អង្គការសុខភាពពិភពលោក ប្រចាំតំបន់ប៉ាស៊ីហ្វិកខាងលិច បានរៀបចំវេទិកាថ្នាក់តំបន់លើកទី៤ របស់មជ្ឈមណ្ឌលសហប្រតិបត្តិការ នៃអង្គការសុខភាពពិភពលោក ប្រចាំតំបន់ប៉ាស៊ីហ្វិកខាងលិច រយ:ពេល ២ថ្ងៃ ចាប់ពីថ្ងៃទី២៨ និង២៩ ខែវិច្ឆិកា ឆ្នាំ២០២២ នៅសណ្ឋាគារសុខាខេត្តសៀមរាប តាមរយ:ការចូលរួមដោយផ្ទាល់ និងតាមប្រព័ន្ធតំណរភ្ជាប់វីដេអូ ក្រោមអធិតីភាព ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល នៃព្រះរាជាណាចក្រកម្ពុជា និងវត្តមានលោកពិន ប្រាកដ អភិបាលរងខេត្ត តំណាងឯកឧត្តម ទៀ សីហា អភិបាលនៃគណ:អភិបាលខេត្តសៀមរាប ព្រមទាំង មន្ត្រីទទួលបន្ទុកអង្គការសុខភាពពិភពលោក ប្រចាំតំបន់ប៉ាស៊ីហ្វិកខាងលិច តំណាងអង្គការសុខភាពពិភពលោកប្រចាំកម្ពុជា និងវត្តមានចូលរួមពី ឯកឧត្តម លោកជំទាវ លោក លោកស្រី ក្រសួងសុខាភិបាល និងមន្ត្រីពាក់ព័ន្ធមកពីបណ្តាប្រទេសក្នុងតំបន់ជាច្រើនផងដែរ។
ឯកឧត្តមសាស្ត្រាចារ្យ ម៉ម ប៊ុនហេង មានប្រសាសន៍ថា៖ យើងមានមោទនភាពក្រៃលែងដែលកម្ពុជា ជាប្រទេសគំរូសម្រាប់ប្រទេសមានធនធានតិច និងប្រទេស ដែលទើបជៀសផុតពីសង្គ្រាមអាចសម្រេចគោលដៅសុខភាព បានយ៉ាងឆាប់រហ័ស។ វឌ្ឍនភាព និងគំនិតច្នៃប្រឌិតក្នុងការផ្តល់ហិរញ្ញប្បទានសុខាភិបាល និងការផ្តល់សេវា បានចូលរួមចំណែកដល់ការសម្រេចបានគោលដៅអភិវឌ្ឍន៍សហស្សវត្សផ្នែកសុខាភិបាល ដែលធ្វើឱ្យកម្ពុជាក្លាយទៅជាប្រទេសមួយ ក្នុងចំណោមប្រទេសមួយចំនួនតូច នៅលើពិភពលោកដែលសម្រេចបាននូវសមិទ្ធផលនេះ ដោយមានជំនួយបច្ចេកទេស និងហិរញ្ញវត្ថុពីដៃគូអភិវឌ្ឍន៍ រាជរដ្ឋាភិបាលកម្ពុជា កំពុងធ្វើឱ្យប្រសើរឡើងយ៉ាង ឆាប់រហ័សនូវហេដ្ឋារចនាសម្ព័ន្ធ បន្តការខិតខំប្រឹងប្រែង ដើម្បីលើកកម្ពស់គុណភាពសេវាសុខាភិបាល ការដាក់បញ្ចូលកម្មវិធីការផ្តល់ហិរញ្ញប្បទានផ្អែកលើលទ្ធផលការងារ និងការខិតខំពង្រឹងបទប្បញ្ញត្តិនានា។
ឯកឧត្តម រដ្ឋមន្ត្រី បន្តថា៖ ការិយាល័យតំណាងរបស់ WHO ប្រចាំកម្ពុជា ត្រូវបានបង្កើតឡើងក្នុងឆ្នាំ១៩៩១ ក្នុងការគាំពារលើវិស័យសុខាភិបាលនេះ។ ចាប់តាំងពី ពេលនោះមក WHO បាននឹងកំពុងសហការជាមួយរាជរដ្ឋាភិបាលកម្ពុជា តាមរយ:ក្រសួងសុខាភិបាល ដើម្បីលើកកម្ពស់សុខភាពប្រជាពលរដ្ឋ ដោយគាំទ្រដល់ការអភិវឌ្ឍន៍ និងការអនុវត្តគោលនយោបាយសុខភាពយ៉ាងមាំ និងផ្តល់ប្រឹក្សាបច្ចេកទេសក្នុងការពង្រឹងប្រព័ន្ធសុខាភិបាលសាធារណ: និងការផ្ដល់សេវាសុខភាព ប្រកបដោយគុណភាព សមធម៌ និងចីរភាព។ យុទ្ធសាស្ត្រសហប្រតិបត្តិការសម្រាប់ប្រទេស របស់ WHO ត្រូវបានធ្វើឱ្យមានសង្គត្តិភាពជាមួយផែនការយុទ្ធសាស្ត្រសុខាភិបាលរបស់រាជរដ្ឋាភិបាលកម្ពុជា ដើម្បីឈានទៅសម្រេចបានការគ្របដណ្តប់សុខភាពជាសកល។
ឯកឧត្តម ក៏បានសង្កត់ធ្ងន់ផងដែរថា៖អង្គការសុខភាពពិភពលោក ប្រចាំប្រទេសកម្ពុជា បាននឹងកំពុងជួយឧបត្ថម្ភ គាំទ្រវិស័យសុខាភិបាលនៅកម្ពុជា ទាំងបច្ចេកទេស និងថវិកា ជាពិសេសក្នុងអំឡុងពេលនៃការរាតត្បាតដោយជំងឺកូវីដ-១៩ WHO បានផ្ដល់នូវការគាំទ្រ ទាំងការពង្រឹងសមត្ថភាពធនធានមនុស្ស ការគាំទ្រផ្នែកហិរញ្ញវត្ថុ និងការផ្គត់ផ្គង់ ដូចជា ៖ ការត្រៀមរៀបចំ និងឆ្លើយតបចំពោះការរាតត្បាតជាសកលនៃជំងឺកូវីដ-១៩ និងការពង្រឹងសមត្ថភាពស្នូលសម្រាប់គ្រប់គ្រងគ្រោះអាសន្ន និងការគំរាមកំហែងសន្តិសុខសុខភាព ការធានាសេវាសុខភាពជាសារវ័ន្ត អំឡុងពេលរាតត្បាតជំងឺជាសកល ដូចជាការលុបបំបាត់ជំងឺគ្រុនចាញ់ជំហានចុងក្រោយ ជំងឺរបេង ជំងឺអេដស៍ និងជំងឺរលាកថ្លើម ជំងឺដែលអាចបង្ការបានដោយវ៉ាក់សាំង ជំងឺមិនឆ្លង និងការលើកកម្ពស់សុខភាព ការគ្របដណ្ដប់សុខភាពជាសកល តាមរយ:ការផ្តោតឡើងវិញទៅលើការថែទាំសុខភាពបឋម។ បន្ថែមពីនេះ មជ្ឈមណ្ឌលសហប្រតិបត្តិការរបស់អង្គការសុខភាពពិភពលោក បានផ្ដល់ការគាំទ្រទាំងដោយផ្ទាល់ និងដោយប្រយោលដល់ប្រទេសជាច្រើន ក្នុងតំបន់ និងបានរួមចំណែកដល់ការងារសំខាន់ៗ របស់អង្គការសុខភាពពិភពលោកនៅក្នុងតំបន់របស់យើង និងនៅទូទាំងពិភពលោក ដូចជាមជ្ឈមណ្ឌលសហប្រតិបត្តិការរបស់អង្គការសុខភាពពិភពលោកសម្រាប់ការស្រាវជ្រាវ និងបង្អែក (WHO Collaborating Centre for Reference and Research) នៅប្រទេសអូស្ត្រាលី បានផ្ដល់ការបណ្តុះបណ្តាល អំពីផ្តាសាយធំទៅដល់បុគ្គលិកមន្ទីរពិសោធន៍កម្ពុជា។ WCC នៅប្រទេសជប៉ុន បានផ្ដល់ជំនួយផ្នែកបច្ចេកទេសដល់មន្ទីរពិសោធន៍បង្អែកសកល សម្រាប់ជំងឺគ្រុនស្វិតដៃជើង និងការធ្វើតេស្តរោគវិនិច្ឆ័យ សម្រាប់ប្រទេសនានារួមទាំងប្រទេសកម្ពុជាផងដែរ៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
