ក្រសួងកិច្ចការនារី សហការជាមួយធនាគារជាតិកម្ពុជា (NBC) ក្រោមការគាំទ្រពីក្រុមហ៊ុនវីសា (Visa) បានរៀបចំវគ្គបណ្តុះបណ្តាលស្តីពី“ចំណេះដឹងផ្នែកហិរញ្ញវត្ថុ និងឌីជីថល និងកម្មវិធីជំនាញដែលអនុវត្តជាក់ស្តែងសម្រាប់សិស្សមជ្ឈមណ្ឌលអភិវឌ្ឍស្ត្រី“ ដោយមានការចូលរួមដោយផ្ទាល់ និងតាមប្រព័ន្ឋហ្សូម ដើម្បីផ្តល់ចំណេះដឹងផ្នែកហិរញ្ញវត្ថុ និងឌីជីថលនិងលើកកម្ពស់សុខុមាលភាពហិរញ្ញវត្ថុ និងអនាគតរបស់សិស្ស និងសហគ្រិនស្ត្រីនៅក្នុងសង្គមឌីជីថលរបស់កម្ពុជា។
វគ្គបណ្ដុះបណ្ដាលនេះមានរយៈពេល ២ថ្ងៃគឺថ្ងៃទី១៤-១៥ ខែវិច្ឆិកា ឆ្នាំ២០២២ នៅសណ្ឋាគារសោមាទេវីខេត្តសៀមរាប ដោយសិក្ខាកាមចូលរួមមាន៖ សហគ្រិនស្រ្តី មន្រ្តីនៃមន្ទីរកិច្ចការនារី និងមជ្ឈមណ្ឌលអភិវឌ្ឍស្រ្តីនៃខេត្តគោលដៅទំាង៤ មានខេត្តសៀមរាប ព្រះវិហារ ស្ទឹងត្រែង និងក្រចេះ រួមនឹងការចូលរួមពីក្រុមអ្នកជំនាញផ្នែកចំនេះដឹងហិរញ្ញវត្ថុ និងចំនេះដឹងផ្នែកឌីជីថល ពីក្រុមហ៊ុនឫទ្ធិពលសរុប ៧៥នាក់
ថ្លែងតាមប្រព័ន្ធហ្សូម ឯកឧត្តម ថេ ឈុនហាក់ អគ្គនាយក នៃអគ្គនាយកដ្ឋានសមភាពយេនឌ័រ និងអភិវឌ្ឍន៍សេដ្ឋកិច្ច ក្រសួងកិច្ចការនារី មានប្រសាសន៍ថា បច្ចុប្បន្នបម្លាស់ប្ដូរដោយឌីជីថលទៅក្នុងសង្កម និងសេដ្ឋកិច្ចកំពុងតែមានការវិវត្តរីកចំរើនយ៉ាងល្អ ដោយគ្មានវិស័យធុរកិច្ច ឬក្រុមសង្គមណាមួយមិនពាក់ព័ន្ធនឹងបច្ចេកវិទ្យាថ្មីៗនៃប្រព័ន្ធសេដ្ឋកិច្ចឌីជីថល និងបដិវត្តន៍ឧស្សាហកម្មទី៤នោះទេ។ ដូច្នេះកិច្ចការចម្បងមួយសម្រាប់យើងទាំងអស់គ្នា គឺការបន្សាំខ្លួនក្នុងការទទួលយកនិងទាញយកផលប្រយោជន៍ពីបច្ចេកវិទ្យាឌីជីថល។
ឯកឧត្តមអគ្គនាយក បញ្ជាក់ថា ដើម្បីឱ្យយើងទាំងអស់គ្នាអាចចូលរួមយ៉ាងសកម្មនៅក្នុងការអភិវឌ្ឍសេដ្ឋកិច្ច និងសង្គម ព្រមទាំងចូលរួមក្នុងការកសាងឡើងវិញកាន់តែប្រសើរ ប្រកបដោយចីរភាព និងស្របតាមយុគសម័យសេដ្ឋកិច្ច-សង្គមឌីជីថល ទាមទារឱ្យយើងទាំងអស់គ្នា ជាពិសេសសហគ្រិនស្រ្តី ប្អូនៗ និងក្មួយ ចាំបាច់ត្រូវអភិវឌ្ឍខ្លួនឱ្យខ្លាំងខ្លាំ និងមុតមាំ ដែលអាចប្រែក្លាយខ្លួនឯងឱ្យក្លាយជាពលរដ្ឋឌីជីថល និងទាន់សម័យកាល។ ក្នុងនោះត្រូវអភិវឌ្ឍនូវសមត្ថភាព និងចំណេះដឹង ទាំងជំនាញរឹង និងទន់ ដើម្បីពង្រីកកាលានុវត្តភាព និងសក្តានុពលរបស់ខ្លួន ក្នុងន័យចូលរួមចំណែកស្តារ និងជំរុញការអភិវឌ្ឍសង្គម-សេដ្ឋកិច្ច ស្របតាមបរិការណ៍នៃបដិវត្តន៍ឧស្សាហកម្មទី៤។
ក្នុងឱកាសនោះដែរ លោកស្រី អ៊ីវ៉ាណា ត្រាហ្ស៊ីនី នាយិកាគ្រប់គ្រងក្រុមហ៊ុនវីសា ប្រចាំប្រទេសកម្ពុជា បានបង្ហាញជំនឿយ៉ាងមុតមាំលើឥទ្ធិពលនៃការអប់រំតាមរយៈការផ្តល់នូវព័ត៌មានច្បាស់លាស់ និងចំណេះដឹង ជាពិសេសនៅក្នុងយុគសេដ្ឋកិច្ចឌីជីថលដែលកំពុងតែអភិវឌ្ឍឥតឈប់ឈរនាពេលបច្ចុប្បន្ន។ លោកស្រីបន្តថា សម្រាប់កម្មវិធីសិក្សានៅឆ្នាំនេះដែរ ត្រូវបានរៀបចំឡើងដើម្បីបំពេញតាមតម្រូវការជាក់ស្តែង ក្នុងគោលបំណងបណ្តុះបណ្តាលសិក្ខាកាមនូវចំណេះដឹងផ្នែកហិរញ្ញវត្ថុ និងឌីជីថលថ្នាក់មូលដ្ឋាន និងកម្មវិធីជំនាញជាក់ស្តែងដែលផ្តល់ឲ្យពួកគេនូវអត្ថប្រយោជន៍ពេញមួយជីវិតផងដែរ។
សូមបញ្ជាក់ថា នៅក្នុងប្រទេសកម្ពុជា អាជីវកម្មដែលមានស្ត្រីជាម្ចាស់មានចំនួនប្រមាណ ៦១% នៃអាជីវកម្មទូទាំងប្រទេស។ ក្នុងនោះអាជីវកម្មពួកគាត់ស្ថិតក្នុងកម្រិតមីក្រូប្រមាណ ៦២% និងកម្រិតតូចមាន ២៦% ព្រមទាំងមានសមត្ថភាពផលិតកម្រិតទាប។ អាជីវកម្មរបស់ស្ត្រីភាគច្រើន គឺជាជំនួញលក់ដុំ និងលក់រាយ សេវាកម្ម កន្លែងស្នាក់នៅ និងចំណីអាហារ ការផលិត និងការផ្ដល់សេវាផ្សេងទៀតដែលមាន ចំនួនស្មើនឹង ៩៧% នៃអាជីវកម្មទាំងអស់។ ជាមួយគ្នានោះបើយោងតាមសៀវភៅរបស់សមាគមសហគ្រិនស្រ្តីកម្ពុជា ក៏បានឲ្យដឹងថា ស្រ្តីជាសហគ្រិនភាគច្រើនកំពុងមានបញ្ហាប្រឈមពាក់ព័ន្ធនឹងការចំណេះដឹងផ្នែក ហិរញ្ញវត្ថ, លទ្ធភាពក្នុងការទទួលបាន បច្ចុប្បន្នភាពព័ត៌មាន, និងចំណេះដឹងផ្នែកឌីជីថល ហើយក្នុងន័យនេះស្រ្តីអាជីវករតូចតាចភាគច្រើន ងាយទទួលរងនូវឥទ្ធិពលមិនល្អ និងមិនអាចចាប់យកនូវកាលានុវត្តភាពថ្មីៗ និងនវានុវត្តន៍ក្នុងការអភិវឌ្ឍអាជីវកម្ម៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
