លោក នីម វ៉ាន់សំ ប្រធានលេខាធិការដ្ឋានរៀបចំការចុះឈ្មោះបោះឆ្នោត ខេត្ដសៀមរាប បានឲ្យដឹងថា គិតចាប់ពីថ្ងៃទី២០ ខែតុលា មកដល់ថ្ងៃទី០៦ ខែធ្នូ ឆ្នាំ២០២២នេះ នៅទូទាំងខេត្តសៀមរាប មានប្រជាពលរដ្ឋមកចុះឈ្មោះបោះឆ្នោតថ្មី ចំនួនជាង ៣២.០៥៣នាក់ ហើយបើគិតជាភាគរយស្មើរនឹង ១១២ភាគរយ។
លោក នីម វ៉ាន់សំ បានបញ្ជាក់ថា ប្រជាពលរដ្ឋជាង ៣២.០០០នាក់ ដែលបានចុះឈ្មោះថ្មីក្នុងបញ្ជីឈ្មោះបោះឆ្នោត រួមមាន៖ ក្រុងសៀមរាប មានចំនួន ៦.៨៥៣នាក់, ស្រុកអង្គរជុំ ចំនួន ២.៥២៩នាក់, ស្រុកអង្គរធំ ១.០៥៩នាក់, ស្រុកបន្ទាយស្រី ១.៤១៨នាក់, ស្រុកជីក្រែង ៤.២៧២នាក់, ស្រុកក្រឡាញ់ ១.៨៦៧នាក់, ស្រុកពួក ៣.៦៥៤នាក់, ស្រុកប្រាសាទបាគង ២.៥៨១នាក់, ស្រុកសូទ្រនិគម ៣.២១២នាក់, ស្រុកស្រីស្នំ ១.១៥៤នាក់, ស្រុកស្វាយលើ ១.៨៨២នាក់ និងនៅស្រុកវ៉ារិន ចំនួន ១.៤៧៦នាក់។ ជាមួយគ្នានោះប្រជាពលរដ្ឋដែលផ្ទេរលំនៅដ្ឋានមានចំនួន ១០.៦៦៦នាក់ និងប្ដូររការិយាល័យក្នុងឃុំ មានចំនួន ៣.៥៨៨នាក់ ខណៈដែលប្រជាពលរដ្ឋដែលមានឈ្មោះក្នុងបញ្ជីឈ្មោះបោះឆ្នោតឆ្នាំ២០២១ មានចំនួនសរុប ៥៨៨.៥៥៣នាក់។
លោកប្រធានលេខាធិការដ្ឋាន ក៏សូមអំពាវដល់ប្រជាពលរដ្ឋឱ្យទៅពិនិត្យបញ្ជីឈ្មោះបោះឆ្នោត និងប្រជាពលរដ្ឋដែលគ្រប់អាយុបោះឆ្នោត និងប្ដូរទីលំនៅ ទៅចុះឈ្មោះបោះឆ្នោត ឱ្យបានទាន់ពេលវេលា ខណៈដែលការចុះឈ្មោះនេះ នឹងត្រូវបិទបញ្ចប់នៅវេលាម៉ោង៥ល្ងាច ថ្ងៃទី៨ ខែធ្នូ ឆ្នាំ២០២២នេះ។ សម្រាប់ការចុះឈ្មោះ និងពិនិត្យមើលឈ្មោះមានទីតាំងនៅតាមឃុំសង្កាត់និមួយៗ ឬអាចមើលឈ្មោះបោះឆ្នោតតាមគេហទំព័រ https://www.voterlist.nec.gov.kh៕
អត្ថបទ និងរូបភាព៖ លោក បូ សាវី
