លើកឡើងនៅស្ថានីយពិសោធកសិកម្មទឹកវិល ថ្ងៃទី១៦ខែធ្នូឆ្នាំ២០២២ ក្នុងសន្និបាតបូកសរុបលទ្ធផលការងារឆ្នាំ២០២២ និងទិសដៅអនុវត្តបន្តឆ្នាំ២០២៣ លោក ទា គឹមសុទ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បង្ហាញថា វិស័យកសិកម្ម រុក្ខាប្រមាញ់ និងនេសាទ ក្នុងខេត្ត ទទួលបានផ្លែផ្កាជាវិជ្ជមាននៅឆ្នាំ២០២២ ប៉ុន្តែបញ្ហាប្រឈមដូចជា អាកាសធាតុ កង្វះធនធានមនុស្ស បច្ចេកទេសកសិកម្ម កង្វះទុនវិនិយោគ តម្លៃទីផ្សារកសិផលមិនមានស្ថេរភាព តម្លៃចំណីសត្វ និងជីកសិកម្មមានកំណើនខ្ពស់។ល។ នៅតែជាកង្វល់សម្រាប់កសិករ និងអ្នកផលិត។
លោក ទា គឹមសុទ្ឋ បន្ថែមថា សម្រាប់ទិសដៅអនុវត្តន៍ការងារបន្តឆ្នាំ២០២៣ មន្ទីរនឹងបន្តជំរុញអភិវឌ្ឍន៍វិស័យកសិកម្មបែបទំនើបកម្ម ពិពិធកម្មដំណាំកសិកម្ម ដែលធន់នឹងការប្រែប្រួលអាកាសធាតុ ជំរុញផលិតកម្មកសិកម្មតាមកិច្ចសន្យា បង្កើនកិច្ចសហការជាមួយស្ថាប័នពាក់ព័ន្ធ ដើម្បីកែលម្អនិងស្តារប្រព័ន្ធស្រោចស្រពចាស់ៗឡើងវិញ ។
អញ្ជើញក្នុងឱកាសនោះ លោក អ៊ឹង គឹមលាង អភិបាលរងខេត្តសៀមរាប បានថ្លែងកោតសរសើរដល់មន្ត្រីនៃមន្ទីរកសិកម្ម រុក្ខាប្រមាញ់ និងនេសាទខេត្តគ្រប់ជាន់ថ្នាក់ ដែលបានលះបង់កម្លាំងកាយចិត្តដូចក្នុងរយៈកាលកន្លងមកនេះ ក្នុងការចុះផ្សព្វផ្សាយ អប់រំ និងការកំណត់ឲ្យបាននូវបញ្ហាប្រឈម បទល្មើសនានាក្នុងដែនសមត្ថកិច្ចរបស់ខ្លួន និងមានការចូលរួមសហការល្អ ជាមួយសមត្ថកិច្ចពាក់ព័ន្ធ រួមទាំងអាជ្ញាធរដែនដីក្នុងការទប់ស្កាត់ បង្ក្រាបនូវបទល្មើសជលផល ព្រៃឈើ ទាំងក្នុងតំបន់អភិរក្ស តំបន់ព្រៃលិចទឹក ក៏ដូចជាក្នុងតំបន់ ដែលមានសក្តានុពលធនធានធម្មជាតិពាក់ព័ន្ធដទៃៗទៀត ក្នុងរយៈពេលមួយឆ្នាំកន្លងមកនេះ។
អញ្ជើញតំណាងឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម សេន សុវណ្ណ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ លើកឡើងថា ការរៀបចំសន្និបាតនេះ មិនត្រឹមតែជាឱកាសមួយសម្រាប់ការចូលរួមពិនិត្យ ពិភាក្សា និងវាយតម្លៃលើលទ្ធផលការងារសម្រេចបាន ក្នុងឆ្នាំកន្លងមកប៉ុណ្ណោះទេ ប៉ុន្តែក៏ជាឱកាសដែលឤចចែករំលែកទស្សនៈ បទពិសោធន៍ បញ្ហាប្រឈមនានា និងកាលានុវត្តភាពថ្មីៗ ដើម្បីរិះរកវិធានការដោះស្រាយ និងកំណត់បណ្តាសកម្មភាពជាឤទិភាព ឈានឆ្ពោះទៅរកការអភិវឌ្ឍវិស័យកសិកម្មឱ្យកាត់តែមានការរីកចម្រើនឡើងថែមទៀត ស្របតាមគោលនយោបាយកែទម្រង់ស៊ីជម្រៅ របស់រាជរដ្ឋាភិបាល។
ឯកឧត្តម រដ្ឋលេខាធិការ បន្ថែមថា ស្ថិតក្នុងបរិបទនេះ គោលដៅអភិវឌ្ឍន៍វិស័យកសិកម្ម គឺត្រូវជំរុញកំណើនកសិកម្ម និងបង្កើនការនាំចេញផលិតផលកសិកម្ម ប្រកបដោយគុណភាព និងសុវត្ថិភាព តាមរយៈការលើកកម្ពស់ផលិតភាពកសិកម្ម បង្កើនតម្លៃបន្ថែម និងពង្រីកការប្រកួតប្រជែងទីផ្សារ ព្រមទាំងរក្សាបានតុល្យភាពនៃការប្រើប្រាស់ដីកសិកម្ម និងធានាការគ្រប់គ្រងធនធានធម្មជាតិ ប្រកបដោយនិរន្តរភាព។ ជាមួយគ្នានេះ រាជរដ្ឋាភិបាល មានគោលនយោបាយ និងចក្ខុវិស័យប្រាកដប្រជា ក្នុងការធ្វើទំនើបភាវូបនីយកម្មផលិតកម្មកសិកម្មឱ្យមានលក្ខណៈប្រកួតប្រជែង បរិយាប័ន្ន ធន់នឹងការប្រែប្រួលអាកាសធាតុ និងមាននិរន្តរភាព ដែលនាំដល់ការកើនឡើងប្រាក់ចំណូលគ្រួសារកសិករ វិបុលភាព និងសុខុមាលភាពរបស់ប្រជាពលរដ្ឋ។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
