ខេត្តសៀមរាប៖ គណៈកម្មាធិការប្រយុទ្ធប្រឆាំងអំពើជួញដូរមនុស្ស ហៅកាត់ថា គ.ខ.ប.ជ បានសហការជាមួយមន្ទីរធម្មការ និងសាសនាខេត្ត បានរៀបចំកិច្ចប្រជុំផ្សព្វផ្សាយស្តីពី អំពើជួញដូរមនុស្ស និងការកេងប្រវ័ញ្ចនានា ដល់ថ្នាក់ដឹកនាំអន្តរសាសនា (សាសនាព្រះពុទ្ធ សាសនាឥស្លាម សាសនគ្រីស និងសាសនានា) ដើម្បីបញ្ជ្រាបការយល់ដឹងអំពីបញ្ហានៃការជួញដូរមនុស្ស និងការកេងប្រវ័ញ្ចនានា ពិសេសអំពើរំលោភបំពានផ្លូវភេទលើកុមារ ដល់គ្រប់និកាយសាសនា ដើម្បីឱ្យមានការចូលរួមទប់ស្កាត់ សហការផ្តល់ពត៌មានពាក់ព័ន្ធនឹងបទល្មើសនានា ដែលបានកើតមាននៅក្នុងទីកន្លែងនៃសាសនានីមួយៗ ព្រមទាំងធ្វើការផ្សព្វផ្សាយបន្តទៅដល់សាសនិកក្រោមឱវាទ។ កិច្ចប្រជុំនេះប្រព្រឹត្តទៅក្រោមអធិបតីភាព លោកស្រី យូ សុភា អភិបាលរងខេត្ត ជាអនុប្រធានអចិន្ត្រៃយ៍ គ.ខ.ប.ជ និងជាតំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្ត និងជាប្រធាន គ.ខ.ប.ជ ព្រមទាំងមានការនិមន្តចូលរួមពី ព្រះមេគណខេត្ត មន្រ្តីទាំងពីរគណៈ លោកប្រធានមន្ទីរធម្មការ និងសាសនាខេត្ត តំណាងមន្ទីរការងារ និងបណ្តុះបណ្តាលវិជ្ជាជីវៈខេត្ត មន្ទីរសង្គមកិច្ចអតីតយុទ្ធជន និងយុវនីតិសម្បទាខេត្ត ស្នងការដ្ឋាននគរបាលខេត្ត មន្ទីរអប់រំយុវជន និងកីឡាខេត្ត មន្ទីរកិច្ចការនារីខេត្ត ព្រមទាំងថ្នាក់ដឹកនាំសាសនាឥស្លាម សាសនាគ្រីស និងសាសនានានា ក្នុងខេត្តសរុបចំនួន ៥២អង្គ/នាក់ នៅបន្ទប់ប្រជុំមន្ទីរធម្មការ និងសាសនាខេត្ត។
មានប្រសាសន៍នៅក្នុងកិច្ចប្រជុំផ្សព្វផ្សាយ លោកស្រីអភិបាលរងខេត្ត បានលើកឡើងថា ការរួបរួមសាមគ្គី ឯកភាព និងសុខដុមនីយកម្ម នៃគ្រប់ជំនឿសាសនា ក្នុងទស្សនវិស័យរួមគ្នាតែមួយ ក្នុងការលើកកម្ពស់ឯករាជ្យ អាព្យាក្រឹត្យភាព បូរណភាពទឹកដី ដើម្បីសន្តិភាព និងការអភិវឌ្ឍគ្រប់វិស័យ ដែលជាបំណងប្រាថ្នារបស់ប្រជាជនកម្ពុជានេះហើយ ទើបយើងបានពុះពារជម្នះគ្រប់ឧបសគ្គកន្លងមក រហូតប្រទេសជាតិយើងបានរួចផុតពីគ្រោះមហន្តរាយគ្រប់រូបភាពរហូតដល់សព្វថ្ងៃនេះ។ លោកស្រីបានបន្តទៀតថា ព្រះរាជាណាចក្រកម្ពុជា តែងតែប្រកាន់ភ្ជាប់នូវស្មារតី សន្តោប្រណី សាមគ្គីធម៌ បើកទូលាយ យកចិត្តទុកដាក់ដល់អាយុជីវិត និងសេចក្តីថ្លៃថ្នូរដល់មនុស្សផងគ្នា។ តួរយ៉ាងគ្រប់សាសនាទាំងអស់ តែងតែនាំមកជាប្រយោជន៍ដល់ការកសាងនូវសន្តិភាពផ្លូវកាយ ផ្លូវចិត្ត និងក្នុងសង្គម ព្រមទាំងពង្រឹងស្មារតីមនុស្សគ្រប់រូប កុំឱ្យទន់ជ្រាយ ផ្តេកផ្តួល ចំពោះបញ្ហា និងត្រូវរឹងប៉ឹងរួមគ្នាតស៊ូ ជម្នះឧបសគ្គ ដោយមិនចុះចាញ់ ការញុះញង់បំពុលសង្គមពីក្រុមជនអគតិឱ្យបែកបាក់គ្នា និងឈានទៅដល់គ្រោះថ្នាក់ដែលមិនអាចគ្រប់គ្រងបាននោះឡើយ។ មួយវិញទៀត ថ្នាក់ដឹកនាំសាសនានីមួយៗ តែងតែផ្សារភ្ជាប់នឹងការអប់រំផ្លូវចិត្ត ដល់សាសនិកក្រោមឱវាទគ្រប់ជំនឿ និងនិកាយសាសនា ឱ្យចេះគោរព ស្រឡាញ់ សន្តោស ឱ្យតម្លៃគ្នា និងជួយគ្នាទៅវិញទៅមកដោយឥតរើសអើង និងអាចរស់នៅជាមួយគ្នាដោយសុខសាសន្ត នៅតាមគ្រួសារក្នុងសហគមន៍យ៉ាងល្អប្រសើរ។ លោកស្រីក៏បានធ្វើការកោតសរសើរ និងវាយតម្លៃខ្ពស់ប្រកបដោយមោទនភាពសុខដុមរមនា នៃគ្រប់ជំនឿសាសនានៅកម្ពុជា ដែលតែងឯកភាព សហការគាំទ្រគ្នាទៅវិញទៅមកដោយភាពទន់ភ្លន់។
បន្ថែមពីនោះ លោកស្រីអភិបាលរងខេត្ត ក៏បានធ្វើការអំពាវនាវដល់គ្រប់សាសនាទាំងអស់នៅក្នុងខេត្តសៀមរាប ត្រៀមចូលរួមរៀបចំទិវាជាតិអន្តរសាសនា ដើម្បីប្រយុទ្ធប្រឆាំងអំពើជួញដូរមនុស្ស និងចូលរួមទាំងអស់គ្នាក្នុងការទប់ស្កាត់ និងជួយផ្សព្វផ្សាយបន្តទៅដល់សាសនិកក្រោមឱវាទរៀងៗខ្លួន អំពីបញ្ហានៃអំពើជួញដូរមនុស្ស និងអំពើកេងប្រវ័ញ្ចនានា សំដៅចូលរួមជាមួយរាជរដ្ឋាភិបាលក្នុងការបង្ការទប់ស្កាត់អំពើជួញដូរមនុស្សគ្រប់រូបភាពនៅក្នុងប្រទេសកម្ពុជា ពិសេសនៅក្នុងខេត្តសៀមរាបរបស់យើង។ លើសពីនោះទៅទៀតលោកស្រី បានធ្វើការផ្តាំផ្ញើដល់ថ្នាក់ដឹកនាំសាសនាទាំងអស់ថា សូមកុំយកសាសនា ឬទីកន្លែងសាសនាដើម្បីធ្វើជាអាជីវកម្ម សម្រាប់ធ្វើការកេងប្រវ័ញ្ច ឬសម្រាប់ធ្វើការរំលោភបំពាននានា មួយវិញទៀតអ្នកគ្រប់គ្រងនៅតាមបណ្តាសាសនានីមួយៗត្រូវធ្វើការត្រួតពិនិត្យ និងរៀបចំឱ្យបានត្រឹមត្រូវទៅតាមច្បាប់ របស់សាសនា និងច្បាប់នៃព្រះរាជណាចក្រកម្ពុជា ជៀសវាងមានជនខិលខួចឆ្លៀតឱកាសយកទីតាំងសាសនា ដើម្បីប្រព្រឹត្តបទល្មើស។
អត្ថបទ និងរូបភាព៖ លោក លីវ សាន្ត
