នៅថ្ងៃទី៣០ ខែវិច្ឆិកា ឆ្នាំ២០២២ សិក្ខាកាម មានជំនាញចម្អិនម្ហូបអាហារ មកពីភោជនីយដ្ឋាន និងសណ្ឋាគារមួយចំនួនក្នុងខេត្តសៀមរាប សរុប២៣រូប បានចូលរួមវគ្គបណ្ដុះបណ្ដាល“ជំនាញចុងភៅ ម្ហូបបែបចិន” ក្រោមកិច្ចសហការរវាងក្រសួងទេសចរណ៍ និងគម្រោងភាពជាដៃគូ ILO-China។
លោក Yutong Liu នាយកគម្រោង និងជាអ្នកសម្របសម្រួលគម្រោងភាពជាដៃគូ ILO-China បង្ហាញថា គម្រោងអភិវឌ្ឍន៍ជំនាញ ILO-China មានគោលបំណងធ្វើឱ្យប្រសើរឡើង នូវលទ្ធភាពការងាររបស់បុគ្គលិក កម្មករ នយោជិត និងបង្កើនផលិតភាពរបស់សហគ្រាស តាមរយៈការអភិវឌ្ឍជំនាញ និងការកសាងសមត្ថភាពស្ថាប័ន។ ជាកម្មវិធីទាំងអស់នោះ វាផ្តោតលើការបណ្តុះបណ្តាលជំនាញ គុណវុឌ្ឍិជំនាញ និងស្តង់ដារសមត្ថភាព ការអភិវឌ្ឍន៍កម្មវិធីសិក្សាតាមរយៈបណ្តាញ និងការបង្កើតសម្ព័ន្ធភាពរវាងប្រទេសពាក់ព័ន្ធ រដ្ឋសមាជិកអាស៊ាន និងប្រទេសចិន។
អញ្ជើញចូលរួមតាមប្រព័ន្ធវីដេអូ លោក Lin Lin អនុប្រធាននាយកដ្ឋានធនធានមនុស្ស និងសុវត្ថិភាពសង្គម នៃខេត្តហៃណាន សាធារណៈរដ្ឋប្រជាមានិតចិន លើកឡើងថា វប្បធម៌ និងម្ហូបអាហារចិនមានប្រវត្តិល្បីល្បាញយូរលង់ណាស់មកហើយ មកដល់ពេលនេះនៅខេត្តហៃណានមានម្ហូបជាង១០០០មុខ ក្នុងនោះមានទាំងម្ហូបផ្សំគ្រឿងពីមើមថ្នាំបុរាណទៀតផង ដែលអាចជាថ្នាំព្យាបាល មានរសជាតិឆ្ងាញ់ នាំឱ្យដំណេកស្កប់ស្កល់ មានអាយុយ៉ឺនយូរ។ បន្ទាប់ពីវគ្គបណ្ដុះបណ្ដាលនេះ លោកសង្ឃឹមថា ចុងភៅប្រទេសចិន នឹងទទួលបានការចែករំលែកបទពិសោធ ពីការចម្អនម្ហូបបែបខ្មែរត្រឡប់មកវិញនាពេលខាងមុខ ដើម្បីបង្ហាញពីចំណងមិត្តភាព ជាភាតរៈរវាងកម្ពុជានិងចិន។
ព័ត៌មានជាតិ ថ្មីៗ
ក្នុងនាម ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ ឯកឧត្តម ប៉ាក់ សុខុម រដ្ឋលេខាធិការក្រសួង និងជាប្រធាន គណៈកម្មាធិការដឹកនាំ ហូកា នៃក្រសួងទេសចរណ៍កម្ពុជា បានចាត់ទុកកិច្ចសហការរៀបចំវគ្គបណ្តុះបណ្តាលនេះ ថាពិតជាបង្ហាញអំពីកិច្ចសហការយ៉ាងជិតស្និតរវាងក្រសួងទេសចរណ៍ និងអង្គការ ILO។ ហើយមកដល់បច្ចុប្បន្នតាមរយៈគម្រោងភាពជាដៃគូ ILO-China យើងបានពង្រីកទំនាក់ទំនង ផ្លាស់ប្តូរចំណេះដឹង និងបទពិសោធន៍បន្ថែមទៀត ជាមួយមហាវិទ្យាល័យបច្ចេកទេស នៃទីក្រុងហៃខូវ ប្រទេសចិន ក៏ដូចជាភ្ជាប់ទំនាក់ទំនងជាមួយសាលាបដិសណ្ឋារកិច្ច និងទេសចរណ៍នៅខេត្តសៀមរាប សាលាបណ្តុះបណ្តាលវិជ្ជាជីវៈទេសចរណ៍ ស្ពូន សាលាសណ្ឋាគារ សាលាបាយ សាលាសណ្ឋានិងទេសចរណ៍ ប៉ូលឌុយប្រ៊ូល និងសាលាបណ្តុះបណ្តាលវិជ្ជាជីវៈទេសចរណ៍ Feeding Dream ផងដែរ។
ឯកឧត្តម បានបង្ហាញការគាំទ្រយ៉ាងពេញទំហឹងចំពោះកិច្ចសហប្រតិបត្តិការត្បូង-ត្បូង ដែលអនុវត្តគម្រោងដោយកម្មវិធីភាពជាដៃគូ ILO-China សំដៅពង្រឹងកិច្ចសហការជាពិសេសលើការពង្រឹងជំនាញវិជ្ជាជីវៈ ដែលជាមុំដ៏សំខាន់របស់គោលដៅប្រកបដោយនិរន្តរភាព (Sustainable Development Goal) ទី ៨ ផ្តោតលើកំណើនសេដ្ឋកិច្ច និងការងារសមរម្យ (Decent Work and Economic Development)។ ហើយកម្មវិធីនេះ ក៏ត្រូវនឹងកាលៈទេសៈបច្ចុប្បន្នសម្រាប់ស្តារឡើងវិញនូវជំនាញវិជ្ជាជីវៈក្រោយវិបត្តិជំងឺកូវី-១៩ សំដៅជំរុញបង្កើតឱកាសការងារ និងផលិតភាពការងារក្នុងសកលភាវូបនីយកម្មសេដ្ឋកិច្ចពិភពលោក និងភាពធននឹងវិបត្តិជាសកលនានាដែលកំពុងកើតមានផងដែរ។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
