ក្រោមការសម្របសម្រួល របស់មជ្ឈមណ្ឌលជាតិគាំពារមាតា និងទារក និងកម្មវិធីអាហារូបត្ថម្ភជាតិនៃអង្គការទស្សនៈពិភពលោក នាថ្ងៃទី២៩ ខែវិច្ឆិកា ឆ្នាំ២០២២ គម្រោង “មណ្ឌលសុខភាពស្រលាញ់ទារក និងការថែទាំព្យាបាលបញ្ហាកង្វះអាហារូបត្ថម្ភស្រួចស្រាល់” ត្រូវបានដាក់ឱ្យដំណើរសាកល្បងរយៈពេលមួយឆ្នាំ ដែលស្ថិតនៅតាមមណ្ឌលសុខភាពចំនួន៨ នៅខេត្តសៀមរាប។
មណ្ឌលសុខភាពចំនួន ៨ ដែលទទួលបានគម្រោងនោះរួមមាន ការិយាល័យស្រុកប្រតិបត្តិស្រុកអង្គរជុំ មណ្ឌលសុខភាពក្នុងស្រុកពួក និងវ៉ារិន។ គម្រោងនេះដែរ មានគោលបំណងធ្វើឱ្យប្រសើរឡើងនូវអត្រាបំបៅកូនដោយទឹកដោះម្តាយ និងលើកកម្ពស់សុខុមាលភាពកុមារ តាមរយៈការកំណត់អត្តសញ្ញាណ ការបញ្ជូនបន្ត និងការតាមដានកុមារដែលកង្វះអាហារូបត្ថម្ភស្រួចស្រាល់។ ទន្ទឹមនេះ គម្រោងក៏នឹងរួមចំណែកដល់ផែនការសកម្មភាពជាសកលស្តីពីការកាត់បន្ថយភាពស្គមស្គាំងរបស់កុមារ និងការអនុវត្តគោលការណ៍ណែនាំបណ្តោះអាសន្នស្តីពីការតាមដាន និងលើកកម្ពស់ការលូតលាស់របស់កុមារអាយុក្រោម ៥ឆ្នាំនៅកម្ពុជា ដែលក្រសួងសុខាភិបាលទើបប្រកាសដាក់ឲ្យប្រើប្រាស់កាលពីពេលថ្មីៗនេះ។
ថ្លែងក្នុងឱកាសនោះ លោកស្រី ម៉ននី រង្សី អភិបាលរងខេត្តសៀមរាប បង្ហាញថា មានហេតុផលជាច្រើន ដែលបណ្តាលឱ្យការអនុវត្តការបំបៅដោយទឹកដោះម្តាយមានការធ្លាក់ចុះ រួមមាន៖ ការធ្វើចំណាកស្រុក ដើម្បីស្វែងរកឱកាសការងារ កង្វះខាតចំណេះដឹងពីការបំបៅកូនដោយទឹកដោះម្តាយ ទំនៀមទម្លាប់ វប្បធម៌ ការខ្វះខាតការគាំទ្រពីសមាជិកគ្រួសារ និងការរីករាលដាល នៃការផ្សព្វផ្សាយលក់ផលិតផលម្សៅទឹកដោះគោ ជំនួសទឹកដោះម្តាយ។
លោកស្រី ម៉ននី រង្សី អភិបាលរងខេត្ត បានបង្ហាញជំហរគាំទ្រការដាក់ឱ្យអនុវត្តសាកល្បងនូវគម្រោង «មណ្ឌលសុខភាពស្រឡាញ់កុមារ» ក្នុងខេត្តសៀមរាបនាពេលនេះ ដែលគម្រោងនេះ ពិតជាមានសារៈសំខាន់ណាស់ សម្រាប់កុមារនៅតាមបណ្ដាស្រុកដែលពុំមានអាហារូបត្ថម្ភគ្រប់គ្រាន់។ លោកស្រី សង្ឃឹមថា ក្រសួងសុខាភិបាល ក៏ដូចអង្គការទស្សនៈពិភពលោក នឹងពង្រីកគោលដៅបន្ថែមទៀត ក្នុងភូមិសាស្រ្តខេត្តសៀមរាប នាពេលខាងមុខដ៏ខ្លី។
គួរបញ្ជាក់ថា តាមរយៈគំនិតផ្តួចផ្តើមគម្រោងសាកល្បងនេះ នឹងផ្ដល់អត្ថប្រយោជន៍ដល់ ទារកទើបកើតជាង ២០០០នាក់ ស្រ្តីមានផ្ទៃពោះជាង ៣០០០នាក់ និងកុមារមានអាយុក្រោម ៥ឆ្នាំ ដែលមានបញ្ហាកង្វះអាហារូបត្ថម្ភស្រួចស្រាល់នៅក្នុងតំបន់គោលដៅខាងលើ។ មិនតែប៉ុណ្ណោះ គម្រោង ក៏នឹងជួយលើកកម្ពស់គុណភាពសេវានៅមណ្ឌលសុខភាពចំនួន ៨នៅខេត្តសៀមរាបផងដែរ។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
