នាព្រឹកថ្ងៃទី១៣ ខែធ្នូ ឆ្នាំ២០២២នេះ នៅសាលប្រជុំសាលាខេត្តសៀមរាប មានបើកកិច្ចប្រជុំពិភាក្សាលើផែនការរៀបចំព្រឹត្តិការណ៍អង្គរសង្ក្រាន្ត ឆ្នាំទី១០ ក្រោមអធិបតីភាព ឯកឧត្តម ហ៊ុន ម៉ានី ប្រធានសហភាពសហព័ន្ឋយុវជនកម្ពុជា និង ឯកឧត្តម ទៀ សីហា អភិបាល នៃគណ:អភិបាលខេត្ត និងជាប្រធានគណ:បញ្ជាការឯកភាពរដ្ឋបាលខេត្ត ព្រមទាំងវត្តមាន ឯកឧត្តម លោកជំទាវថ្នាក់ដឹកនាំក្នុងគណ:កម្មការក្រុមការងា ររៀបចំព្រឹត្តិការណ៍អង្គរសង្ក្រាន្ត ស.ស.យ.ក លោក លោកស្រីជាអភិបាលរងខេត្ត តំណាងអាជ្ញាធរជាតិអប្សរា នាយក នាយករងរដ្ឋបាលសាលាខេត្ត អភិបាលក្រុងសៀមរាប មេបញ្ជាការកងកម្លាំងប្រដាប់អាវុធទាំងបី នាយករដ្ឋបាលសាលាខេត្ត ប្រធាន អនុប្រធានមន្ទីរ អង្គភាពជុំវិញខេត្តព្រមទាំង សហភាពសហព័ន្ធយុវជនកម្ពុជាខេត្តសៀមរាប ជាច្រើនរយនាក់ផងដែរ។ កិច្ចប្រជុំរៀបចំឡើង ដោយមានបទបង្ហាញ ដើម្បីពិភាក្សាទៅលើផែនការមេសំខាន់ៗដូចជា ការកំណត់ទីតាំង ការពង្រឹងសន្តិសុខ សុវត្ថិភាព សណ្តាប់ធ្នាប់របៀបរៀបរយសាធារណ: ការងារសន្តិសុខ ចរាចរណ៍ សង្គ្រោះបឋម និងបន្ទាន់ លំហូរប្រជាជនក្នុងអំឡុងពេលមុន និងក្នុងពេលប្រារព្ឋពិធី ជាពិសេសការពង្រឹងការពារសន្តិសុខ សុវត្ថិភាពជូនប្រមុខដឹកនាំជាន់ខ្ពស់ នៃរាជរដ្ឋាភិបាលសម្រាប់ក្នុងពិធីបើកព្រឹត្តិការណ៍អង្គរសង្ក្រាន្តនេះផងដែរ។
ឯកឧត្តម ហ៊ុន ម៉ានី ប្រធានសហភាពសហព័ន្ឋយុជនកម្ពុជា និងជាប្រធានអង្គប្រជុំ បាននាំយកប្រសាសន៍ដ៍ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលសម្តេចបានថ្លែងនៅក្នុងឱកាសសម្ពោធដាក់ឱ្យប្រើប្រាស់កំណត់ផ្លូវជាតិលេខ៧ កាលពីថ្ងៃទី០៧ ខែកុម្ភ: ឆ្នាំ២០២២ថា ៖ ខានចូលឆ្នាំ ២ឆ្នាំហើយ ឥឡូវឆ្នាំនេះប្តូរផ្តាច់ចូលឆ្នាំនាំគ្នារាំលេងសប្បាយ ប៉ុន្តែរាំលេងឱ្យឃ្លាតពីគ្នាបន្តិច ! និងនាពិធីបិទការប្រកួតកីឡាជាតិលើកទី៣ និងកីឡាជនពិការជាតិលើកទី១ ឆ្នាំ២០២២ ថា៖ នៅចូលឆ្នាំខ្មែរខែមេសា ឆ្នាំ២០២៣ខាងមុខនេះ យើងនឹងធ្វើអង្គរសង្ក្រាន្តសារជាថ្មីម្តងទៀត ហើយនឹងអញ្ជើញប្រជាពលរដ្ឋ ចូលរួមទាំងអស់គ្នា។
ឯកឧត្តម ហ៊ុន ម៉ានី មានប្រសាសន៍ថា៖ ការរៀបចំព្រឹត្តិការណ៍អង្គរសង្ក្រាន្ត គឺជាការគាំទ្រដល់គោលនយោបាយរបស់រាជរដ្ឋាភិបាលកម្ពុជា ក្នុងការជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ២០២០ -២០២៣ វិធានការគោលនយោបាយជំរុញចលនាទេសចរណ៍ផ្ទៃក្នុង២០២១-២០២៣ ដើម្បីជំរុញទេសចរក្នុងស្រុក ផែនការយុទ្ធសាស្ត្រពីការបើកទទួលទេសចរវ៉ាក់សាំង ដើម្បីបើកទទួលទេសចរ សុវត្ថិភាពជាជំហានៗប្រកបដោយស្មារតីបុរេសកម្ម និងប្រុងប្រយ័ត្នក្នុងគោលដៅទាក់ទាញទេសចរអន្តរជាតិឱ្យបាន ៧លាន់នាក់ត្រឹមឆ្នាំ២០២៥។ ឯកឧត្តមបញ្ជាក់ថា៖ ការរៀបចំ អង្គរសង្ក្រាន្តនៃឆ្នាំទី១០នេះ គឺជាការរំលឹកឡើងវិញនូវព្រឹត្តិការណ៍សំខាន់ៗ បានជាប់កំណត់ត្រា ដែលទទួលស្គាល់ពីអន្តរជាតិ ទៅលើវិញ្ញាសារនំអន្សមយក្ស រាំចង្វាក់ម៉ានីហ្សូន ក្រម៉ាដែលវែងជាងគេ, ចាប៉ីដងវែង។ល។ សមទ្ធិផលទាំងនេះជាការបំផុសនូវគំនិតរួបរួមកម្លាំងសាមគ្គីភាពជាមហាគ្រួសារខ្មែរតែមួយ មោទកភាពជាតិខ្មែរជាធ្លុងមួយ ក្នុងការបណ្តុះស្មារតីអភិរក្ស អភិវឌ្ឍន៍វប្បធម៌ បាវចនាជាតិ ព្រលឹងជាតិ អត្តសញ្ញាណជាតិខ្មែរ ក្នុងបរិបទនៃសមាហរណកម្មសហគមន៍ប្រជាជាតិអាស៊ីអាគ្នេយ៍(រួមគិត រួមធ្វើ រួមទទួលខុសត្រូវ ) ក្នុងសម័យកាលសាកលភាវូបនីយកម្មទំនើបជំនាន់ថ្មីនេះ ។ម៉្យាងទៀតព្រឹត្តិការណ៍អង្គរសង្ក្រាន្ត ក៏បានផ្តល់ឱកាសឲ្យយុវជន ប្រជាពលរដ្ឋ ភ្ញៀវទេសចរណ៍ជាតិ និងអន្តរជាតិ បានស្វែងយល់អំពីភាពរុងរឿង លី្បល្បាញ ភាពសម្បូរបែបនៃវប្បធម៌ អរិយធម៌ ទំនៀមទម្លាប់ ប្រពៃណី និងសាសនា តាំងពីសម័យមហានគរ មកដល់បច្ចុប្បន្ន និងរួមគ្នាបន្តថែរក្សា កេរ្តិ៍មរតនេះឲ្យបានគង់វង្ស ដើម្បីពង្រីកកិត្យានុភាពជាតិលើឆាកអន្តរជាតិផងដែរ ។
ព្រឹត្តិការណ៍អង្គរសង្រ្កាន្តឆ្នាំ២០២៣ ក្រោមប្រធានបទ៖ ក្តីស្រម៉ៃ និងក្តីសង្ឃឹម ។ ជាការផ្សារភ្ជាប់ក្តីស្រម៉ៃជាមួយក្តីសង្ឃឹមប្រកបដោយភាពជឿជាក់របស់ប្រជាពលរដ្ឋខ្មែរចំពោះដំណើរឆ្ពោះទៅកាន់ភាពសុខក្សេមក្សាន្ត មោទកភាពជាតិ ភាពរុងរឿង និងភាពរីកចម្រើននៃប្រជាជាតិកម្ពុជា។ សម្រាប់ព្រឹត្តិការនេះ គណ:កម្មការរៀបចំព្រឹត្តិការអង្គរសង្ក្រាន្ត បានត្រៀមគោលដៅចំនួន ៦ទីតាំង នៅក្នុងក្រុង និងនៅតំបន់អង្គរ មាន៤៤ កម្មវិធី ដែលមានរយ:ពេល៤ថ្ងៃ ពីថ្ងៃទី១៣ ដល់ថ្ងៃទី១៦ ខែមេសា ហើយពិធីបើកព្រឹត្តិការណ៍អង្គរសង្រ្កាន្តឆ្នាំ២០២៣នេះ ក្រោមអធិបតីភាពដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រី និង សម្តេច កិត្តិព្រឹទ្ឋបណ្ឌិត ប៊ុន រ៉ានី ហ៊ុន សែន ទៀតផង៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
