រូបសំណាកមេទ័ពពីសម័យអង្គរចំនួន១២រូប ត្រូវបានដាក់តាំងជានិមិត្ដរូបនៅក្នុងសួនព្រះរាជដំណាក់ ក្រុងសៀមរាប ដើម្បីបង្ហាញដល់កូនខ្មែរជំនាន់ក្រោយឱ្យស្គាល់ពីមន្ដ្រីរាជការដែលខ្លាំងពូកែនាសម័យបុរាណ។រូបចម្លាក់ចំនួន១២រូបនេះ ធ្វើពីលោហស្ពាន់សុទ្ធ មានកំពស់ជាង២ម៉ែត្រ រចនាសម្លៀកបំពាក់ និងតុបតែងទៅតាមសម័យកាលនិមួយៗ។
លោកជំទាវ គង់ បញ្ញា រដ្ឋលេខាធិការក្រសួងព្រះបរមរាជវាំង មានប្រសាសន៍ថា រូបចម្លាក់មេទ័ពចំនួន១២រូបនេះ ដែលតំណាងឱ្យនគរទាំង១២ នៅសម័យបាពួន សម័យអង្គរ និងសម័យបាយ័ន ។
ការសាងសង់រូបដាក់តាំងក្នុងសួនព្រះរាជជំណាក់នេះ បន្ទាប់ពីក្រសួងព្រះបរមរាជវាំង ក៍ដូចជាជំនាញប្រវត្ដិសាស្ដ្រ នៅសាកលវិទ្យាល័យភូមិន្ទវិចិត្រសិល្បៈផ្នែកបុរាណវិទ្យា និងផ្នែកអក្សសាស្ដ្រ បានសិក្សាស្រាវជ្រាវនៅសិលាចារិកតាមប្រាសាទបុរាណ ដូចជានៅប្រាសាទបន្ទាយឆ្មា ប្រាសាអង្គរវត្ដ ប្រាសាទបាពួន ប្រាសាទបាយ័ន ទើបសម្រេចជ្រើសរើយកមេទ័ពខ្លាំងចំនួន១២រូប ក្នុងចំណោមមេទ័ពជាង៣០រូប ដែលពួកគាត់បានកើតនិងបំរើរាជការនៅសម័យនោះយ៉ាងអង់អាចខ្លាហាន ។លោជំទាវបានបន្ដថា ការរចនារូបចម្លាក់មេទ័ពពីសម័យមុន តម្រូវត្រូវតាមរូបរាង សម្លៀកបំពាក់ សព្វាវុធ ម៉ូដសក់ទៅតាមលំនាំសម័យកាលនៃមេទ័ពនោះ។ រូបសំណាកទាំង១២ ត្រូវបានសាងសង់ឡើងអំពីលោហ:ស្ពាន់ រចនាឡើងជាចម្លាក់មូល គឺមានលក្ខណ: និងទ្រង់ទ្រាយពេញលេញ និងមានទម្ងន់ពី២០០ ទៅ៣០០គ.ក្រ ទៅតាមរូបរាងជាលក្ខណៈខ្មែរបុរាណសុទ្ធសាធ។
ថ្វីត្បិតតែជាសមិទ្ធផលនៃស្នាដៃកូនខ្មែរសម័យថ្មី ប៉ុន្តែស្នាដៃដែលលេចឡើងនេះ ត្រូវបានរក្សា និងអនុលោមយោងទៅតាមឯកសារប្រវត្តិសាស្ត្រជានិច្ច ដោយមិនចាកឆ្ងាយពីប្រវត្តិសាស្ត្រនោះឡើយ។ លោកជំទាវ បានបញ្ជាក់បន្ថែមថា ការកសាងរូបសំណាកមេទ័ពទាំងនេះ ថ្វាយព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដែលជាស្នាដៃកូនខ្មែរបច្ចុប្បន្ន ដើម្បីទុកជូនកូនខ្មែរជំនាន់ក្រោយៗបានដឹង ស្គាល់នូវមេទ័ពខ្មែរទដែលខ្លាំងពូកែ ពួកគាត់បានធ្វើពលីជីវិត លះបង់កម្លាំងកាយចិត្ត ដើម្បីការពារជាតិមាតុភូមិ ការពារទឹកដី ការពារមហានគរខ្មែរ។
សូមជម្រាបថា ព្រះរាជដំណាក់ និងព្រះអង្គចេកព្រះអង្គចម ក្នុងខេត្តសៀមរាបនេះ ត្រូវបានក្រសួងព្រះបរមរាជវាំង រៀបចំជួសជុលកែលម្អឡើងវិញ នូវហេដ្ឋារចនាសម្ព័ន្ធ និងពង្រីងរបង ខ្លោងទ្វារ ដោយបានរចណាក្បូក្បាច់យ៉ាងស្រស់ស្អាត ចាប់តាំងពីដើមឆ្នាំ២០២០ និងរួចជាស្ថាពរនៅក្នុងខែតុលា ឆ្នាំ២០២២។ទីតាំងដ៏ពិសិដ្ឋមួយនេះ មានបរិស្ថានស្អាត និងសណ្តាប់ធ្នាប់របៀបរៀបរយល្អ ហើយជាកន្លែងដែលគេគោរពបូជាផងដែរ៕
អត្ថបទនិងវីដេអូ ៖ លោក ឈិត សាវី និង យូ វង្ស ជាស្រស់
