យោងតាមបទបញ្ជារបស់សម្ដេចអគ្គមហាសេនីបតីតេជោ ហ៊ុន សែន នាយករដ្ឋមន្ត្រី គិតមកដល់ថ្ងៃទី១២ ខែធ្នូ ឆ្នាំ២០២២នេះ កងកម្លាំងតាមបណ្តាកងឯកភាពចំណុះយោធភូមិភាគទី៤ បាននឹងកំពុងមមាញឹកក្នុងការសហការចុះជួយរុះរើលំនៅឋានជូនបងប្អូនប្រជាពលរដ្ឋដែលបានស្ម័គ្រចិត្តរើលំនៅឋានចេញពីតំបន់រមណីយដ្ឋានអង្គរ ទៅតាំងទីលំនៅក្នុងតំបន់អភិវឌ្ឍថ្មីរុនតាឯក។
មេបញ្ជាការកងពលតូចថ្មើរជើងលេខ៤១ ឧត្តមសេនីយ៍ទោ នាង ឃីម បានឲ្យដឹងថា កងកម្លាំងចំណុះយោធភូមិភាគទី៤ ដែលកំពុងបន្តសកម្មភាពជួយរុះរើលំនៅឋានប្រជាពលរដ្ឋមានចំនួន ១៤៨នាក់ រួមជាមួយមធ្យោបាយដឹកជញ្ជូនរថយន្តចំនួន ១៥គ្រឿង និងឧបករណ៍សម្ភារមួយចំនួនទៅចុះជួយរុះរើផ្ទះជូនប្រជាពលរដ្ឋនៅភូមិត្រពាំងសេះ និងភូមិទក្សិណត្បូង សង្កាត់គោកចក ក្រុង-ខេត្តសៀមរាប រួចហើយបានដឹកជញ្ជូនទៅកាន់តំបន់អភិវឌ្ឍថ្មីរុនតាឯក ស្ថិតនៅភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប។
ឧត្តមសេនីយ៍ទោ បញ្ជាក់ថា គិតមកទល់ពេលនេះ កងកម្លាំងយើងកំពុងមមាញឹកជួយរុះរើ និងដឹកសម្ភារៈរបស់ប្រជាពលរដ្ឋ រហូតបញ្ចប់ភារកិច្ចដែលថ្នាក់លើបានកំណត់ ប៉ុន្ដែការដឹកជញ្ជូនមិនទាន់ដឹងចំនួនខ្នងផ្ទះប្រជាពលរដ្ឋនៅឡើយទេ។ សម្រាប់ការចុះជួយរុះរើ និងដឹកជញ្ជូន គឺជាការអនុវត្តបទបញ្ជាដ៏ខ្ពង់ខ្ពស់របស់សម្តេចតេជោ ដែលបានប្រគល់ភារកិច្ចនេះឲ្យកម្លាំងយោធភូមិភាគទី៤ និងកម្លាំងកងពលធំអន្តរាគមន៍លេខ២ ទទួលខុសត្រូវក្នុងការងានេះ។
គិតត្រឹមថ្ងៃទី២៩ ខែវិច្ឆិកា ឆ្នាំ២០២២ លំនៅឋានប្រជាពលរដ្ឋដែលបានស្ម័គ្រចិត្ដ និងបានចាប់ឆ្នោតរួចចំនួន ៩.៦១០គ្រួសារ ទៅរស់នៅតំបន់អភិវឌ្ឍន៍ភូមិធម្មជាតិរុនតាឯក ស្ថិតនៅភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប និងតំបន់អភិវឌ្ឍន៍ពាក់ស្នែង ស្ថិតក្នុងភូមិពាក់ស្នែងចាស់ ឃុំពាក់ស្នែង ស្រុកអង្គរធំ ខេត្តសៀមរាប៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
