សម្រាប់ការប្រឡងមធ្យមសិក្សាទុតិយភូមិ នៅឆ្នាំ២០២២នេះ ខេត្តសៀមរាបមាន
បេក្ខជនចូលរួមសរុបចំនួន ១០,៣៧៤នាក់ ក្នុងនោះស្រី ៥,៩៣១នាក់ និងបានបែងចែកជា ១៤មណ្ឌលប្រឡងក្នុងក្រុងសៀមរាប។
នៅព្រឹកព្រលឹមថ្ងៃទី៥ ខែធ្នូនេះ គេសង្កេតឃើញមានវត្តមានឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប សមាជិក សមាជិកាក្រុមប្រឹក្សាខេត្ត លោក លោកស្រីអភិបាលរងនៃគណ:អភិបាលខេត្ត មន្ត្រីជាន់ខ្ពស់ក្រសួងអប់រំយុវជន និងកីឡា និងអង្គភាពប្រឆាំងអំពើពុករលួយ បានអញ្ជើញជួបលោកគ្រូអ្នកគ្រូនៅតាមមណ្ឌលទាំង១៤ ដើម្បីពិនិត្យពីស្ថានភាពទូទៅនៅតាមមណ្ឌលប្រឡង និងអញ្ជើញជាអធិបតីក្នុងការបើកវិញ្ញាសារ ដែលបង្ហាញពីតម្លាភាព និងការយកចិត្តទុកដាក់ខ្ពស់លើវិស័យអប់រំក្នុងខេត្ត។
ក្នុងឱកាសបើកវិញ្ញាសាប្រឡង នាពេលនោះ ឯកឧត្តមប្រធានក្រុមប្រឹក្សាខេត្ត បានណែនាំដល់បេក្ខជនទាំងអស់ គោរពតាមបទបញ្ជា និងការណែនាំរបស់ក្រសួងអប់រំយុវជន និងកីឡា និងលោកគ្រូ អ្នកគ្រូ ឱ្យបានខ្ជាប់ខ្ជួន ចៀសវាងមានបញ្ហាផ្សេងៗ ដែលប៉ះពាល់ដល់លទ្ធផលនៃការប្រឡង។ ឯកឧត្តមបន្ថែមថា ការប្រឡងនេះ ជាការវាស់ស្ទង់នូវកម្រិតចំណេះដឹងរបស់ក្មួយៗ សម្រាប់ឈានទៅកម្រិតបន្ត ដើមី្បសម្រួចចំណេះដឹង ធានានូវគុណភាព នៃការបណ្តុះបណ្តាលធនធានមនុស្ស និងក្លាយជាទំពាំងស្នងឫសី្ស នៃប្រទេសជាតិទៅថ្ងៃអនាគត ។
ឯកឧត្តម ក៏បានអំពាវនាវដល់ក្មួយៗបេក្ខជនទាំងអស់ នៅពេលបើកបរ ត្រូវពាក់មួកសុវត្ថិភាព ឱ្យបានគ្រប់ពេលវេលា ចៀសវាងគ្រោះថ្នាក់ផ្សេងៗ ព្រមចៀសវាងទទួលទានគ្រឿងស្រវឹង និងប្រើប្រាស់គ្រឿងញៀន ដែលវាបង្កឱ្យប៉ះពាល់ដល់សុខភាព និងអនាគត។
ជាមួយនោះតាមការសង្កេត នៅខាងក្រៅបរិវេណនៃមណ្ឌលប្រឡង គេឃើញមាន ក្រុមយុវជន សហភាពសហព័ន្ធយុវជនជនកម្ពុជា ខេត្តសៀមរាប បានចូលរួមជួយសម្រួលការដាក់ផ្ញើយានជំនិះរបស់បេក្ខជននៅតាមមណ្ឌលទាំងអស់ដោយឥតគិតថ្លៃ កងកម្លាំងថែរក្សាសុវត្ថិភាព និងសម្រួលចរាចរណ៍ ដោយឡែកនៅក្នុងមណ្ឌលប្រឡងមានរថយន្តសង្គ្រោះបន្ទាន់ ព្រមទាំងគ្រូពេទ្យរង់ចាំជួយសង្គ្រោះដល់បេក្ខជនក្នុងករណីជាយថាហេតុណាមួយផងដែរ។
គួរបញ្ជាក់ថា ការប្រមធ្យមសិក្សាទុតិយភូមិបែងចែកជា ២ផ្នែក ក្នុងនោះថ្នាក់វិទ្យាសាស្ត្រមាន ៥មណ្ឌល ស្មើ ១៣១បន្ទប់ ចំនួន៣,២៣៤នាក់ ស្រី ២,០៥១នាក់ និង វិទ្យាសាស្ត្រសង្គមមាន ៩មណ្ឌល មាន២៩០បន្ទប់ មានចំនួន៧,១៤០នាក់ ស្រី៣,៨៨០នាក់ ។
អត្ថបទ : លោក ម៉ី សុខារិទ្ធ
រូបភាព៖ សហការី
កែសម្រួល៖ លោក សេង ផល្លី
