មន្ទីរឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ខេត្តសៀមរាប សហការជាមួយវិទ្យាស្ថានស្រាវជ្រាវម្ហូបអាហារ ( KFRI) នៃសាធារណៈរដ្ឋកូរ៉េ បានរៀបចំ សិក្ខាសាលាស្តីពីការពង្រឹងប្រសិទ្ធភាពនៃការគ្រប់គ្រងសុវត្ថិភាពម្ហូបអាហា និងបូកសរុបលទ្ធផលនៃការអនុវត្តគម្រោង TASK Program ដំណាក់កាលទី២ នៅកម្ពុជា។ សិក្ខាសាលានេះមានរយៈពេលពីរថ្ងៃ គឺនៅថ្ងៃទី៨-៩ ខែធ្នូ ឆ្នាំ២០២២ នៅសណ្ឋាគារអ៊េមព្រីសខេត្តសៀមរាប។
ឯកឧត្តម សុន សេងហួត រដ្ឋលេខាធិការក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ មានប្រសាសន៍ថា សិក្ខាសាលានេះដែរ រៀបចំឡើងក្នុងគោលបំណងដើម្បីបន្តអនុវត្តគម្រោង TASK PROGRAM ដំណាក់កាលទី២ សំដៅជួយទៅដល់បណ្តាសហគ្រាសផលិតកែច្នៃម្ហូបអាហារក្នុងស្រុក នៅតាមខេត្តគោលដៅ រួមមាន៖ រាជធានីភ្នំពេញ ខេត្តសៀមរាប និងខេត្តបាត់ដំបង។ គម្រោង TASK PROGRAM ជំហានទី១ បានអនុវត្តនៅរាជធានីភំ្នពេញ ចាប់ផ្តើមពីឆ្នាំ២០១៨-២០២០ ដែលមានសហគ្រាសផលិតម្ហូបអាហារចំនួន១១ បានចូលរួម ហើយទទួលបានជោគជ័យគួរជាទីមោទនៈ។ សម្រាប់គម្រោង TASK PROGRAM ជំហានទី២នេះដែរ គឺគ្រោងនឹងអនុវត្តចាប់តាំងពីដើមឆ្នាំ២០២១មកម្ល៉េះ ក៏ប៉ុន្តែដោយសារបញ្ហាការរីករាលដាលនៃជំងឺកូវីដ-១៩ ទើបគម្រោងនេះត្រូវពន្យាពេលអស់១ឆ្នាំ។
ឯកឧត្តម សុន សេងហួត បានបញ្ជាក់ថា សម្រាប់សហគ្រាសទាំងអស់ដែលបានចូលរួមក្នុងការអនុវត្តគម្រោង TASK PROGRAM ជំហានទី២ ត្រូវបានចំរាញ់ចេញពីសហគ្រាសម្ហូបអាហារចំនួន ៥០មូលដ្ឋាន ក្នុង១ខេត្ត ដោយចំរាញ់យកតែ ៥មូលដ្ឋាន ក្នុង១ខេត្ត ដោយផ្តោតសំខាន់ទៅលើសហគ្រាសម្ហូបអាហារដែលមានសក្តានុពលខ្ពស់ និងអាចមានលទ្ធភាពក្នុងការនាំចេញជាដើម។ ហើយសម្រាប់សហគ្រាសដែលត្រូវជ្រើសរើសមាន ១២មូលដ្ឋាន ដែលបានចូលរួមក្នុងគម្រោងនេះ ហើយក៏បានទទួលចុះកិច្ចសន្យាក្នុងការតាំងចិត្តពីសំណាក់ភាគីកូរ៉េ ដើម្បីផ្តល់ជូនដល់សហគ្រាសនីមួយៗរួមមាន៖ ការអនុវត្តន៍គម្រោងមានរយៈពេល ២ឆ្នាំ (២០២២-២០២៣), ការលើកំពស់ និងអភិវឌ្ឍន៍ វិស័យម្ហូបអាហារ, ការផ្តល់ការប្រឹក្សាយោបល់ផ្នែកបច្ចេកទេសដល់សហគ្រាស ពីសំណាក់វិទ្យាស្ថាន KFRI, ការទៅចូលរួមទស្សនៈកិច្ចសិក្សានៅប្រទេសកូរ៉េ, ការទទួលបានការបណ្តុះបណ្តាលពី Food Hygiene, HACCP, and Food Control, ការចូលរួមក្នុងសិក្ខាសាលាជាតិ-អន្តរជាតិ និងការចូលក្នុងការតាំងពិពរត៌នៅប្រទេសកូរ៉េជាដើម។
ឯកឧត្តមរដ្ឋលេខាធិការ សង្ឃឹមជឿរជាក់ថា គម្រោង TASK PROGRAM ជំហានទី២នេះ នឹងដំណើរការដោយជោគជ័យ និងប្រកបដោយផ្លែផ្កា ដើម្បីលើកកំពស់វិស័យម្ហូបអាហារនៅក្នុងប្រទេសបង្កើនជំនឿទុកចិត្តដល់អ្នកប្រើប្រាស់ក្នុងស្រុក និងឈានទៅដល់ការនាំចេញទៅទីផ្សារអន្តរជាតិ ក៏ដូចជាក្នុងតំបន់។ ជាមួយគ្នានោះ ឯកឧត្តមក៏បានផ្តាំផ្ញើរដល់សហគ្រាសទាំងអស់ដែលស្ថិតក្រោមការអនុវត្តគម្រោង ត្រូវខិតខំយកចិត្តទុកដាក់ស្តាប់ការពន្យល់ណែនាំពីសំណាក់អ្នកបច្ចេកទេសកូរ៉េ និងសាកសួរពីបញ្ហាផ្សេងៗ ក៏ដូចជាការអភិវឌ្ឍន៍ផលិតផលថ្មីផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ