អគារសិក្សាថ្មី ១ខ្នងមាន ២បន្ទប់ ជាអំណោយរបស់ព្រះតេជគុណ ជិន ហ្សង់ ព្រះចៅអធិការវត្ត យ៉ន់ហ្វាសារ នៃសាធារណរដ្ឋកូរ៉េ តាមរយៈអង្គការឡូតធឺសវើល ត្រូវបានប្រគល់ជូនសាលាបឋមសិក្សាលៀបចាស់ និងសម្ពោធដាក់ប្រើប្រាស់ជាផ្លូវការហើយកាលពីថ្ងៃទី៧ ខែធ្នូនេះ ដែលស្ថិតនៅក្នុង ភូមិលៀបចាស់ ឃុំពាក់ស្នែង ស្រុកអង្គរធំ។
តាមការឱ្យដឹងពីលោកគ្រូ នៃគណៈគ្រប់គ្រងសាលា សាលាបឋមសិក្សាលៀបចាស់ មានចម្ងាយពីទីរួមស្រុកអង្គរធំ ជាង៣០គ.ម។ សាលានេះ មានអគារឈើចាស់មួយខ្នង មាន៣បន្ទប់ ដែលសាងសង់តាំងពីឆ្នាំ២០១៣ និងមានថ្នាក់ទី១ ដល់ថ្នាក់ទី៤។ បច្ចុប្បន្នសាលានេះ មានសិស្សកំពុងសិក្សាចំនួន ១០៥នាក់ ក្នុងនោះស្រី៥៨នាក់ ព្រមទាំងគ្រូបង្រៀនចំនួន ៣នាក់។
លោកគ្រូ បន្ថែមថា នៅពេលសិស្សបញ្ចប់ថ្នាក់ទី៤ និងបន្តទៅថ្នាក់ទី៥ ពួកគេត្រូវទៅរៀននៅទីប្រជុំជន ក្នុងឃុំពាក់ស្នែង ដែលមានចម្ងាយជិត១០គ.ម កត្តានេះសិស្សតូចៗមួយចំនួន បានបោះបង់ការសិក្សាដោយសារធ្វើដំណើរឆ្ងាយពីផ្ទះ។ ដើម្បីចូលរួមកាត់បន្ថយអត្រាការបោះបង់ការសិក្សារបស់សិស្ស គណៈគ្រប់គ្រងសាលាបានទទួលការឯកភាពការបង្កើតថ្នាក់ទី៥ និងទី៦បន្ថែម ពីមន្ទីរអប់រំ យុវជន និងកីឡាខេត្តសៀមរាប។
មានសង្ឃដីកានាពេលនោះ ព្រះតេជគុណ សង់ ក្វាន់ ប្រធានអង្គការឡូតធឺសវើល បានថ្លែងអំណរគុណដល់ព្រះតេជគុណ ជិន ហ្សង់ ដែលបានសទ្ធាជ្រះថ្លា និងគិតគូរពីអនាគតក្មេងៗនៅតំបន់ដាច់ស្រយាល។ មិនតែប៉ុណ្ណោះ តាមរយៈអង្គការឡូតធឺសវើល និងខិតខំស្វែងរកសប្បុរសជនបន្ថែមទៀត ដើម្បីជួយអភិវឌ្ឍន៍ការអប់រំនៅភូមិលៀបចាស់ ដែលជាភូមិដាច់ស្រយាលនេះបន្តទៀត ព្រោះមានតែចំណេះវិជ្ជាទេ ទើបជួយឱ្យបុគ្គលម្នាក់ផុតពីការលំបាក និងជួយប្រទេសជាតិឱ្យមានការរីកចម្រើន។
ជាមួយនោះ អង្គការឡូតធឺសវើល រួមនិងម្ចាស់ជំនួយ ក៏បាននាំយកនូវសម្លៀកបំពាក់សិក្សាចំនួន ១០៥សម្រាប់ សម្ភារៈសិក្សា ១០៥កញ្ចប់ ព្រមទាំងចំណីអាហារចែកជូនសិស្សានុសិស្សនៃសាលាបឋមសិក្សាលៀបចាស់ផងដែរ។
អត្ថបទ៖ លោក ហ៊ុន ឆៃលាង
កែសម្រួល៖ លោក សេង ផល្លី