ផ្តោតលើសមិទ្ធកម្ម និងវិមជ្ឈការស្របតាមស្តង់ដារឧត្តមានុវត្តន៍អន្តរជាតិ។
ឯកឧត្តម ថាច់ ផែន លើកឡើងថា ការប្រើប្រាស់ប្រព័ន្ធ SARMIS ទាមទារឱ្យមន្ត្រីទទួលបន្ទុក មានចំណេះដឹងប្រើប្រាស់កុំព្យូទ័រ និង ប្រព័ន្ឋអ៉ិនធឺណិត ខណ:មន្ត្រីមួយចំនួននាពេលបច្ចប្បន្ន នៅមានកម្រិតលើជំនាញទាំងនេះនៅឡើយ។
ទោះជាយ៉ាងនេះក្ដី ឯកឧត្តមរដ្ឋលេខាធិការ ជឿជាក់ថា មន្ត្រីជំនាញ ដែលមានវត្តមាននាពេលនេះ នឹងប្រឹងប្រែងស្វែងយល់ពីការប្រើប្រាស់ប្រព័ន្ធ SARMIS នេះ ដើម្បីឱ្យការងារអនុវត្តន៍គ្រប់គ្រងទ្រព្យសម្បត្តិរដ្ឋទាំងនោះ មានភាពច្បាស់លាស់ និងប្រកបដោយប្រសិទ្ឋភាពខ្ពស់។
គួររំលឹកថា ប្រព័ន្ធបច្ចេកវិទ្យាព័ត៌មានគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ ហៅកាត់ថា SARMIS ត្រូវបានដាក់ឱ្យប្រើប្រាស់ ក្នុងដំណាក់កាលទី ១ នៅខែធ្នូ ឆ្នាំ២០២០។ ប្រព័ន្ធ SARMIS នេះដែរ នឹងអនុញ្ញាតឱ្យអ្នកប្រើប្រាស់ ធ្វើបច្ចុប្បន្នភាពតម្លៃទ្រព្យសម្បត្តិរដ្ឋកាន់តែមានភាពងាយស្រួល បញ្ជូនទិន្នន័យពីអាជ្ញាធរកាន់កាប់ទ្រព្យសម្បត្តិរដ្ឋ មកអាជ្ញាធរគ្រប់គ្រងទ្រព្យសម្បត្តិរដ្ឋបានឆាប់រហ័ស ជាពិសេស បានប្រែក្លាយការងារគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ ឱ្យកាន់តែទំនើប ត្រឹមត្រូវ ជាក់លាក់ តម្លាភាព ប្រសិទ្ធភាព និង គណនេយ្យភាព ស្របតាមឧត្តមានុវត្តន៍ជាអន្តរជាតិ។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
