គណ:កម្មការរៀបចំការប្រកួតកីឡាប្រដាល់គុនខ្មែរដណ្ដើមខ្សែក្រវ៉ាត់ពានរង្វាន់ សម្តេចពិជ័យសេនា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ, សហព័ន្ធកីឡាប្រដាល់គុនខ្មែរ សហការជាមួយ ស្ថានីយ៍ទូរទស្សន៍កងយោធពលខេមរភូមិន្ទប៉ុស្តិ៍លេខ៥, ភូមិឋានសំណាង, និងទទួលបានការ គាំទ្រដោយ ក្រសួងអប់រំ យុវជន និងកីឡា, គណ:កម្មាធិការជាតិរៀបចំការប្រកួតកីឡាអាស៊ីអាគ្នេយ៍ និងគណ:កម្មាធិការជាតិអូឡាំពិកកម្ពុជា ក្រុមប្រឹក្សាកីឡាកងយោធពលខេរមភូមិន្ទ បានរៀបចំព្រឹត្តិការណ៍ប្រកួតកីឡាប្រដាល់គុនខ្មែរដណ្តើមខ្សែក្រវ៉ាត់ ពានរង្វាន់ សម្តេចពិជ័យសេនា ឧបនាយករដ្ឋមន្តី រដ្ឋមន្ត្រីក្រសួងការពារជាតិ ប្រភេទទម្ងន់ ៦០ គីឡូក្រាម ដោយបានបើកការប្រកួតជ្រើសរើសគូឯកពីថ្ងៃទី១៨ ខែកញ្ញា ឆ្នាំ២០២២ កន្លងមក ហើយបានរៀបចំប្រកួតវគ្គផ្តាច់ព្រ័ត្រ នៅរាត្រីថ្ងៃទី២៤ ខែវិច្ឆិកា ឆ្នាំ២០២២ ក្រោមអធិបតីភាពដ៏ខ្ពង់ខ្ពស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៅក្នុងបរិវេណបូរី ឡាយសំណាង ក្នុងភូមិគោកត្រាច ឃុំបាគង ស្រុកប្រាសាទបាគង ខេត្តសៀមរាប ដើម្បីត្រៀមឆ្ពោះទៅព្រឹត្តិការណ៍កីឡា SEAGame ASEANParaiGame២០២៣។ លោកតែម ម៉ឺន ប្រធានសហព័ន្ធកីឡាប្រដាល់គុនខ្មែរ មានប្រសាសន៍ថា៖ ឆ្លងកាត់ការប្រកួតជាបន្តបន្ទាប់ សហព័ន្ធកីឡាប្រដាល់គុនខ្មែរ បានចម្រាញ់កីឡាករជើងខ្លាំង ៨រូប លើប្រភេទទម្ងន់ ៦០គីឡូក្រាម ដើម្បីប្រកួតប្រជែងព្រឹត្តិការណ៍ដ៏ធំនេះ សំដៅចូលរួមចំណែក ជ្រើសរើស និងពង្រឹងសមត្ថភាពកីឡាករប្រដាល់គុនខ្មែរ ដើម្បីត្រៀមលក្ខណ:ឆ្ពោះទៅកាន់ការប្រកួតកីឡា ស៊ីហ្គេមលើកទី៣២ ឆ្នាំ២០២៣ ដែលព្រះរាជាណាចក្រកម្ពុជាយើងធ្វើជាម្ចាស់ផ្ទះ។
មានប្រសាសន៍ក្នុងពិធីបិទការប្រកួត សម្តេចពិជ័យសេនា ទៀ បាញ់ មានប្រសាសន៍ថា៖ វិស័យកីឡា ក៏ដូចវិស័យដទៃទៀត បានរស់រានមានជីវិតឡើងវិញ ក្រោយថ្ងៃជ័យជម្នះ ៧មករា ១៩៧៩ ដោយវិស័យកីឡាគុនខ្មែរយើងត្រូវបានបាត់បង់ក្នុងរបបប្រល័យពូជសាសន៍ ប៉ុល ពត ។ ការរីកចម្រើននៃវិស័យកីឡាគុនខ្មែរទៅបាន ក៏យើងត្រូវអរគុណសន្តិភាព និងអរគុណនយោបាយឈ្នះឈ្នះ របស់សម្តេចតេជោ ហ៊ុន សែន នាយករដ្ឋមន្ត្រី ជាស្ថាបនិក អគ្គមគ្គុទេសក៍ឯកសន្តិភាព បានធ្វើឲ្យមានជួបជុំគ្នាប្រកបដោយសុខដុមរមនា ក្រោមដំបូលសន្តិភាពតែមួយ។ សម្តេចពិជ័យសេនា ទៀ បាញ់ ក៏បានលើកទឹកចិត្តក្រើនរំលឹកដល់ក្រុមកីឡាករទាំងអ្នកទទួលជ័យលាភី និងអ្នកមិនទទួលបានជ័យលាភី ក៏ត្រូវបង្កើនការហ្វឹកហាត់របស់ខ្លួនបន្តទៀត ក្នុងការលើកកម្ពស់គុណផលកីឡាគុនខ្មែរយើង ដែលដូនតាខ្មែរបានបន្សល់ទុកមក ហើយវិស័យក្បាច់គុនខ្មែរនេះដែរ ក៏បានកើតឡើងមានរាប់ពាន់ឆ្នាំមកហើយ ។ ជាមួយគ្នានេះ កីឡាករទាំងអ្នកឈ្នះ និងចាញ់ទាំងអស់ ត្រូវធ្វើការហ្វឹកហាត់ឲ្យបានជាប្រចាំ ដើមី្បត្រៀមលក្ខណ:ឆ្ពោះទៅចូលរួមកាន់ការប្រកួតកីឡាស៊ីហ្គេមលើកទី២៣ ឆ្នាំ២០២៣ ដែលកម្ពុជាយើងធ្វើជាម្ចាស់ផ្ទះ ក្នុងការដណ្តើមជោគជ័យ និងកិត្តិយសជូនព្រះរាជាណាចក្រកម្ពុជា នៅថ្ងៃខាងមុខនេះ។
សូមបញ្ជាក់ផងដែរ ជ័យលាភីផ្តាច់ព្រ័ត្រ ការប្រកួតប្រដាល់គុនខ្មែរដណ្តើមពានរង្វាន់សម្តេចពិជ័យសេនា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ, ចំពោះកីឡាករ ទទួលបានជោគជ័យលាភី:
-លេខ១ ទទួលបាន ខ្សែក្រវ៉ាត់១ ថវិកា ៦,០០០,០០០៛ (ប្រាំមួយលានរៀល) និងផ្ទះវីឡា ចំនួន ១ខ្នង ដែលមានទំហំដី(ទទឹង ១០ម x បណ្តោយ ២០ម)
– លេខ២ ទទួលបាន ពាន១ ថវិកា ៥,០០០,០០០៛ (ប្រាំលានរៀល) ដីទំហំ( ១០ម x ២០ម)
– លេខ៣ ទទួលបាន ពាន១, ថវិកា ៤,០០០,០០០៛ (បួនលានរៀល) ដីទំហំ( ៥ម x ២០ម)
-លេខ៤ ទទួលបាន ពាន១ ថវិកា៣,០០០,០០០៛(ប៊ីលានរៀល) ដីទំហំ( ៥មx ២០ម)៕
អត្ថបទ និងរូបភាព: លោកយូ វង្ស និងលោកស៊ាន សុផាត កែសម្រួលដោយ លីវ សុខុន!!!
