រដ្ឋបាលខេត្តសៀមរាប នៅព្រឹកថ្ងៃទី២៥ ខែវិច្ឆិកា ឆ្នាំ២០២២នេះ បានសហការជាមួយមន្ទីរបរិស្ថានខេត្ត និងរដ្ឋបាលក្រុងសៀមរាប ប្រារព្ធទិវាអនាម័យជាតិបរិស្ថាន ២៣ វិច្ឆិកា ក្រោមប្រធានបទ “មាតុភូមិយើងកាតព្វកិច្ចយើង ស្អាត និងបៃតង” និង “ទិវាសម្អាតបរិស្ថានអនាម័យបរិស្ថាន” ដើម្បីជំរុញឲ្យប្រជាពលរដ្ឋទូទៅចូលរួមថែរក្សាអនាម័យ និងបរិស្ថាន ក្នុងសហគមន៍ ចៀសផុតពីការចោលសំរាមគ្មានសណ្ដាប់ធ្នាប់។ ពិធីនេះប្រព្រឹត្តិទៅក្រោមអធិបតីភាពលោក ពិន ប្រាកដ អភិបាលរងខេត្ត ដោយយមានការចូលរួមពីថ្នាក់ដឹកនាំមន្រ្តីរាជការ មន្ទីរ-អង្គភាពនានាក្នុងខេត្ត កងកម្លាំងប្រដាប់អាវុធ ក្រុមហ៊ុនឯកជន អាជ្ញាធរក្រុង ស្រុក លោកគ្រូអ្នកគ្រូ សិស្សានុសិស្ស រួមនឹងប្រជាពលរដ្ឋជាច្រើនរូប។
មានប្រសាសន៍ក្នុងឱកាសនោះ លោក ពិន ប្រាកដ បានជំរុញដល់បណ្ដាស្ថាប័ន អាជ្ញាធរគ្រប់លំដាប់ថ្នាក់រួមនឹងប្រជាពលរដ្ឋ ត្រូវចូលរួមទាំងអស់គ្នា ក្នុងការធ្វើអនាម័យ និងថែរក្សាបរិស្ថានជាប្រចាំនៅតាមមូលដ្ឋានរបស់ខ្លួន។ ជាពិសេសស្នើឲ្យអាជ្ញាធរមូលដ្ឋាន ជាមួយអ្នកពាក់ព័ន្ធ បន្តធ្វើការអប់រំផ្សព្វផ្សាយដល់ប្រជាពលរដ្ឋ ពីការគ្រប់គ្រងទុកដាក់សំរាម និងសំណល់រឹងឲ្យបានត្រឹមត្រូវ និងមានប្រសិទ្ធភាព។ ហើយសម្រាប់ការប្រារព្ធទិវានាពេលនេះដែរ វាក៏ជាចរន្តចលករមួយ ដែលជំរុញអោយមានការផ្តើមធ្វើសកម្មភាពមេត្រីភាពបរិស្ថានចេញពីបុគ្គលម្នាក់ៗ ឲ្យចេះទទួលខុសត្រូវ ក្នុងការទុកដាក់សំរាម សំណល់រឹង ដោយមិនបោះចោលពាសវាលពាសកាលនៅតាមទីសាធារណ: ជាហេតុធ្វើអោយប៉ះពាល់ដល់សុខភាព និងសោភ័ណភាពទីក្រុង ដែលពោរពេញដោយសម្រស់ធម្មជាតិមួយនេះ ជាពិសេសគឺសេចក្តីថ្លៃថ្នូរបស់ខ្លួនឯងផ្ទាល់។
ជាមួយគ្នានោះដែរ លោកអភិបាលរងខេត្ត ក៏បានផ្តល់នូវអនុសាសន៍មួយចំនួនបន្ថែមទៀតដល់សាធារណ:ជនទូទៅ រួមនឹងអ្នកពាក់ព័ន្ធ ក្នុងការថែរក្សាបរិស្ថានរបស់យើងទាំងអស់គ្នា ក្នុងនោះរួមមាន៖ ការធ្វើអនាម័យខ្លួនឯងជាប្រចាំ, ទុកដាក់នឹងញែកសំរាមអោយត្រឹមត្រូវដាក់ក្នុងធុង, ស្រលាញ់ការពារសត្វព្រៃ និងដាំដើមឈើ ជាពិសេសត្រូវខិតខំសិក្សារៀនសូត្រផងដែរ។ ដោយឡែកបច្ចុប្បន្ននេះ ដោយសារកំណើនប្រជាជនយើងបានជួបប្រទះនូវបញ្ហាមួយចំនួន ក្នុងនោះរួមមាន៖ បញ្ហាសំរាម សំណល់រឹង រាវ នៅតាមទីប្រជុំជន ដែលមានការកើនឡើងយ៉ាងខ្លាំង គួបផ្សំនឹងប្រព័ន្ធគ្រប់គ្រងសំរាមនៅពេលបច្ចុប្បន្ននៅមានកម្រិតនៅឡើយ។ ក្នុងនោះសំណល់សំរាមមួយចំនួន ជាពិសេសសំណល់ប្លាស្ទិក ត្រូវបានប្រជាពលរដ្ឋខ្លះដុត និងខ្លះបានបោះចូលទៅក្នុងទឹក និងទីសាធារណ:បង្កគ្រោះថ្នាក់ដល់ជីវ:ចម្រុះ ដែលមនុស្សគ្រប់ៗគ្នា បាននឹងកំពុងយកចិត្តទុកដាក់។ ទន្ទឹមនឹងនេះការចូលរួមរបស់ប្រជាពលរដ្ឋគ្រប់រូប ក្នុងការលើកកម្ពស់អនាម័យ និងគុណភាពបរិស្ថាន គឺជាការចាំបាច់ និងជាវិភាគទានដ៏សំខាន់បំផុត ដើម្បីចូលរួមជាមួយរាជរដ្ឋាភិបាល ក្នុងការដោះស្រាយបញ្ហាប្រឈមទាំងនេះសំដៅការរស់នៅប្រកបដោយសុខុមាលភាព និងជីវភាពរបស់ប្រជាជនយើងនៅក្នុងខេត្តដ៏មានសក្តានុពលមួយនេះ។
គួររំលឹកថា ក្នុងឱកាសទិវាអនាម័យបរិស្ថានជាតិ ២៣ វិច្ឆិកា ឆ្នាំ២០២២នេះ បានរៀបចំការដើរសំអាតអនាម័យបរិស្ថានតាមសងខាងដងស្ទឹងសៀមរាប និងនៅតាមដងផ្លូវមួយចំនួនទៀត ក្នុងក្រុងសៀមរាប ដែលជាសារមួយបញ្រ្ជាបការយល់ដឹងដល់ប្រជាពលរដ្ឋអំពីកិច្ចគាំពារបរិស្ថាន ការគ្រប់គ្រង និងទុកដាក់សំណល់ដោយការទទួលខុសត្រូវ និងជួយពញ្ញាក់ស្មារតី ឲ្យមានការចូលរួមពីកម្លាំងពីគ្រប់ស្រទាប់វណ្ណ: ក្នុងការចូលរួមអនាម័យតាមលំនៅដ្ឋាន និងតាមទីសាធារណ: ដោយចេះទុកដាក់សំណល់ក្នុងធុងសំរាម ឲ្យបានត្រឹមត្រូវ និងការដាំដើមឈើ ដើម្បីឲ្យមានភាពបៃតងស្រស់ជាពិសេសចូលរួមកាត់បន្ថយប្លាស្ទិក ដើម្បីរួមគ្នាលើកស្ទួយសោភណ័ភាពទីក្រុង ទីប្រជុំជនឲ្យមានបរិស្ថានល្អខ្យល់អាកាសបរិសុទ្ធ ទេសភាពស្រស់ត្រកាល៕
អត្ថបទ និងរូបភាព: លោកអ៊ុន ណារាជ្យ កែសម្រួលដោយ លីវ សុខុន!!!
