នាព្រឹកថ្ងៃទី២៨ ខែវិច្ឆិកា ឆ្នាំ២០២២នេះ ឯកឧត្តម ឧត្តមសេនីយ៍ឯក លឹម ផាន់ភារ: ប្រធាននាយកដ្ឋានកណ្តាលសណ្ដាប់ធ្នាប់សាធារណ:តំណាងដ៏ខ្ពង់ខ្ពស់ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានអញ្ជើញជាអធិបតីប្រកាសចូលកាន់មុខតំណែង លោកវរសេនីយ៍ទោ ទី សុខឡែន ជាប្រធានអង្គភាពនគរបាលទេសចរណ៍ ប្រចាំខេត្តសៀមរាប ជំនួសលោកវរសេនីយ៍ឯក សួង សេងគីម ដែលត្រូវផ្លាស់ប្តូរទៅកាន់តួនាទីថ្មី។ ពិធីនេះក៏មានការអញ្ជើញជាអធិបតីដោយលោក សុខ ថុល អភិបាលរងខេត្ត រួមនឹងវត្តមានប្រតិភូនគរបាលជាតិ ថ្នាក់ដឹកនាំមន្ទីរអង្គភាពពាក់ព័ន្ធ កងកម្លាំងទាំង៣ អភិបាល អភិបាលរង ក្រុង ស្រុក រួមនឹងមន្ត្រីនគរបាលទេសចរណ៍ជាច្រើនរូបទៀតផងដែរ។
ក្នុងឱកាសនោះ លោក សុខ ថុល អភិបាលរងខេត្ត បានសម្ដែងនូវការអបអរសាទរ ចំពោះលោកប្រធានអង្គភាពនគរបាលទេសចរណ៍ ប្រចាំខេត្តសៀមរាប ដែលទទួលបានមុខតំណែង និងតួនាទីភារកិច្ចថ្មី ដែលកន្លងមក អង្គភាពនេះបានខិតខំក្នុងការបំពេញការងារដោយយកចិត្តទុកដាក់ រហូតថ្នាក់ដឹកនាំមានទំនុកចិត្តផ្ដល់តួនាទីបន្ថែមនាពេលនេះ។ ជាមួយគ្នានេះ លោកក៏បានណែនាំដល់ថ្នាក់ដឹកនាំ និងមន្ត្រីទាំងអស់ នៃអង្គភាពនគរបាលទេសចរណ៍ខេត្តសៀមរាប ត្រូវបន្តពង្រឹង និង សហការផ្តល់សេវា និងអនុវត្តការងារសន្តិសុខដល់ភ្ញៀវទេសចរ ពោលគឺត្រៀមបង្កលក្ខណ:ងាយស្រួលជូនភ្ញៀវទេសចរ រួមនឹងថ្នាក់ដឹកនាំជាន់ខ្ពស់ជាតិ និងអន្តរជាតិ ដែលចេញចូលមកកាន់ខេត្តសៀមរាបយើងឲ្យបានល្អប្រសើរ។ ជាពិសេសត្រូវពង្រឹងបន្ថែមនូវរាល់វិន័យការងារ រក្សាសាមគ្គីភាព ឯកភាព ប្រកាន់ខ្ជាប់នូវវិន័យ ក្រមសីលធម៌ វិជ្ជាជីវ: បង្កើនកិច្ចសហការជាមួយនឹងអាជ្ញាធរមានសមត្ថកិច្ច ក្នុងភូមិសាស្ត្រទូទាំងខេត្ត រួមនឹងភាគគីពាក់ព័ន្ធផ្សេងៗទៀតផងដែរ។
មានប្រសាសន៍ក្នុងឱកាសនោះដែរ ឯកឧត្តម ឧត្តមសេនីយ៍ឯក លឹម ផាន់ភារ: បានណែនាំ និងក្រើនរំលឹកដល់ប្រធានអង្គភាពថ្មី ដែលទើបប្រកាសចូលកាន់តំណែង ត្រូវយកចិត្តទុកដាក់ ក្នុងការអនុវត្តការងារ និងត្រូវពង្រឹងសាមគ្គីភាពផ្ទៃក្នុង ពង្រឹងការដឹកនាំបញ្ជា សំដៅជំរុញប្រសិទ្ធភាពការងារឲ្យកាន់តែល្អប្រសើរបន្ថែមទៀត។ បន្ថែមពីនេះ ឯកឧត្តម ក៏ដាក់បទបញ្ជាដល់មន្ដ្រីទាំងអស់ត្រូវចូលរួមទប់ស្កាត់ការប្រព្រឹត្តបទល្មើស ការជួញដូរ និងការប្រើប្រាស់គ្រឿងញៀន, ការជួញដូរ និងការបង្ខាំងមនុស្ស, ការជួញដូរកុមារ ការធ្វើអាជីវកម្មផ្លូវភេទ ការផ្សព្វផ្សាយរូបភាពអាសអាភាស, ការពារបេតិកភណ្ឌវប្បធម៌ប្រវត្តិសាស្ដ្រ សម្បត្តិធម្មជាតិ និងការប្រព្រឹត្តបទល្មើសព្រហ្មទណ្ឌផ្សេងៗទៀត។ ត្រូវចេះសហការជាមួយសមត្ថកិច្ចពាក់ព័ន្ធ ដើម្បីអនុវត្តការចាប់ខ្លួន ឃាត់ខ្លួនជនល្មើស ក្នុងបទល្មើសជាក់ស្ដែង អនុវត្តសាលក្រម សាលដីការបស់តុលា និងអយ្យការគ្រប់ថ្នាក់ទាំងអស់។
ឯកឧត្តម ឧត្តមសេនីយ៍ឯក ក៏បានលើកឡើងនូវតួនាទីភារកិច្ចរបស់នគរបាលទេសចរណ៍ ដោយក្នុងនោះមន្ត្រីនគរបាលត្រូវតែធានាឲ្យបាននូវបេសកកម្មក្នុងការការពារ ថែរក្សាសុវត្ថិភាពភ្ញៀវទេសចរណ៍ ដែលចូលមកខេត្តសៀមរាប ឱ្យបានល្អ ដើម្បីផ្តល់នូវភាពកក់ក្តៅ និងទំនុកចិត្តដល់ភ្ញៀវទេសចរណ៍ទាំងជាតិ-អន្តរជាតិ ដែលមកលេងកំសាន្តនៅតាមតំបន់ទេសចរណ៍ក្នុងទឹកដីដ៏អច្ឆរិយ:មួយនេះ។ ដោយឡែកដើម្បីបង្កភាពងាយស្រួលដល់ភ្ញៀវទេសចរណ៍ ត្រូវការការពារសន្តិសុខ ក្នុងខេត្ត ក៏ដូចជាពាក់ព័ន្ធជនបរទេស ដែលប្រព្រឹត្តបទល្មើសគ្រប់រូបភាពផ្សេងៗ នគរបាលទេសចរណ៍ ក៏ត្រូវតែមានការស្រង់ស្ថិតិ ហើយធ្វើរបាយការណ៍ទៅថ្នាក់លើឲ្យបានជាប់ជាប្រចាំ ដោយមានកំណត់ពីអត្តសញ្ញាណ និងសញ្ជាតិជនបរទេស ដែលបានប្រព្រឹត្តបទល្មើស ដើម្បីធ្វើយ៉ាងណាផ្តល់ភាពកក់ក្តៅ ក៏ដូចការពារសុវត្ថិភាពជូនភ្ញៀវទេសចរណ៍ដទៃទៀត៕
អត្ថបទ និងរូបភាព: លោកអ៊ុន រាជ្យ កែសម្រួលដោយ លីវ សុខុន!!!
