ចាប់ពីឆ្នាំ១៩៩៤ ដល់ ២០២២នេះ រយៈពេល ២៨ឆ្នាំ ប្រទេសជប៉ុន បានផ្ដល់ថវិកាជាង២៨លានដុល្លារអាមេរិច សម្រាប់អភិរក្សប្រាសាទបាយ័ន ស្ថិតក្នុងតំបន់រមណីយដ្ឋានអង្គរ ដែលជាកិច្ចសហការរវាងសកលវិទ្យាល័យវ៉ាសិដា និង អាជ្ញាធរជាតិអប្សរា។
ថ្លែងក្នុងកិច្ចប្រជុំពេញអង្គ នៃគណៈកម្មាធិការអន្ដរជាតិអាយស៊ីស៊ីអង្គរនាថ្ងៃទី១៦ខែធ្នូឆ្នាំ២០២២នេះ លោកបណ្ឌិត តាគីស៊ិ ណាកាហ្គាវ៉ា(TAKESHI NAKAGAWA) សហប្រធានជប៉ុន អប្សរា សម្រាប់ការអភិរក្សអង្គរ (JAPAN-APSARA) ហៅកាត់ថា JASA បញ្ជាក់ថា ក្រៅពីថវិកាសម្រាប់គម្រោងអភិរក្សប្រាសាទបាយ័ននេះ រាជរដ្ឋាភិបាលប្រទេសជប៉ុន ក៏បានផ្ដល់ថវិកាជាង៥២ម៉ឺនដុល្លារអាមេរិចទៀត ដើម្បីទិញយានយន្ដ និងម៉ាស៊ីនធន់ធ្ងន់ ព្រមទាំងសម្ភារៈសម្រាប់ការរក្សាលំនឹងតួប៉មនៃប្រាសាទបាយ័ន។ លោកបន្ដថា គម្រោង “អភិរក្សប្រាសាទបាយ័ន” ចែកចេញជា ៦ដំណាក់កាល គឺដំណាក់កាលទី១ ចាប់ពីខែវិច្ឆិកា ឆ្នាំ១៩៩៤ ដល់ ខែកញ្ញា ឆ្នាំ១៩៩៩ ដំណាក់កាលទី២ ចាប់ពីខែឧសភា ឆ្នាំ១៩៩៩ ដល់ខែមេសា ឆ្នាំ២០០៥ ដំណាក់កាលទី៣ ចាប់ពីខែមិថុនា២០០៥ ដល់ខែសីហា ឆ្នាំ២០១១ ដំណាក់កាលទី៤ ចាប់ពីខែកុម្ភៈ ឆ្នាំ២០១២ ដល់ខែមិថុនា ឆ្នាំ២០១៨ ដំណាក់កាលទី៥ ចាប់ពីខែកក្កដាឆ្នាំ២០១៨ ដល់ខែមីនា ឆ្នាំ២០២២ និងដំណាក់កាលទី៦ ចាប់ពីខែមេសា ឆ្នាំ២០២២ ដល់បច្ចុប្បន្ន។
គួរជម្រាបថា តាមរយៈកិច្ចសហការរវាងសកលវិទ្យាល័យវ៉ាសិដា ប្រទេសជប៉ុន និងអាជ្ញាធរជាតិអប្សរា តាំងពីឆ្នាំ១៩៩៤ រហូតមកដល់បច្ចុប្បន្ន គម្រោងអភិរក្សប្រាសាទបាយ័ន សម្រេចបាន ១/ ការជួសជុលបណ្ណាល័យ ខាងជើងប្រាសាទបាយ័ន ២/ការអភិរក្ស និងជួសជុលបណ្ណាល័យខាងជើង ក្នុងបរិវេណខាងក្រៅនៃប្រាសាទ និងប្រាសាទសួគ៌ព្រ័ត្រ និងបង្កើតផែនការមេបាយ័ន ៣/ការជួសជុលបណ្ណាល័យខាងត្បូងប្រាសាទបាយ័ន ៤/ការកែលម្អ អភិរក្ស និងជួសជុលប៉មទី៥៥ និង ទី៥៧ ដែលជាផ្នែកមួយនៃការកែលម្អសោភណ្ឌភាពតួប្រាសាទបាយ័នមុខ បែរទៅទិសខាងកើត និង៥/ ការកែលម្អ អភិរក្ស និងជួសជុលប៉មទី៦៩ និងថែវទី៧០ ដែលជាផ្នែកមួយនៃការកែលម្អសោភណ្ឌភាព។ ក្នុងនោះ តាមការស្រាវជ្រាវ និងការវាយតម្លៃតាមបែបវិទ្យាសាស្ត្រជាបន្តបន្ទាប់នៅក្នុងដំណាក់កាលទី១ ដល់ទី៥ បានបង្ហាញថា លំនឹងតួប៉មកណ្តាល ទាមទារឱ្យមានអន្តរាគមន៍បច្ចេកទេសឱ្យបានច្បាស់លាស់។ ចំណែកដំណាក់កាលទី៦ ផ្តោតលើការអន្តរាគមន៍ផ្នែករូបវ័ន្ដ ដើម្បីធ្វើឱ្យមានលំនឹងដល់តួប៉មកណ្ដាល ព្រមទាំងព្យាយាមកំណត់វិធីសាស្ត្រអភិរក្សសមរម្យ សម្រាប់ចម្លាក់លៀននៃថែវខាងក្នុង។
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
