នៅថ្ងៃទី១៦ ខែធ្នូ ឆ្នាំ២០២២ ឯកឧត្តម អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប និងក្រុមការងារ បានអញ្ជើញចុះបើកការដ្ឋានស្ថាបនាផ្លូវក្រាលកៅស៊ូប្រភេទDBSTប្រវែង ៣គីឡូម៉ែត្របន្ថែមទៀត នៃគម្រោងផ្លូវសរុបជាង ១១គីឡូម៉ែត្រ ដែលតភ្ជាប់ពីផ្លូវជាតិលេខ៦៨ ពីភូមិចន្លាស់ដៃ ក្នុងឃុំចន្លាស់ដៃ មកជាប់ផ្លូវជាតិលេខ៦ ត្រង់ចំណុច ភូមិគោកត្រុំ ឃុំស្រណាល ស្រុកក្រឡាញ់ ខេត្តសៀមរាប។
តាមការឱ្យដឹងពី លោក សុខ ណារ៉េត អភិបាលស្រុកស្ដីទី នៃស្រុកក្រឡាញ់ ខ្សែផ្លូវដែលមានប្រវែងសរុបជាង ១១គីឡូម៉ែត្រនេះ បានស្ថាបនាកាលពីឆ្នាំ២០១៩កន្លងទៅ បានប្រវែង៨គីឡូម៉ែត្ររួចរាល់ហើយ ដែលជាអំណោយដ៏ថ្លៃថ្លាបំផុតរបស់ សម្ដេចតេជោ ហ៊ុន សែន ផ្តល់តាមរយៈ ឯកឧត្តម អ្នកឧកញ៉ា សៀង ណាំ។
ថ្លែងក្នុងឱកាសនោះ ឯកឧត្តម អ្នកឧកញ៉ា សៀង ណាំ បានចូលរួមត្រេកអរជាមួយប្រជាពលរដ្ឋក្នុងស្រុក្រឡាញ់ទាំងអស់ ដែលទទួលបានផ្លូវមួយខ្សែនេះជាស្ថាពរ ដែលវានឹងសម្រួលការធ្វើដំណើរយប់ថ្ងៃ ទៅកាន់មន្ទីរពេទ្យ សាលារៀន និងដឹកភោគផលកសិកម្មផ្សេងៗ សំដៅកាត់បន្ថយការចំណាយ និងពេលវេលាក្នុងការធ្វើដំណើរ។ ឯកឧត្តម ក៏បានថ្លែងអំណរគុណចំពោះបងប្អូនប្រជាពលរដ្ឋក្នុងស្រុកក្រឡាញ់ទាំងអស់ ដែលតែងតែគាំទ្រ និងបានបោះឆ្នោតជូនសម្ដេចតេជោ ហ៊ុន សែន ជានាយករដ្ឋមន្ត្រីនៃកម្ពុជា។ ជាមួយនោះ សម្ដេចក៏តែងតែចិត្តទុកដាក់ខ្ពស់ចំពោះ សុខទុក្ខ របស់ប្រជាពលរដ្ឋគ្រប់ពេលវេលា ជាក់ស្ដែងដូចជាសមិទ្ធផលផ្លូវមួយខ្សែនេះ ក្រៅពីការខិតខំកសាង និងអភិវឌ្ឍប្រទេសរបស់រាជរដ្ឋាភិបាលក្នុងពេលកន្លងមក បច្ចុប្បន្ននេះ ប្រទេសកម្ពុជា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រី កម្ពុជាពិតជាមានមោទកភាព និងកិត្យានុភាពជាតិ ជាបន្តបន្ទាប់ ជាក់ស្ដែងនាពេលថ្មីៗនេះ កម្ពុជាបានទទួលជោគជ័យ ក្នុងការរៀបចំកិច្ចប្រជុំកំពូលអាស៊ាន និងអាស៊ានបូក ហើយពិសេសនោះ គឺសម្ដេចតេជោសែន ដឹកនាំប្រទេសកម្ពុជា ប្រកបដោយសុខ សន្តិភាព និងការអភិវឌ្ឍន៍លើគ្រប់វិស័យ។
នៅក្នុងពិធីនោះ ឯកឧត្តមអ្នកតំណាងរាស្ត្រ បានផ្តល់ជូនដល់លោកយាយ លោកតា និងបងប្អូនប្រជាពលរដ្ឋចំនួន ៧៧០នាក់ ក្នុងម្នាក់ៗ ទទួលបានត្រីខ ១យួរ និងសារ៉ុងចំនួន១ ចំពោះ ក្មេងមានពិការភាពម្នាក់ ទទួលបានរទេះជនពិការមួយគ្រឿង និងក្រុមការងារស្ថាបនាផ្លូវ ទទួលបានថវិកាចំនួន ១លានរៀលផងដែរ ៕
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
