ត្រូវបានជាប់ចំណាត់ថ្នាក់លេខ២ ជាអារាមមេត្រីបរិស្ថាន ក្នុងចំណោមវត្តទាំង ៣៨វត្ត នៅទូទាំងប្រទេសពីក្រសួងបរិស្ថាន បន្ទាប់ពីបានដាក់បេក្ខភាពប្រកួតប្រជែងកន្លងមក ខណៈពេលថ្មីៗនេះ ព្រះគ្រូចៅអធិការវត្តដំណាក់ បានដឹកនាំក្រុមការងារវត្ត និងព្រះរាជាគណៈថ្នាក់កិត្តិយស ព្រះគ្រូចៅអធិការវត្តមួយចំនួនក្នុងក្រុង ព្រមទាំងមន្ត្រីសង្ឃជាច្រើនអង្គក្នុងខេត្តសៀមរាប ដើម្បីនិមន្តទៅទទួលមេដាយប្រាក់ និងពានរង្វាន់អារាមមេត្រីបរិស្ថាននៅក្រសួងបរិស្ថាន ។
ព្រះធម្មវិសុទ្ធិរង្សី ឡាច ចន្ថា ព្រះរាជាគណៈថ្នាក់កិត្តិយស និងជាព្រះគ្រូចៅអធិការវត្តដំណាក់ មានសង្ឃដីកាថា ក្នុងនាមវត្តដំណាក់ ព្រះអង្គមានព្រះទ័យត្រេកអរជាខ្លាំង និងសូមអរព្រះគុណ ចំពោះព្រះសង្ឃក្នុងក្រុងសៀមរាប ដែលបានចំណាយពេលវេលាដ៏មានតម្លៃនិមន្តចូលរួមអបអរសាទរដែលវត្តដំណាក់បានទទួលពានរង្វាន់មេត្រីបរិស្ថាន នឹងសូមអរគុណដល់រដ្ឋមន្រ្តីក្រសួងបរិស្ថាន និង សហការី ដែលបានផ្ដល់កិត្តិយស និងលើកទឹកចិត្តដល់ព្រះអង្គ ព្រមទាំងអរព្រះគុណ នឹងអរគុណដល់ក្រុមការងារវត្តគ្រប់រូប ដែលបានចូលរួមខ្នះខ្នែងក្នុងការសម្អាត នឹងញែកសម្រាម់ដាក់ឲ្យដាច់ដោយឡែក ពាក់ព័ន្ធអនាម័យបរិស្ថានក្នុងទីអារាមវត្តនេះ ប៉ុន្តែសមិទ្ធផលទាំងនេះ គឺមិនមែនជារបស់ឯកជនដាច់មុខឡើយ ជាសមិទ្ធផលរួម និងជាកិត្តិយសសម្រាប់វត្តដំណាក់ និងពុទ្ធបរិស័ទ ក៏ដូចជាមុខមាត់ខេត្តសៀមរាបទាំងមូលផងដែរ ។
គួរបញ្ជាក់ផងដែរថា ការប្រកាសជ័យលាភីនេះ បានធ្វើឡើងកាលពីថ្ងៃទី២១ ខែវិច្ឆិកា ឆ្នាំ២០២២នេះ ក្នុងសិក្ខាសាលាផ្សព្វផ្សាយ និងប្រកាសជ័យលាភីអារាមមេត្រីបរិស្ថានឆ្នាំ២០២២ ក្រោមអធិបតីភាពឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ដោយមានការនិមន្ត និងអញ្ជើញចូលរួមពីព្រះមន្ត្រីសង្ឃទាំងពីរគណៈ ព្រះគ្រូចៅធិការវត្តនានា ឯកឧត្តមអគ្គនាយក តំណាងឯកឧត្តមរដ្ឋមន្រ្តីក្រសួងធម្មការ និងសាសនា ឯកឧត្តមថ្នាក់ដឹកនាំ មន្រ្តីរាជការក្រសួងបរិស្ថាន តំណាងសាសនិកឥស្លាម ជាច្រើនរូបទៀត ។
ការប្រកាសជ័យលាភីនេះ មានគោលបំណងផ្សព្វផ្សាយគោលការណ៍ណែនាំស្តីពីអារាមមេត្រីបរិស្ថាន ដែលក្រសួងបរិស្ថាន ក្រសួងធម្មការ និងសាសនា បានដាក់អនុវត្តតាំងពីឆ្នាំ២០២១ និងប្រកាសទទួលស្គាល់អារាមដែលបានជាប់ជ័យលាភីអារាមមេត្រីបរិស្ថាននៅឆ្នាំ២០២២នេះតែម្តង ហើយឆ្នាំ២០២២នេះ គឺជាឆ្នាំដំបូងដែលក្រសួងបរិស្ថាន បានសហការជាមួយក្រសួងធម្មការ និងសាសនា ដើម្បីរៀបចំចលនាប្រឡងប្រណាំង ជ្រើសរើសវត្តអារាមដែលបានអនុវត្តល្អប្រសើរលើការងារបរិស្ថាន សំដៅដល់ការប្រតិបត្តិមេត្រីភាពបរិស្ថាន និងការអប់រំផ្សព្វផ្សាយចំណេះដឹងបរិស្ថាននៅតាមសហគមន៍នានា។
សម្រាប់ការវាយតម្លៃជ័យលាភីអារាមមេត្រីបរិស្ថានឆ្នាំនេះ ក្រសួងបរិស្ថាន និងក្រសួងធម្មការ និងសាសនា បានជ្រើសរើសទីអារាមវត្តចំនួន ០៣ គឺមានវត្តស្រះកណ្តាលខ្ចាស់ ខេត្តបន្ទាយមានជ័យ ជាប់ជ័យលាភីលេខ១ , វត្តដំណាក់ខេត្តសៀមរាប ជាប់ជ័យលាភីលេខ២ និង វត្តព្រះវិហារធំ សសរ១០០ ខេត្តក្រចេះ ជាប់ជ័យលាភីលេខ៣៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
