រយៈពេល២០ឆ្នាំ នៃការបង្កើតសាលាសណ្ឋាគារ និងទេសចរណ៍ ប៉ូលឌុលប្រ៊ូល នៅខេត្តសៀមរាប យុវជនខ្មែរជាច្រើនពាន់នាក់ បានទទួលចំណេះដឹង និងការងារ ដើម្បីលើកកម្ពស់ជីវភាពគ្រួសារ នេះតាមការលើកឡើងរបស់ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ ក្នុងកិច្ចប្រជុំកិច្ចប្រជុំត្រួតពិនិត្យពីលទ្ធផលនៃការងារអនុវត្តក្នុងរយៈពេល២០ឆ្នាំ នៃការបង្កើតសាលាសណ្ឋាគារនិងទេសចរណ៍ ប៉ូលឌុលប្រ៊ូល។
កិច្ចប្រជុំនេះ មានការចូលរួមពីឯកឧត្តម ពេជ្រ សោភណ្ឌ័ រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ លោកស្រី ម៉ននី រងី្ស អភិបាលរងខេត្តសៀមរាប ឯកឧត្តម Paul Dubrule សហស្ថាបនិក នៃសាលាសណ្ឋាគារនិងទេសចរណ៍ ប៉ូលឌុលប្រ៊ូល និងសហការីផងដែរ។
តាមរយៈរបាយការណ៍នៃកិច្ចប្រជុំ សាលាបដិសណ្ឋារកិច្ចផ្តល់ជូនកម្មវិធីចំនួន ៥ រួមមាន ជំនាញសេវាកម្មម្ហូបអាហារ និងភេសជ្ជៈ ជំនាញចម្អិនអាហារ ជំនាញដុតនំ ការិយាល័យជួរមុខ និងគេហដ្ឋាន និងប្រតិបត្តិការទីភ្នាក់ងារទេសចរណ៍។ កន្លងមក សាលា ក៏បានផ្តល់អាហារូបករណ៍១០០ភាគរយដល់សិស្សជាង ១ ពាន់នាក់រួចហើយ ចាប់តាំងពីឆ្នាំ ២០០៣ មក។
ព័ត៌មានជាតិ ថ្មីៗ
តាមរយៈកិច្ចប្រជុំបូកសរុបការងាររយៈពេល ២០ឆ្នាំនេះ ឯកឧត្តម ពេជ្រ សោភណ្ឌ័ និងឯកឧត្តម ប៉ាក់ សុខុម បានថ្លែអំណរគុណដល់ ឯកឧត្តម Paul Dubrule និងលោកជំទាវ ដែលបានបង្កើតសាលាវិជ្ជាជីវៈសណ្ឋាគារ និងទេសចរណ៍នេះឡើង ដើម្បីជួយលើវិស័យទេសចរណ៍នៅកម្ពុជា ព្រមទាំងសហការី ដែលបានខិតខំយកនូវចំណេះដឹងចែករំលែក ចំណេះដឹងដល់យុវជនខ្មែរ ព្រមទាំងបានផ្តល់នូវអាហារូបករណ៍ ដល់សិស្សក្រីក្រ នៅតាមតំបន់ជនបទ តាមបណ្តាខេត្តនានា នៃព្រះរាជាណាចក្រកម្ពុជា ឱ្យបានមកចូលរៀន និងទទួលបានការងារសមរម្យរហូតមកដល់បច្ចុប្បន្ន។
គួរជម្រាបថា ឯកឧត្តម Paul Dubrule បានបង្កើតសាលាសណ្ឋាគារ និងទេសចរណ៍នេះឡើង (EHT) ខណៈលោកបានបម្រើការជាសមាជិកព្រឹទ្ធសភាបារាំងពីឆ្នាំ ១៩៩៩ ដល់ឆ្នាំ ២០០៤។ ធ្លាប់មានប្រវត្តិផ្នែកបដិសណ្ឋារកិច្ច ព្រមជាមួយការតាំងចិត្តខ្ពស់ លោកបានមកដល់ខេត្តសៀមរាប និងបើកសម្ពោធសណ្ឋាគារ និងទេសចរណ៍ ប៉ូលឌុយប្រ៊ូល នៅថ្ងៃទី ២៤ ខែតុលា ឆ្នាំ ២០០២។
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក សេង ផល្លី
