នៅថ្ងៃទី២ ខែធ្នូ ឆ្នាំ២០២២ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួយរដ្ឋបាលស្រុកបន្ទាយស្រី បានរៀបចំបិទផ្សាយជាសាធារណៈ នូវឯកសារនៃការវិនិច្ឆ័យក្បាលដីសរុបចំនួន ៧៣១ក្បាលដី ស្ថិតនៅបរិវេណផ្ទះគំរូ ក្នុងភូមិតានី ដើម្បីអនុញ្ញាតឱ្យបងប្អូនប្រជាពលរដ្ឋ ដែលជាម្ចាស់ដី និងអ្នកកាន់កាប់ដីស្ថិតនៅភូមិតានី ឃុំរុនតាឯក ព្រមទាំងស្ថាប័ន អង្គភាពពាក់ព័ន្ឋទាំងអស់ ធ្វើការពិនិត្យផ្ទៀងផ្ទាត់មើលទិន្នន័យឱ្យបានគ្រប់ៗគ្នា។
តាមការបញ្ជាក់របស់ លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ក្បាលដីដែលបានបិទផ្សាយជាសាធារណៈនេះ សម្រាប់តែក្បាលដីពាក់ព័ន្ឋក្នុងអនុក្រឹត្យលេខ ១៥៥ អនក្រ.បក ចុះថ្ងៃទី ២២ ខែកក្កដា ឆ្នាំ ២០២២ស្ថិតនៅភូមិតានី ឃុំរុនតាឯក ស្រុកបន្ទាយស្រី ខេត្ដសៀមរាបតែប៉ុណ្ណោះ។ លោកបន្ថែមថា ចំពោះការពិនិត្យផ្ទៀងផ្ទាត់ មានរយៈពេល១៥ថ្ងៃ ចាប់ពីថ្ងៃទី២ ដល់ថ្ងៃទី១៦ ខែធ្នូ ឆ្នាំ២០២២ ដោយគិតទាំងថ្ងៃបុណ្យ និងថ្ងៃឈប់សម្រាក។
លោកអនុប្រធានមន្ទីរ អំពាវនាវវដល់ អ្នកពាក់ព័ន្ធលើក្បាលដីនីមួយៗទាំងអស់ ផ្ទៀងផ្ទាត់នៅលើឈ្មោះម្ចាស់ដី សាវតា ទំហំដី ប្រភេទទ្រព្យ ទីតាំងដី និងរូបរាងដី។ លោកបន្ថែមថា នេះជាឱកាសចុងក្រោយ ដែលអ្នកពាក់ព័ន្ឋទាំងអស់មានសិទ្ឋិធ្វើការកែតម្រូវ ឬជំទាស់តវ៉ា ក្នុងករណីពិនិត្យទៅឃើញថាមានកំហុសឆ្គង ដើម្បីជូនមកគណៈកម្មការរដ្ឋបាលពិនិត្យ និងកែតម្រូវជូន ដែលធានានបានភាពសុក្រឹត្យត្រឹមត្រូវ នៅពេលចេញវិញ្ញាបនបត្រសម្គាល់ម្ចាស់អចលនវត្ថុ។
លោក ភន់ សុខុម អភិបាលស្រុកស្ដីទី នៃស្រុកបន្ទាយស្រី តំណាង ឯកឧត្តមទៀ សីហា អភិបាលនៃគណៈអភិបាលខេត្ត លើកឡើងថា ដើម្បីចៀសវាងការលំបាកផ្សេងៗ ក្នុងការកែតម្រូវនៅពេលក្រោយ សូមប្រជាពលរដ្ឋ និងអ្នកពាក់ព័ន្ធក្បាលដីទាំងអស់ ទំនាក់ទំនងអាជ្ញាធរមូលដ្ឋាន និងមន្ត្រីជំនាញ សាកសួរព័ត៌មានបន្ថែមពាក់ព័ន្ធនឹងក្បាលដី អំឡុងពេលបិទផ្សាយនេះ ដើម្បីធានាសុវត្ថិភាពក្នុងការកាន់កាប់ដីធ្លីរបស់ប្រជាពលរដ្ឋ និងទទួលបាននូវសិទ្ធិស្របច្បាប់ក្នុងការប្រើប្រាស់សម្រាប់ផលប្រយោជន៍បុគ្គលខ្លួនឯងផ្ទាល់។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
