ក្នុងពិធីចុះអនុស្សរណៈលើកកម្ពស់វិស័យទេសចរណ៍ប្រកបដោយនិរន្តរភាព និងភាពឆ្លាតវៃ រវាងសមាគមក្លឹបទេសចរណ៍សៀមរាប ហៅកាត់ថា“S.T.C” និងក្រុមហ៊ុន Nippon Koei Co.,Ltd ហៅកាត់ថា “NK” និង ក្រុមហ៊ុន SOKEN ហៅកាត់ថា “SOKEN” និងក្រុមហ៊ុន Haystack Labs Studio Co., Ltdu ហៅកាត់ថា “HAYSTACK” នាព្រឹកថ្ងៃទី៣០ ខែវិច្ឆិកា ឆ្នាំ២០២២នេះថា ឯកឧត្តម ទៀ សីហា អភិបាលខេត្តសៀមរាប មានប្រសាសន៍ថា ក្រុងសៀមរាប-អង្គរ គឺជាទឹកដីសម្បត្តិបេតិកភណ្ឌពិភពលោកដ៏អស្ចារ្យ និងពោរពេញទៅដោយរមណីយដ្ឋានវប្បធម៌ប្រវត្តិសាស្រ្តធម្មជាតិដ៏ច្រើនសន្ធឹកសន្ធាប់ ដែលបានជម្រុញឱ្យតំបន់នេះ ក្លាយជាទិសដៅទេសចរណ៍ដ៏ទាក់ទាញសម្រាប់ភ្ញៀវទេសចរជាតិ-អន្តរជាតិគ្រប់មជ្ឈដ្ឋានជុំវិញពិភពលោក។ វិស័យទេសចរណ៍ ត្រូវបានរាជរដ្ឋាភិបាលទទួលស្គាល់ថាជាផ្នែកដ៏សំខាន់នៃសេដ្ឋកិច្ចបៃតង(មាសបៃតង)ហើយចំណូលនៃវិស័យនេះ ត្រូវបានចាត់បញ្ចូលភ្លាមៗទៅក្នុងចរន្តសេដ្ឋកិច្ចជាតិ ដែលរួមចំណែកជំរុញដល់កំណើនផលិតផលក្នុងស្រុកសរុប។
ឯកឧត្តមអភិបាលខេត្ត បន្តថា ក្រោមការដឹកនាំដ៏ត្រឹមត្រូវ និងឈ្លាសវៃប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលជានិច្ចជាកាលសម្តេចតែងតែយកចិត្តទុកដាក់ដឹកនាំគាំទ្រ និងជម្រុញការអភិវឌ្ឍទេសចរណ៍សម្រេចបានជោគជ័យជាបន្តបន្ទាប់ តាមរយៈការដាក់ចេញនូវគោលនយោបាយ វិធានការ ផែនការ និងយុទ្ធសាស្ត្រជំរុញការអភិវឌ្ឍទេសចរណ៍ ពិសេសគោលនយោបាយបើកចំហរជើងមេឃ និងយុទ្ធសាស្ត្រចតុកោណរបស់រាជរដ្ឋាភិបាលកម្ពុជាផងនោះ បានប្រែក្លាយខេត្តសៀមរាបឲ្យទៅជាតំបន់ទេសចរណ៍ដែលមានតុល្យភាព និងនិរន្តរភាព ហើយប្រកបដោយគុណភាពខ្ពស់ និងជំរុញល្បឿននៃភាពរីកចម្រើនរបស់វិស័យទេសចរណ៍ខេត្តសៀមរាប ឆ្ពោះទៅមុខគួរឱ្យកត់សម្គាល់ពីមួយថ្ងៃទៅមួយថ្ងៃ។
ស្របពេលជាមួយគ្នានេះដែរ អាជ្ញាធរខេត្តបាននិងកំពុងពង្រឹង និងពង្រីកវិសាលភាព នៃការបម្រើសេវាកម្មទេសចរណ៍ខេត្តរបស់ខ្លួនឱ្យកាន់តែល្អប្រសើរ តាមរយៈការកសាងហេដ្ឋារចនាសម្ព័ន្ធ ផ្លូវថ្នល់ ស្ពាន ការផ្គត់ផ្គង់អគ្គិសនី ប្រព័ន្ធទឹកស្អាត ភ្លើងបំភ្លឺផ្លូវសាធារណៈ ការកែលម្អសោភ័ណភាព និងតំបន់ក្នុងក្រុងឱ្យកាន់តែមានភាពស្រស់បំព្រង រស់រវើកពោរពេញទៅដោយភាព ស្អាតតាមទីនានា ដូចជា ផ្លូវថ្នល់ រុក្ខវិថី និងស្ទឹង ដែលសក្តិសមជា «ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ» ពិសេសលើកិច្ចការពារសន្តិសុខ សណ្តាប់ធ្នាប់ សុវត្ថិភាពជូនភ្ញៀវទេសចរជាតិ-អន្តរជាតិ សំដៅចូលរួមចំណែកកសាងសេដ្ឋកិច្ច សង្គម ការបង្កើតការងារ បង្កើនបា្រក់ចំណូល លើកកម្ពស់ជីវភាពរស់នៅ និងកាត់បន្ថយភាពក្រីក្ររបស់បងប្អូនប្រជាពលរដ្ឋ តាមរយៈការអភិវឌ្ឍទេសចរណ៍ប្រកបដោយនិរន្តរភាព ដែលជាការទទួលខុសត្រូវក្នុងការរួមចំណែកយ៉ាងសកម្មដល់កិច្ចអភិវឌ្ឍន៍ ថែរក្សាការពារ និងអភិរក្សប្រវត្តិសាស្ត្រធនធានធម្មជាតិព្រមទាំងសម្បត្តិវប្បធម៌សម្បូរបែប ដែលបានជម្រុញឱ្យខេត្តសៀមរាប ក្លាយជាទីផ្សារទេសចរណ៍ដ៏សំខាន់សម្រាប់តំបន់ក៏ដូចជា សម្រាប់ជាតិទាំងមូល។
ព័ត៌មានជាតិ ថ្មីៗ
ឯកឧត្តម ទៀ សីហា បានរំពឹងថា ការបង្កើតនូវថ្នាលទេសចរណ៍ឌីជីថលថ្មីមួយ តាមរយៈអនុស្សរណៈលើកកម្ពស់វិស័យទេសចរណ៍ប្រកបដោយនិរន្តរភាព និងភាពឆ្លាតវៃនេះ នឹងនាំមកនូវការអភិវឌ្ឍ និងរីកចម្រើនលើគ្រប់វិស័យ ជាពិសេសគឺវិស័យទេសចរណ៍ក្នុងខេត្តសៀមរាប៕
អត្ថបទ និងរូបភាព៖ លោក បូ សាវី
