នារសៀលថ្ងៃទី២២ ខែវិច្ឆិកា ឆ្នាំ២០២២ នៅសណ្ឋាគារសុខាសៀមរាប ក្រោមអធិបតីភាពនៃសហប្រធាន សម្តេចពិជ័យសេនា ទៀ បាញ់ ឧបនាយករដ្ឋមន្ត្រី ក្រសួងការពារជាតិ និងឯកឧត្តម ស៊្រី រ៉ាចណាត ស៊ីង រដ្ឋមន្ត្រីក្រសួងការពារជាតិឥណ្ឌា បានដឹកនាំបើកកិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាន-ឥណ្ឌា ដោយមានការអញ្ជើញចូលរួមពីសំណាក់ឯកឧត្តមរដ្ឋមន្ត្រីក្រសួងការពារជាតិ នៃបណ្តាប្រទេសចំនួន៩ និងអគ្គលេខាធិការអាស៊ាន។
សម្តេចសម្តេចពិជ័យសេនា ទៀ បាញ់ មានប្រសាសន៍ថា វត្តមានរបស់ឯកឧត្តមរដ្ឋមន្ត្រីការពារជាតិឥណ្ឌា និងឯកឧត្តម រដ្ឋមន្ត្រីការពារជាតិអាស៊ានទាំងអស់ ដែលបានចូលរួមក្នុងកិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាន-ឥណ្ឌានាពេលនេះ ពិតជាបានឆ្លុះបញ្ចាំងអំពីការប្តេជ្ញាចិត្តរួមរបស់យើង ក្នុងការធ្វើឲ្យកាន់តែស៊ីជម្រៅនូវទំនាក់ទំនងមិត្តភាព រវាងអាស៊ាននិងឥណ្ឌា ក្នុងកិច្ចសហប្រតិបត្តិការសន្តិសុខ និងការពារជាតិសម្រាប់តំបន់យើងប្រកបដោយស្ថេរភាព និងវិបុលភាព។ ក្នុងរយៈពេល៣០ឆ្នាំកន្លងមកនេះ កិច្ចសហប្រតិបត្តិការរវាងអាស៊ាន និងឥណ្ឌា មានការរីកចម្រើនគួរឲ្យកត់សម្គាល់លើគ្រប់វិស័យ។ ក្នុងវិស័យការពារជាតិ សន្តិសុខ និងកិច្ចសហប្រតិបត្តិការរបស់យើង បានបម្រើផល ប្រយោជន៍គ្នាទៅវិញទៅមក និងបាន រួម ចំណែកយ៉ាងសំខាន់ក្នុងពង្រឹងសន្តិភាព និងស្ថេរភាពនៅក្នុងតំបន់ អាស៊ីប៉ាស៊ីភិកទាំងមូល។
សម្តេចពិជ័យសេនា បានបង្ហាញ់នូវក្តីរីករារយដែលបានរៀបចំកិច្ចរដ្ឋមន្ត្រីការពារជាតិអាស៊ានលើកទី១៦ កាលពីខែមិថុនា សំណើរលំហាត់លម្ហសមុទ្រអាស៊ានឥណ្ឌាត្រូវបានឯកភាព គ្រោងនឹងរៀបចំនៅឆ្នាំក្រោយនេះ ដោយបញ្ចូលជាមួយនឹងលំហាត់កងទ័ពជើងទឹកពហុសាសន៍អាស៊ាន នាឆ្នាំ២០២៣។ កម្ពុជាគាំទ្រ ហើយនិងចូលរួមលំហាត់លម្ហសមុទ្រអាស៊ានឥណ្ឌា ក៏ដូចជាលំហាត់ផ្នែកបច្ចេកទេសនៃក្រុមការងាជំនាញ ADMM បូក ស្តីពីជំនួយមនុស្សធម៌ និងជួយសង្គ្រោះគ្រោះមហន្តរាយ ឆ្នាំ២០២៣ ដែលឥណ្ឌាជាសហប្រធាន ជាមួយនឹង ឥណ្ឌូនេស៊ី។ ជាមួយគ្នានេះ អាស៊ាននិងឥណ្ឌា បានប្តេជ្ញាចិត្តក្នុងពង្រឹងសន្តិសុខ និងសន្ទុះ ជាវិជ្ជមាននៃការរួមចំណែកសកម្មរបស់អាស៊ាន ក្នុងកិច្ចសហប្រតិបត្តិការ ក្របខណ្ឌរក្សាសន្តិភាពរបស់អង្គការសហប្រជាជាតិ ការបញ្ចូលរបៀវារៈស្តីពី ស្ត្រី និង សន្តិភាព សន្តិសុខ នៅក្នុងការងារ ADMM។ កាលពីថ្មីៗនេះ ADMM បានអនុម័តឯកសារទស្សនទានចំនួនពីរ ការលើកកម្ពស់យន្តការគាំទ្រកងកម្លាំងរក្សាសន្តិភាពជាស្ត្រីអាស៊ាន។
សម្តេចពិជ័យសេនា ក៏បានលើកទឹកចិត្តចំពោះឥណ្ឌា ក្នុងការគាំទ្រ និងបង្កើនការចូលរួមជាមួយនឹងអាស៊ាននៅក្នុងវិស័យនេះ នៅពេលដែលគំនិតផ្តួចផ្តើមថ្មីនេះ ត្រូវបានអនុវត្ត។ សម្តេចពិជ័យសេនា ក៏បានវាយតម្លៃខ្ពស់ចំពោះចំណងមិត្តភាព និងការគាំទ្រគ្នាទៅវិញទៅមករវាងឥណ្ឌា និងកម្ពុជា ក្នុងការលើកកម្ពស់សន្តិភាព និងសន្តិសុខ ជាពិសេសក្នុវិស័យរក្សាសន្តិភាព និងសកម្មភាពកម្ចាត់មីន។ មានក្តីសោមនស្សរីករាយ ក្នុងការលើកទឹកចិត្ត និងការចូលរួមឲ្យកាន់តែស៊ីជម្រៅ របស់ឥណ្ឌា ជាមួយនឹងអាស៊ាន ក្នុងវិស័យកិច្ចសហប្រតិបត្តិការដទៃទៀតទ្វេភាគី តាមរយៈក្រុមការងារជំនាញ ADMM បូក។ សម្តេចពិជ័យសេនា ទៀបាញ់ បានបញ្ជាក់ថា នាពេលថ្មីៗនេះ រាជរដ្ឋាភិបាលកម្ពុជា បានសម្រេចបញ្ជូនក្រុមគ្រូបង្វឹក ដើម្បីជួយបណ្តុះបណ្តាលកងបោសសំអាតគ្រាប់មីន និងបំផ្លាញយុទ្ធភណ្ឌមិនទាន់ផ្ទុះរបស់ប្រទេសអ៊ុយក្រែន ហើយការបណ្តុះបណ្តាលនេះ នឹងធ្វើនៅប្រទេសប៉ូឡូញ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក អ៊ុន ណារាជ្យ
