អ្នកទេសចរណ៍ដែលមកកំសាន្តនៅខេត្តសៀមរាប លើកឡើងថា តាមការសង្កេតឃើញនៅតាមដងផ្លូវ និងតាមសណ្ឋាគារមួយចំនួន មានការរៀបចំតុបតែងភ្លើង ចំរុះពណ៌គ្រប់ប្រភេទ សម្រាប់អបអរឆ្លងឆ្នាំសកលឆ្នាំ២០២២ និងឆ្លងចូលឆ្នាំ២០២៣នាពេលខាងមុខនេះ។ ជាមួយការរៀបចំលំអរក្នុងក្រុងសៀមរាបនេះ បង្ហាញថា តំបន់ទេសចរណ៍អង្គរ នឹងមានភ្ញៀវទេសចរមកកំសាន្ដច្រើនសន្ធឹកសន្ធាប់ឡើងវិញ ខណៈដែលជំងឺកូវីដ-១៩ បានធូរស្រាល។
ពួកគាត់ក៏អំពាវដល់ប្រជាលរដ្ឋនៅតាមរាជធានីខេត្ដ មកចូលរួមឆ្លងឆ្នាំសកល ក៍ដូចជាទៅស្សនានៅសៀមរាបអង្គរ ដែលជាតំបន់បេតិកភណ្ឌពិភពលោក ឱ្យបាមច្រើនកុះករ ជាមួយនឹងការចូលរួមថែរក្សាបរិស្ថាន អនាម័យ សណ្ដាប់ធ្នាប់ឱ្យបានល្អផងដែរ ដើម្បីឱ្យសោភ័ណ្ឌភាពទីក្រុងអង្គរ ឲ្យកាន់តែមានភាពទាក់ទាញ។
បើតាមសេចក្ដីជូនដំណឹង សហភាពសហព័ន្ធយុវជនកម្ពុជា ខេត្ដសៀមរាប បានបង្ហាញថា ដើម្បីអបអរសាទរពិធីបុណ្យឆ្លងឆ្នាំ និងចូលឆ្នាំសកល២០២៣ ខាងមុខ សហភាពសហព័ន្ធយុវជនកម្ពុជាខេត្ដ បានសហការជាមួយរដ្ឋបាលខេត្តសៀមរាប និងមន្ទីរអង្គភាពពាក់ព័ន្ធនានា រៀបចំកម្មវិធីជិះទូកកំសាន្ត ដែលប្រព្រឹត្តិទៅរយៈពេល ០៨ថ្ងៃ ដោយគិតចាប់ពីថ្ងៃទី២៥ ខែធ្នូ ឆ្នាំ២០២២ ដល់ថ្ងៃទី០១ ខែមករា ឆ្នាំ២០២៣ នៅតាមបណ្តោយស្ទឹងសៀមរាប។ កន្លែងជិះទូកកំសាន្ដនេះ ចាប់ពីស្ពានថ្មមន្ទីរទេសចរណ៍ចាស់ដល់ស្ពានថ្មវត្តដំណាក់។ ជាមួយគ្នានោះក៏មានកម្មវិធីសប្បាយជាច្រើនរួមមាន ការជិះទូកកំសាន្តតាមដងស្ទឹងសៀមរាប, ការតាំងពិព័រណ៍, កម្មវិធីផ្សារទឹក, កម្មវិធីប្រគុំតន្រ្តីជាដើម៕
អត្ថបទ និងរូបភាព ៖ លោក បូ សាវី
កែសម្រួល៖ លោក អ៊ុន ណារាជ្យ
