មជ្ឈមណ្ឌលស្តារលទ្ធភាពពលកម្មកាយសម្បទាខេត្តសៀមរាប ស្ថិតក្នុងភូមិវិហារចិន សង្កាត់ស្វាយដង្គំ ក្រុងសៀមរាប ត្រូវបានសម្ពោធដាក់ឱ្យប្រើប្រាស់ជាផ្លូវការឡើងវិញហើយ នៅថ្ងៃទី១ ខែធ្នូ ឆ្នាំ២០២២ ក្រោមអធិបតីភាព ឯកឧត្តម ស៊ឹម សុធន ប្រតិភូរាជរដ្ឋាភិបាលកម្ពុជា ទទួលបន្ទុកជានាយកនៃមូលនិធិជនពិការ ឯកឧត្តម ផាប្លូ កាង ឯកអគ្គរាជទូត នៃស្ថានទូតអូស្រ្តាលីប្រចាំកម្ពុជា និងលោក នាក់ ណេរ៉ុន អភិបាលរងខេត្ត តំណាង ឯកឧត្តម ទៀ សីហា អភិបាលខេត្តសៀមរាប។
លើកឡើងក្នុងឱកាស លោក នាក់ ណេរ៉ុន ក្រោមដឹកនាំរបស់សម្តេចតេជោនាយករដ្ឋមន្ត្រី ការទប់ស្កាត់នៃការរាតត្បាតនៃជំងឺកូវីដ-១៩ នៅកម្ពុជា ទទួលបានជោគជ័យ រហូតឈានដល់ការបើកប្រទេសឡើងវិញជាស្ថាពរ។ ទន្ទឹមនោះ ការអភិវឌ្ឍន៍នានា ក៏បានមានសន្ទុះឡើងវិញ ជាក់ស្ដែងការដាក់ឱ្យប្រើប្រាសឡើងវិញនូវ មជ្ឈមណ្ឌលស្តារលទ្ធភាពពលកម្មកាយសម្បទាខេត្តសៀមរាប នឹងជួយសម្រួលដល់ការបម្រើសេវាកម្មជូនដល់ជនដែលមានតម្រូវការស្តារលទ្ឋភាពពលកម្មកាន់តែប្រសើរជាមុន។
ឯកឧត្តម ផាប្លូ កាង លើកឡើងថា ជាងមួយទសវត្សមកហើយ ដែលរាជរដ្ឋាភិបាលអូស្ត្រាលីបានផ្តល់អាទិភាពដល់ការអភិវឌ្ឍន៍នៃគុណភាពសេវាស្តារលទ្ឋភាពពលកម្ម ព្រោះការទទួលបានសេវាទាំងនេះពិតជាផ្នែកមួយដ៍សំខាន់ក្នុងការសម្រេចបានការចូលរួមគ្រប់ទិដ្ឋភាពនៃជីវិតរស់នៅ។ ក្នុងនោះ តម្រូវការការស្តារលទ្ឋភាពពលកម្ម នៅតែបន្តការកើនឡើងដោយមូលហេតុផ្សេងៗរួមមាន កំណើនមនុស្សមានវ័យចំណាស់ កត្តាជំងឺឆ្លងរ៉ាំរ៉ៃ គ្រោះថ្នាក់ចរាចរណ៍ និងគ្រោះថ្នាក់ផ្សេងៗទៀត។ បន្ថែមពីនេះ ផលប៉ះពាល់ពីគ្រាប់មីនមិនទាន់ផ្ទុះ នៃសង្គ្រាមនៅកម្ពុជា ក៏ជាផ្នែកមួយនៃដៃគូគាំទ្ររវាងរដ្ឋាភិបាលអូស្ត្រាលី និងរាជរដ្ឋាភិបាលកម្ពុជា ដើម្បីសម្រេចបាននូវផែនការគ្មានមីននៅឆ្នាំ២០២៥ផងដែរ។
ក្នុងឱកាសនោះ ឯកឧត្តម ស៊ឹម សុធន បានថ្លែងអំណរគុណដល់រដ្ឋាភិបាល និងប្រជាជនអូស្រ្តាលី ដែលតែងតែផ្តល់ការគាំទ្រ និងការយកចិត្តទុកដាក់ដល់វិស័យពិការភាព ជាពិសេសការងារស្តារលទ្ធភាពពលកម្មកាយសម្បទានៅកម្ពុជា ជាងមួយទសវត្សកន្លងមកនេះ។ គិតពីឆ្នាំ១៩៩១មក មានអតិថិជនជាង ៨ពាន់នាក់ បានមកទទួលសេវាស្តារលទ្ធភាពពលកម្មពីមជ្ឈមណ្ឌលនេះ។ តួលេខនេះនៅមានចំនួនទាបនៅឡើយ ដោយមូលហេតុកង្វះការផ្សព្វផ្សាយ ពីសេវារបស់មជ្ឈមណ្ឌល កង្វះកិច្ចសហការពីស្ថាប័នពាក់ព័ន្ធ អាជ្ញាធរមូលដ្ឋាន និងអង្គការជនពិការ។ល។ តម្រូវការនៃសេវាស្តារលទ្ធភាពពលកម្ម ឧបករណ៍ជំនួយ រួមទាំងរទេះរុញ មានការកើនឡើង ធនធានមនុស្ស និងធនធានថវិកា នៅមានកម្រិត។ តែទោះជាមានបញ្ហាប្រឈមយ៉ាងណាក៏ដោយ ក៏មូលនិធិជនពិការ នៅតែខិតខំប្រឹងប្រែងជំរុញការផ្តល់សេវាជូនជនពិការ និងខិតខំស្នើសុំថវិកាពីក្រសួងសេដ្ឋកិច្ច និងហិរញ្ញវត្ថុ ក៏ដូចជាដៃគូពាក់ព័ន្ធ ដើម្បីផ្តល់សេវាជូនបងប្អូនជនពិការឱ្យបានកាន់តែប្រសើរថែមទៀត។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី