នៅរសៀលថ្ងៃទី២១ ខែធ្នូ ឆ្នាំ២០២២ មន្ទីរសុខាភិបាលខេត្តសៀមរាប បានរៀបចំកិច្ចប្រជុំក្រុមការងារពិសេសដើម្បីលុបបំបាត់ជំងឺគ្រុនចាញ់ថ្នាក់ខេត្ត ប្រចាំត្រីមាសទី៤ ឆ្នាំ២០២២ ក្រោមវត្តមានលោក ពិន ប្រាកដ អភិបាលរងខេត្ត និងលោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្ត រួមនឹងវត្តមានសមាជិកសមាជិកាក្រុមការងារ ដើម្បីធ្វើបច្ចុប្បន្នភាពពីស្ថានភាពជំងឺគ្រុនចាញ់ សមិទ្ធិផល បញ្ហាប្រឈម និងទិសដៅអនុវត្តឈានទៅរកការលុប បំបាត់ជំងឺគ្រុនចាញ់ទាំងស្រុងនៅឆ្នាំ២០២៥ខាងមុខ និងការពង្រឹងតួនាទីក្រុមការងារឆ្លើយតបទៅនឹងជំងឺគ្រុនចាញ់ឲ្យទាន់សភាពការ។
លោកវេជ្ជបណ្ឌិត ក្រុស សារ៉ាត់ បានឲ្យដឹងថា ការធ្វើតេស្តស្រាវជ្រាវជំងឺគ្រុនចាញ់នៅតាមស្រុកប្រតិបត្តិ គឺមានការធ្លាក់ចុះបន្តិច ជាពិសេស គឺការធ្វើតេស្តដោយ HCs។ នៅឆ្នាំ២០២២នេះ ទាំងមណ្ឌលសុខភាព ទាំងអ្នកស្ម័គ្រចិត្តធ្វើការជាមួយជំងឺគ្រុនចាញ់ គឺយើងបានស្រាវជ្រាវរកអ្នកដែលមានគ្រុនចាញ់បានចំនួន ៦៤.៤៩៨នាក់។ ក្នុងនោះមន្ត្រីសុខភាពបានធ្វើតេស្តស្រាវជ្រាវចំនួន ៣៦.៨២៦នាក់ ចំណែកអ្នកស្ម័គ្រចិត្តតាមភូមិនោះ គឺពួកគាត់ធ្វើបានចំនួន ២៦.៧៧៧នាក់ដែរ ក្នុងចំណោមជាង ៦ម៉ឺននាក់នោះ គឺយើងរកឃើញវិជ្ជមាន ២៤ករណី ចំនួននេះមានច្រើនជាងឆ្នាំមុនៗកន្លងទៅ ព្រមទាំងមានប្រភេទ Pf ដែលជាប្រភេទធ្ងន់ធ្ងរ។
លោកវេជ្ជបណ្ឌិត បន្ថែមថា ពាក់ព័ន្ធនិងជំងឺគ្រុនចាញ់នេះ បើកើតមានទៅលើបុគ្គលណាម្នាក់ហើយ គឺមិនអនុញ្ញាតឲ្យមន្ទីរពេទ្យ ឫគ្លីនិកឯកជនណាព្យាបាលឡើយ និងមិនត្រូវទុក្ខអ្នកអ្នកជំងឺឲ្យនៅកន្លែងរបស់ខ្លួនទេ ត្រូវបញ្ជូនអ្នកជំងឺមកមន្ទីរពេទ្យរដ្ឋ ទើបមានថ្នាំងព្យាបាលចំពោះជំងឺគ្រុនចាញ់គ្រប់ប្រភេទបាន។
មានប្រសាសន៍ក្នុងឱកាសនោះដែរ លោក ពិន ប្រាកដ អភិបាលរងខេត្ត បានបង្ហាញថា យើងត្រូវចូលរួមទប់ស្កាត់ការពារបញ្ហាជំងឺគ្រុនចាញ់នេះទាំងអស់គ្នា ដើម្បីលុបបំបាត់នៅឆ្នាំ២០២៥ ទាំងអស់គ្នា ចំពោះជំងឺគ្រុនចាញ់នេះ មិនមែនមានតែនៅប្រទេសយើងទេ គ្រាន់តែថានៅតាមបណ្តាប្រទេសមួយចំនួន ក៏មានកើតជំងឺគ្រុនចាញ់នេះដែរ ដោយឡែកសម្រាប់ក្រុមការងាររបស់យើងដែលបានធ្វើសកម្មភាពចុះផ្សព្វផ្សាយ ក៏ដូចជាការចែកមុង នៅតាមបណ្តាមណ្ឌលសុខភាព ឬក៏តាមបណ្តាឃុំស្រុកនានា ក្នុងខេត្តសៀមរាប គឺយើងចែកមុងបានចំនួនរហូតដល់ទៅ ៦៩មុង ជាពិសេសអាជ្ញាធរភូមិឃុំ និងស្រុកប្រតិបត្តិមួយចំនួនក្នុងខេត្តយើង ធ្វើយ៉ាងណាចូលរួមផ្សព្វផ្សាយអប់រំពាក់ព័ន្ធជំងឺគ្រុនចាញ់ដល់បងប្អូនប្រជាពលរដ្ឋ ឲ្យបានផុសផុលជាមួយការរីករាលដាលនៃជម្ងឺគ្រុនចាញ់នេះ៕
អត្ថបទ និងរូបភាព ៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
