នាថ្ងៃទី១៣ ខែធ្នូ ឆ្នាំ២០២២ នៅខាងមុខប្រាសាទបន្ទាយសំរែ នាយកដ្ឋានអភិរក្សប្រាសាទនិងបុរាណវិទ្យានៃអាជ្ញាធរជាតិអប្សរា បានចុះហត្ថលេខាលើអនុស្សរណៈយោគយល់គ្នា(MOU) ជាមួយសកលវិទ្យាល័យបៀលប្រាយ និងសកលវិទ្យាល័យអង្គរ ក្នុងខេត្តសៀមរាប ដើម្បីផ្ដល់ឱកាសដល់និស្សិតផ្នែកស្ថាបត្យកម្មនៃសកលវិទ្យាល័យទាំងពីរនេះ ធ្វើការសិក្សាស្វែងយល់សំណង់បុរាណ និងបទពិសោធន៍លើកិច្ចការអភិរក្សថ្មជាមួយក្រុមអ្នកជំនាញនៃអង្គការអភិវឌ្ឍន៍អន្តរជាតិអាល្លឺម៉ង់ (GIZ) ដែលកំពុងបំពេញការងារនៅប្រាសាទសំរ៉ែ។
តាមការលើកឡើងរបស់ លោក គឹម សុធិន អគ្គនាយករង នៃអាជ្ញាធរជាតិអប្សរា ការចុះអនុស្សរណៈយោគយល់គ្នានេះ មានគោលបំណង បណ្ដុះយុវជនខ្មែរ ជាពិសេសយុវជននៅតាមសកលវិទ្យាល័យក្នុងខេត្តសៀមរាប ឱ្យទទួលបានចំណេះដឹង និងសមត្ថភាពចេះជួសជុល និងព្យាបាលថ្មប្រាសាទបុរាណ ខណៈបច្ចុប្បន្ន អ្នកជំនាញខ្មែរ ដែលមានសមត្ថភាពធ្វើការនេះ មានចំនួនតិច និងពឹងផ្អែកទៅលើអ្នកជំនាញបរទេសច្រើន។
តាមរយៈការចុះអនុស្សរណៈយោគយល់គ្នានេះ អ្នកតំណាងនៃសកលវិទ្យាល័យទាំងពីរ រំពឹងថា ក្រុមនិស្សិតរបស់លោក នឹងទទួលបានចំណេះដឹង និងបទពិសោធន៍ល្អៗ ពីអ្នកជំនាញបរទេស និងអាជ្ញាធរជាតិអប្សរា ដើម្បីចូលរួមជាមួយរាជរដ្ឋាភិបាល ក្នុងកម្រិតណាមួយ ក្នុងការអភិរក្សសំណង់ និងប្រាសាទបុរាណនានា សម្រាប់ពេលអនាគត។
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
