គម្រោងបណ្ណាល័យកុមារ ផារ៉ុត ផារ៉ុត នៃប្រទេសកូរ៉េខាងត្បូង បានសហការជាមួយមជ្ឍមណ្ឌលយុវជនកម្ពុជា បើកសម្ភោធបណ្ណាល័យសម្រាប់កុមារ ដោយផ្ដោតសំខាន់លើការអភិវឌ្ឍន៍វប្បធម៌ និងវិស័យអប់រំ ពិសេសអំណាន ដើម្បីការអភិវឌ្ឍបៃតងកុមារនៅកម្ពុជា ។ការបើកសម្ភោធបណ្ណាល័យនេះ ស្ថិតនៅភូមិគោកដូង សង្កាត់ទឹកវិល ក្រុងសៀមរាបនាថ្ងៃទី២២ខែវិច្ឆិកាឆ្នាំ២០២២នេះ។
លោកស្រី គឹម យឺណា ជាអ្នកនិពន្ធ និងតំណាងគម្រោងបណ្ណាល័យកុមារ ផារ៉ុត ផារ៉ុត មានប្រសាសន៍ថា គម្រោងនេះ មានគោលបំណងអភិវឌ្ឍវប្បធម៌អប់រំ ពិសេសលើអំណាន ដើម្បីការអភិវឌ្ឍបៃតងប្រកបដោយចីរភាព។លោកស្រីបានលើកឡើងថាគម្រោងបណ្ណាល័យនេះ នឹងបន្តដំណើរការ១០០បណ្ណាល័យ ដែលចាប់ផ្ដើមពីខេត្តសៀមរាប និងបន្ដបន្ទាប់ទៀតដើម្បីជួយដល់កុមារនៅជនបទដែលមានជីវភាពខ្វះខាត មិនមានសៀវភៅអាន។លោកស្រីបន្ដថា នៅក្នុងបណ្ណាល័យមានសៀវភៅជាច្រើនភាសារ រួមមាន ភាសារខ្មែរ ភាសារអង់គ្លេស ភាសារកូរ៉េ ជាពិសេសទៅទៀត មានការបង្រៀនឱ្យកុមារចេះគូររូបភាព ខណៈដែលក្រុមការងារធ្វើការនៅបណ្ណាល័យសុទ្ធសឹងជាអ្នកនិពន្ធ។
លោកស្រីបន្ថែមថា នៅក្នុងប្រទេសកូរ៉េ មានបណ្ណាល័យច្រើនដែលធ្វើឱ្យក្មេងៗនៅប្រទេសនេះចូលចិត្ដអានសៀវភៅបានច្រើន។លោកស្រីនិងក្រុមការងារបានសម្ដែងការសប្បាយចិត្ដខ្លាំង បន្ទាប់បានពីបើកបណ្ណាល័យសម្រាប់កុមារនៅក្នុងប្រទេសកម្ពុជា ដែលសរុបមកដល់ពេលនេះមានចំនួនជាង២០បណ្ណាល័យហើយ ដែលបណ្ណាល័យនេះភាគច្រើននៅតាមជនបទ។លើសពីនេះទៅទៀត បណ្ណាល័យនេះថែមទាំងបានរៀបចំនូវសៀវភៅយ៉ាងល្អ ដើម្បីបង្កភាពងាយស្រួលដល់ការស្វែងរកសៀវភៅដែលកុមារចង់រកទៀតផង។
លោកបណ្ឌិត ស៊ាន ផល្លា នាយកមជ្ឈមណ្ឌលយុវជនកម្ពុជា មានប្រសាសន៍ថា បណ្ណាល័យនេះ នឹងជួយពង្រឹងសមត្ថភាពលើផ្នែកអំណាន និងបណ្ដុះវប្បធម៌រៀនសូត្រដល់កុមារកម្ពុជា។ ទាំងអំណាន និងវប្បធម៌រៀនសូត្រ នឹងរួមចំណែកការអភិវឌ្ឍធនធាននៅកម្ពុជា ព្រោះថាកុមារ និងយុវជនមានចំនួនច្រើនរហូតដល់ ២ភាគ៣ នៃប្រជាជនសរុប។លោកបន្ដថា ការយកចិត្តទុកដាក់លើកុមារ ជាការពង្រឹងមូលដ្ឋានគ្រឹះដល់ពួកគាត់ ដែលលោកជឿជាក់ថាកុមារកម្ពុជានឹងទទួលបានឱកាសអភិវឌ្ឍបន្ថែមទៀតយ៉ាងពិតប្រាកដ ដែលនេះនឹងគាំទ្រដល់ចុក្ខុវិស័យកម្ពុជា ជាប្រទេសមានចំណូលខ្ពស់នៅឆ្នាំ២០៥០៕
អត្ថបទ និងរូបភាព៖ លោក បូ សាវី
