ឯកឧត្ដមសាស្ដ្រាចារ្យ ម៉ម ប៊ុនហេង បានអញ្ជើញជាអធិបតី បើកសន្និសីទអន្ដរជាតិគន្ធបុប្ផាលើកទី៨ និងទិវាគម្រប់ខួប ៣០ឆ្នាំ នៃការបង្កើតមន្ទីរពេទ្យគន្ធបុប្ផា។សន្និសីទអន្ដរជាតិ បានធ្វើឡើងនៅមន្ទីរពេទ្យកុមារគន្ធបុប្ផាខេត្ដសៀមរាប នាថ្ងៃទី០៣ ខែវិច្ឆិកា ឆ្នាំ២០២២នេះ។
ឯកឧត្ដមសាស្ដ្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល មានប្រសាសន៍ថា ការរៀបចំសន្និសីទអន្តរជាតិគន្ធបុប្ផាលើកទី៨ នៃមន្ទីរពេទ្យគន្ធបុប្ផានេះ ដោយឈរលើស្មារតីលើកកម្ពស់វិជ្ជាជីវ:វេជ្ជសាស្ត្រ ជាប្រចាំរបស់លោកសាស្ត្រាចារ្យ BEAT RICHNER និង វេជ្ជបណ្ឌិត PETER STLDER. ស្ថាបនិកមូលនិធិគន្ធបុប្ផាស្វីស ដើម្បីជាការរៀនសូត្របន្ត និងផ្លាស់ប្តូរបទពិសោធន៍បច្ចេកទេស ក្នុងការព្យាបាលជំងឺ រវាងវេជ្ជបណ្ឌិតកម្ពុជា និងសាស្ដ្រាចារ្យល្បីៗ មកពីមន្ទីរពេទ្យកុមារនៃសកលវិទ្យាល័យហ្សុយរិកប្រទេសស្វីស។ សន្និសីទអន្តរជាតិគន្ធបុប្ផានេះ ត្រូវបានអាក់ខានអស់រយ:ពេល ២ឆ្នាំ ដោយសារការរាតត្បាតជាសាកល នៃជំងឺកូវីដ-១៩។ ឯកឧត្ដមបន្ដថា«សន្និសីទអន្តរជាតិគន្ធបុប្ផាលើកទី៨នាថ្ងៃនេះ គឺជាឱកាសដ៏មានសារ:សំខាន់ ដើម្បីបង្ហាញនូវមេរៀនបទពិសោធន៍អំពីបច្ចេកទេសវេជ្ជសាស្ត្រ ក្នុងការថែទាំព្យាបាលអ្នកជំងឺ ដោយផ្តោតលើប្រធានបទអំពី៖ ការព្យាបាលថែទាំជំងឺទារក ការព្យាបាលសង្គ្រោះបន្ទាន់ផ្នែកកុមារ (PICU) បទពិសោធន៍ក្នុងការគ្រប់គ្រងព្យាបាលអ្នកជំងឺកូរីដ-១៩ នៅមន្ទីរពេទ្យគន្ធបុប្ផា និងមន្ទីរពេទ្យកុមារនៅប្រទេសស្វីស និងបង្ហាញនូវបច្ចុប្បន្នភាព នៃបច្ចេកទេសផ្នែកសល្យសាស្ត្រកុមារ ស្របពេលមន្ទីរពេទ្យកុមារគន្ធបុប្ផាគម្រប់ ៣០ឆ្នាំផងដែរ។ ឯកឧត្ដម នៅចងចាំជានិច្ចចំពោះលោកវេជ្ជបណ្ឌិត BEAT RICHNER (Bentocelin) និងសហការីធំជិតស្និទ្ធរបស់លោក គឺលោកវេជ្ជបណ្ឌិត PETER STUDER ដែលជាស្ថាបនិកមន្ទីរពេទ្យគន្ធបុប្ផា តាំងពីឆ្នាំ១៩៩២មក។ ការខិតខំប្រឹងប្រែងដោយមិនចេះនឿយហត់ និងការលះបង់ របស់អតីតស្ថាបនិកទាំងពីររូប រួមជាមួយមន្ត្រីរាជការ បុគ្គលិកនៃមន្ទីរពេទ្យគន្ធបុប្ផាគ្រប់ជំនាន់ និងការចូលរួមគាំទ្រយ៉ាងពេញទំហឹង ដោយឥតល័ក្ខខ័ណ្ឌទាំងផ្នែកស្មារតី និងថវិកា អំពីក្រសួងសុខាភិបាលរាជរដ្ឋាភិបាលកម្ពុជា រដ្ឋាភិបាលស្វីស និងសប្បុរសជនគ្រប់លំដាប់ថ្នាក់ ទាំងនៅប្រទេសស្វីស និងនៅកម្ពុជា ទើបមន្ទីរពេទ្យគន្ធបុប្ផាទាំងមូលសម្រេចបាននូវសមិទ្ធផលធំៗជាច្រើន ទៅតាមដំណាក់កាលនីមួយៗ ជាប់បន្ទាប់។
បើតាមឯកឧត្ដម រំលឹកថា កាលពី ៣០ឆ្នាំមុន មន្ទីរពេទ្យដែលចាប់ផ្តើមដំបូងឆ្នាំ១៩៩២ មានគ្រែសម្រាកពេទ្យចំនួនតែ ៦០គ្រែ និងបុគ្គលិកប្រមាណ១០០នាក់។ ប៉ុន្ដែមកដល់បច្ចុប្បន្ននេះមន្ទីរពេទ្យគន្ធបុប្ផាមាន ៥ទីតាំង ដែលមានត្រែសរុប ២,០៨៨គ្រែ និងបុគ្គលិកចំនួន ២,៤៩៩នាក់ កំពុងបម្រើការងារប្រកបដោយវិជ្ជាជីវ: និងក្រមសីលធម៌។ឯកឧត្ដម បានបន្ថែមថា អត្រាមរណ:ភាពកុមារក្នុងមន្ទីរពេទ្យបានធ្លាក់ចុះពី៨% មកត្រឹម ០,៣% ក្នុងរយ:ពេល ៣០ឆ្នាំ នៃប្រតិបត្តិការបស់ខ្លួន។ មន្ទីរពេទ្យគន្ធបុប្ផាបានទទួលពិនិត្យព្យាបាលកុមារ និងស្រ្តីមានផ្ទៃពោះ នៅផ្នែកពិគ្រោះជំងឺក្រៅ បានចំនួន ២១,២៤៦,១៧៧ករណី (ជំងឺកុមារចំនួន ១៨,៤២៦,៤៥៧ករណី។ បានព្យាបាលកុមារសម្រាកក្នុងមន្ទីរពេទ្យ ចំនួន ២,៣១៧,៧២៣នាក់ ។សម្រាលកូន បានចំនួន ៣៦០,៥២៣នាក់ និងព្យាបាលវះកាត់ជំងឺបេះដូងពីកំណើត បានចំនួន ៦,៤០២នាក់។ ក្រៅអំពីការពិនិត្យ និងព្យាបាលអ្នកជំងឺ មន្ទីរពេទ្យតន្ធបុប្ផា បានដើរតួនាទីយ៉ាងសំខាន់ ក្នុងការបណ្ដុះបណ្ដាលផ្នែកវេជ្ជសាស្ត្រឯកទេសកុមារ ហើយក៏ជាមន្ទីរពេទ្យសាកលវិទ្យាល័យ ដែលបានជួយបណ្ដុះបណ្តាលធនធានមនុស្ស ជានិស្សិតពេទ្យរាប់ជំនាន់បានយ៉ាងច្រើនទៀតផងដែរ។ ការសម្រេចបាននូវសមិទ្ធផលនេះ ជាការចូលរួមចំណែកយ៉ាងសំខាន់ ជាមួយរាជរដ្ឋាភិបាលកម្ពុជា ក្នុងការកាត់បន្ថយអត្រាមរណ:របស់កុមារ និងមាតា និងជួយគាំពារដល់សុខុមាលភាពរបស់កុមារ ព្រមទាំងជួយ កាត់បន្ថយភាពក្រីក្រ និងការអភិវឌ្ឍន៍សេដ្ឋកិច្ចសង្គម ស្របតាមគោលនយោបាយរបស់រាជរដ្ឋាភិបាល៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
