កាលពីថ្ងៃទី២៨ ខែវិច្ឆិកា ឆ្នាំ២០២២នេះ រដ្ឋបាលឃុំចំនួន៤ គឺឃុំត្រីញ័រ, ឃុំរើល, ឃុំល្វា និងឃុំខ្នាត ក្នុងស្រុកពួក ខេត្តសៀមរាប ធ្វើការបើកដេញថ្លៃផ្លូវចំនួន ៤ខ្សែ នៅតាមឃុំនីមួយៗ របស់គណ:កម្មការលទ្ធកម្មឃុំទាំង៤ និងអាជ្ញាធរពាក់ព័ន្ធជាច្រើននាក់។ កិច្ចលទ្ធកម្មគម្រោងមូលនិធិឃុំឆ្នាំ២០២២ គឺចាប់ផ្តើមទទួលសំណើរដេញថ្លៃនៅម៉ោង ០៩:០០នាទីព្រឹក និងពេលវេលាឈប់ទទួលសំណើរដេញថ្លៃនៅម៉ោង ០៩:១០នាទីព្រឹក (ដែលមានរយ:ពេលទទួលសំណើរដេញថ្លៃ១០នាទី) ទើបឈប់ទទួលសំណើរដេញថ្លៃ ក្នុងនោះ ក្រុមហ៊ុនបានដាក់សំណើរដេញថ្លៃគម្រោងមូលនិធិឃុំឆ្នាំ២០២២ គឺឃុំត្រីញ័រ ត្រូវបានទទួលសំណើរដេញថ្លៃចំនួន ៩ក្រុមហ៊ុន, ឃុំរើល ទទួលបានសំណើរ ៨ក្រុមហ៊ុន, ឃុំល្វា ទទួលបានសំណើរដេញថ្លៃចំនួន ៩ក្រុមហ៊ុន និងឃុំខ្នាត ទទួលបានសំណើរដេញថ្លៃចំនួន ៦ក្រុមហ៊ុនផងដែរ។ បន្ទាប់មកគណ:កម្មការលទ្ធកម្មទាំង ៤ឃុំ បានធ្វើការបើកស្រង់តម្លៃដាក់លើក្រដាស់ផ្ទាំងឆាតដែលក្រុមហ៊ុននីមួយៗ បានដាក់ក្នុងសំណើរដេញថ្លៃ ហើយគណ:កម្មការលទ្ធកម្មឃុំបានពិនិត្យ និងវាយតម្លៃទៅលើសំណើររបស់ក្រុមហ៊ុននីមួយៗ ដោយមានការចូលរួមពីតំណាងទីចាត់ការផែនការ និងវិនិយោគខេត្ត មន្ត្រីបច្ចេកទេសប្រចាំស្រុកពួក និងការិយាល័យផែនការ និងគាំទ្រឃុំ សង្កាត់ នៃរដ្ឋបាលស្រុកពួក ក្នុងការបើកសំណើដេញថ្លៃនោះ ក៏មានការចូលរួមពីសំណាក់អ្នកសារព័ត៌មានមួយចំនួនដែរ។
ទន្ទឹមនឹងនោះ ក៏មានមតិគាំទ្រចំពោះការដេញថ្លៃគម្រោងរបស់ថ្នាក់មូលដ្ឋាន ដែលមានឃុំខាងលើបានដំណើរការល្អប្រសើរទៅតាមគោលការរបស់សៀវភៅភីមរបស់ឃុំសង្កាត់។ យើងសង្កេតឃើញថា គណ:កម្មការបានធ្វើត្រឹមត្រូវ មិនហួសម៉ោងកំណត់ មិនមានការលាក់លៀមខ្សឹបខៀវ ក្នុងការកេងប្រវ័ញ្ចថវិការដ្ឋនោះទេ ពោលគឺតម្លាភាព យុត្តិធម៌ ស្របទៅតាមច្បាប់ តាមគោលការណ៍ណែនាំរបស់រដ្ឋត្រឹមត្រូវ។ ជាមួយគ្នានោះ លោក ភួង មករា ប្រធានគណ:កម្មការលទ្ធកម្មឃុំរើល បានបង្ហាញថា ក្រោយពីយើងបានពិនិត្យធ្វើការវាយតម្លៃរួចមក ឃើញថា សំណើដេញថ្លៃនីមួយៗ គឺមានសុពលភាពគ្រប់គ្រាន់ ដែលអាចទទួលយកបាន ហើយគណ:កម្មលទ្ធកម្មឃុំ បានធ្វើការប្រកាសលទ្ធផលដល់ក្រុមហ៊ុនទាំងនោះ ដែលទទួលបានជោគជ័យ ក្នុងការដាក់សំណើដេញថ្លៃនេះ ។
គណ:កម្មការលទ្ធកម្មឃុំទាំងអស់នៅក្នុងកិច្ចដំណើរការ នៃការអនុវត្តនីតិវិធីកិច្ចលទ្ធកម្ម ចាប់តាំងពីពេលដំណើរការរហូតដល់ការប្រកាសលទ្ធផល នៃការដេញថ្លៃ គឺពុំមានបាតុភាពអសកម្ម ឬមិនប្រក្រតីឡើយ។ លោក ឡឹក លន ប្រធានគណ:កម្មការលទ្ធកម្មឃុំខ្នាត បានលើកឡើងផងដែរថា ពាក់ព័ន្ធនឹងការពិនិត្យរបស់គណ:កម្មការលទ្ធកម្មឃុំ និងការអនុត្តនីតិវិធីលទ្ធកម្ម ជាទូទៅយើងតែងតែអនុវត្តស្ថិតនៅក្នុងអគារសាលាឃុំតែប៉ុណ្ណោះ មិនមែនកន្លែងដ៏ទៃផ្សេងឡើយ។ ប្រសិនបើត្រួតពិនិត្យឃើញថា អ្នកទទួលការអនុវត្តមិនត្រឹមត្រូវទៅតាមលក្ខណ:បច្ចេកទេសទេ គឺតម្រូវអោយអ្នកទទួលការអនុវត្តនោះត្រូវធ្វើឡើងវិញតាមលក្ខណ:បច្ចេកទេស ដែលបានចុះក្នុងកិច្ចសន្យាទើបរដ្ឋបាលឃុំសម្រេចទូទាត់ថវិកាជូនដល់អ្នកអនុវត្តគម្រោងឬអ្នកទទួលការដែលបានអនុវត្តនោះ៕
អត្ថបទ និងរូបភាព: លោក ស៊ាន សុផាត កែសម្រួលដោយ លីវ សុខុន!!!
