រដ្ឋបាលខេត្តសៀមរាប បានបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៣ ឆ្នាំ២០២២ គោលដៅទី៣ នៅស្រុកអង្គរធំ និងស្រុកបន្ទាយសី្រ នាព្រឹកថ្ងៃទី២០ ខែធ្នូ ឆ្នាំ២០២២នេះ ទីតាំងប្រារព្ធវេទិកានៅបរិវេណសាលាស្រុកអង្គរធំ ខេត្តសៀមរាប ក្រោមអធិបតីភាពឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប លោក លី សំរិទ្ធ អភិបាលរង នៃគណ:អភិបាលខេត្ត តំណាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណ:អភិបាលខេត្ត ឯកឧត្តម លោកជំទាវ សមាជិក សមាជិកាក្រុមប្រឹក្សាខេត្ត លោក លោកស្រី មេបញ្ជាការ មេបញ្ជការរង កងកំលាំងប្រដាប់អាវុធគ្រប់ ប្រធានមន្ទីរ-អង្គភាពពាក់ពន្ធ័ជុំវិញខេត្ត សិស្សានុសិស្ស ប្រជាពលរដ្ឋជាច្រើននាក់ផងដែរ។ អង្គវេទិកាគោលដៅទី៣ នេះ មានអាជ្ញាធរស្រុក ឃុំ ភូមិ និងបងប្អូនប្រជាពលរដ្ឋ អញ្ជើញចូលរួមសរុបចំនួន ៤៦១នាក់ ស្រី ១២១នាក់ ក្នុងនោះ៖ ស្រុកអង្គរធំ ១៩៧នាក់ ស្រី ៦២នាក់ និងស្រុកបន្ទាយស្រី ១៥៦នាក់ ស្រី ៤៥នាក់ វាគ្មិនមកពីថ្នាក់ដឹកនាំស្ថាប័ន មន្ទីរ -អង្គភាពជុំវិញខេត្តចំនួន ១០៨នាក់ ស្រី ១៤នាក់។
ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប មានប្រសាសន៍ថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត ធ្វើឡើង ក្នុងគោលបំណង ដើម្បីបានជួបបងប្អូនប្រជាពលរដ្ឋ ចង់ដឹងសុខទុក្ខ និងស្ថានភាពប្រចាំថ្ងៃនៅតាមមូលដ្ឋាន។ ជាមួយគ្នានេះដែរ ក៏ចង់ឲ្យបងប្អូនលើកឡើងនូវបញ្ហាទាំងឡាយ ដែលកើតមានជាសំណួរ សំណូមពរ ដែលជាក្តីកង្វល់ បញ្ហាប្រឈម ឬសំណូមពរអ្វីមួយ ដាក់ជូនថ្នាក់ដឹកនាំ សម្រាប់ធ្វើការដោះស្រាយ ដើម្បីអភិវឌ្ឍន៍មូលដ្ឋាន និងសេចក្តីសុខ សុវត្ថិភាពរបស់យើង។
ក្នុងនាមរដ្ឋបាលខេត្ត លោកលី សំរិទ្ធ មានប្រសាសន៍ថា អាជ្ញាធរខេត្ត ក៏ដូចជាអាជ្ញាធរមូលដ្ឋានគ្រប់លំដាប់ថ្នាក់បានយកចិត្តទុកដាក់បម្រើបងប្អូនប្រជាពលរដ្ឋ បានយ៉ាងច្រើន និងល្អប្រសើរជាទីបំផុត ក្នុងរយ:កាលកន្លងមកនេះ។ លោកអភិបាលរងខេត្ត បន្តថា នៅពេលនេះ អង្គវេទិកាទាំងមូល សូមលើកទឹកចិត្តឱ្យបងប្អូនប្រជាពលរដ្ឋ បញ្ចេញមតិយោបល់ និងបញ្ហាប្រឈមនានាដែលកើតមាននៅមូលដ្ឋាន ដើម្បីរួមគ្នាដោះស្រាយឲ្យបានល្អប្រសើរនិងទាន់ពេលវេលា ក្នុងការចូលរួមដោះស្រាយបញ្ហាសង្គមប្រកបដោយសុខសន្តិភាព និងមានការអភិវឌ្ឍ។
តាមរយ:កិច្ចពិភាក្សា ពិគ្រោះយោបល់យ៉ាងសកម្មផុលផុសពេញមួយព្រឹកនេះ ឯកឧត្តមអ៊ាន ឃុន ប្រធានក្រុមប្រឹក្សាខេត្ត មានប្រសាសន៍ថា អង្គវេទិកាទទួលបានលទ្ធផលដូចខាងក្រោម៖ អង្គវេទិកាទទួលបានសំណួរ និងកង្វល់ផ្ទាល់មាត់ពីបងប្អូនប្រជាពលរដ្ឋ ១១សំណួរ -សំណូមពរ ហើយវាគ្មិនបានបំភ្លឺទាំង ១១សំណួរ-សំណូមពរ ដោយឡែកសំណួរ-សំណូមពរជាលាយលក្ខ័អក្សរមិនទាន់បានឆ្លើយបំភ្លឺមានចំនួន ៣៣សំណួរ និងសំណូមពរ។ ឆ្លៀតឱកាសនោះដែរ ឯកឧត្តម តាងនាមក្រុមប្រឹក្សា និងគណ:អភិបាលខេត្ត បានថ្លែងអំណរគុណយ៉ាងជ្រាលជ្រៅចំពោះ វាគ្មិន តំណាងមន្ទីរ-អង្គភាពនានាក្នុងខេត្ត ដែលបានធ្វើការបកស្រាយ បំភ្លឺឆ្លើយតបទៅនឹង សំណួរ កង្វល់របស់បងប្អូនប្រជាពលរដ្ឋ។ ជាមួយគ្នានេះដែរ សូមជម្រាបជូនដល់ម្ចាស់ សំណួរ បងប្អូនប្រជាពលរដ្ឋជ្រាបថា អង្គវេទិកាសូមរក្សាសិទ្ធិរក្សាទុកសំណួរ និងកង្វល់ ក្នុងអង្គវេទិកា នាពេលនេះ ពុំទាន់អាចបកស្រាយបំភ្លឺបាន ក្រុមប្រឹក្សាខេត្ត និងយកសំណួរ និងកង្វល់ទាំងនេះ ទៅពិនិត្យ ពិភាក្សាក្នុងក្របខណ្ឌក្រុមប្រឹក្សាខេត្ត ហើយនឹងធ្វើការឆ្លើយតប និងជម្រាបជូនដំណឹងជាលាយលក្ខណ៏ អក្សរដល់ម្ចាស់សំណួរ បងប្អូនប្រជាពលរដ្ឋ តាមកាលវេលាសមគួរ ហើយធ្វើការផ្សព្វផ្សាយជូនតាមរយ:មេឃុំ ក្រុមប្រឹក្សាឃុំ តាមមូលដ្ឋានដែលបងប្អូនរស់នៅ។ ឯកឧត្តមមានជំនឿជឿជាក់ថា អង្គវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត ពិតជាជំហានរីកចម្រើនថ្មីបន្ថែមទៀត សម្រាប់រដ្ឋបាលខេត្តសៀមរាប ក្នុងការអនុវត្តមុខងាររបស់ខ្លួនស្របតាមច្បាប់លិខិតបទដ្ឋានគតិយុត្ត នៅថ្នាក់មូលដ្ឋានឱ្យកាន់តែរឹងមាំ និងទូលំទូលាយថែមទៀត។ ក្រោយពីបានស្តាប់ សំណូមពរ កង្វល់ របស់សហគមន៍មូលដ្ឋាន រដ្ឋបាលខេត្តនឹងនាំយកនូវ សំណូមពរ-កង្វល់ទាំងនេះ ដើម្បីធ្វើការពិនិត្យ ពិចារណា និងដោះស្រាយ ក្នុងការអភិវឌ្ឍសេដ្ឋកិច្ចសង្គម សំដៅលើកកម្ពស់គុណភាពជីវិតរបស់បងប្អូនប្រជាពលរដ្ឋក្នុងស្រុក នៃខេត្តសៀមរាបឈានទៅកាត់បន្ថយភាពក្រីក្រ។ ការអញ្ជើញចូលរួមគាំទ្រពីគ្រប់ផ្នែកពាក់ព័ន្ធ នាឱកាសនេះ អង្គវេទិកា ទាំងមូលមានសុទិដ្ឋិនិយមថា វប្បធម៌ នៃការចូលរួមកាន់តែមានវឌ្ឍនភាព៕
អត្ថបទ និងរូបភាព: លោកស៊ាន សុផាត កែសម្រួលដោយ លីវ សុខុន!!!
