នៅថ្ងៃទី២២ ខែធ្នូ ឆ្នាំ២០២២ គណ:កម្មការបច្ចេកទេសនៃ សហព័ន្ធខ្មែរកីឡាទោចក្រយាន សហការជាមួយរដ្ឋបាលខេត្តសៀមរាប បើកកិច្ចប្រជុំពិភាក្សា ស្តីពីត្រៀមរៀបចំការប្រកួតកីឡាទោចក្រយានជ្រើសរើសជើងឯកថ្នាក់ជាតិឆ្នាំ២០២២ នៅសាលប្រជុំសាលាខេត្ត ក្រោមអធិបតីភាពឯកឧត្តម នូ ចំរើន អគ្គលេខាធិការ សហព័ន្ធខ្មែរកីឡាទោចក្រយាន លោក អុឹង គឹមលាង អភិបាលរងខេត្ត តំណាងឯកឧត្តម ទៀ សីហា អភិបាល នៃគណ:អភិបាលខេត្តសៀមរាប និងវត្តមានចូលរួមពីប្រធានអនុប្រធានមន្ទីរអង្គភាព សមត្ថកិច្ចអាជ្ញាធរពាក់ព័ន្ធ ជាច្រើនរូបផងដែរ។កិច្ចប្រជុំនេះធ្វើឡើងក្នុងគោលបំណងពិនិត្យ និងពិភាក្សាសហការសម្របសម្រួលលការងាររៀបចំលំអិតទៅលើគោលដៅប្រកួត ស្ថានភាពផ្លូវ ដែលបានកំណត់សម្រាប់ការប្រកួត បញ្ហាសន្តិសុខ សុវត្ថិភាព របៀបរៀបរយ និងការសង្គ្រោះបឋម និងបន្ទាន់ករណីគ្រោះថ្នាក់ជាយថាហេតុដល់កីឡាករ កីឡាការីនី។ល។
លោក នូ ចំរើន លើកឡើងថា៖ឆ្នាំ២០២២នេះ គឺជាឆ្នាំដ៏សំខាន់មួយ ដែលសហព័ន្ធខ្មែរកីឡាទោចក្រយានចាប់ផ្តើមពង្រឹងគុណភាពបច្ចេកទេស និងមន្ត្រីគណ:កម្មការតាមទម្រង់ស្តង់ដារអន្តរជាតិ ដើម្បីសម្រួចគោលដៅឆ្ពោះទៅទទួលធ្វើម្ចាស់ផ្ទះស៊ីហ្គេម លើកទី៣២ ឆ្នាំ២០២៣ ហើយការប្រកួតឆ្នាំនេះគឺជាការអនុវត្តការងារបច្ចេកទេស វាស់ស្ទង់សមត្ថភាពកីឡាករ កីឡាការីនី ដើម្បីត្រៀមលក្ខណ:ឆ្ពោះទៅការប្រកួតកីឡាស៊ីហ្គេមលើកទី៣២ ឆ្នាំ២០២៣។
អគ្គលេខាធិការរូបនេះអះអាងថា ការប្រកួតថ្នាក់ជាតិនេះមានប្រតិភូ គ្រូបង្វឹក កីឡាករ កីឡាការិនី សរុបចំនួន២៨៧នាក់ មកពី១៥ក្រុម នៃរាជធានី-ខេត្ត ចំនួន១៤ និងក្រសួងការពារជាតិផងដែរ និងគណ:កម្មការបច្ចេកទេស ៣ក្រុមចំនួន ៦០នាក់។ ឆ្នាំនេះព្រឹត្តិការណ៍ នៃការប្រកួតបានកំណត់វិញ្ញាសាប្រណាំងកង់គួក និងកង់ភ្នំបុរស និងកង់ភ្នំនារី ក្នុងនោះ ប្រណាំងកង់កួកបុរសអាយុក្រោម ១៨ឆ្នាំ កង់កួកបុរសអាយុ ១៨ឆ្នាំឡើង និងកង់គួកបុរសអាយុ ៤០ឆ្នាំឡើង ស្ថិតនៅលើចម្ងាយផ្លូវ១៦០គ.មដូចៗគ្នា ដែលពួកគាត់សុទ្ធតែអ្នកស្ម័គ្រចិត្តធ្លាប់មានបទពិសោធន៍ខ្ពស់ ដែលធ្លាប់ចូលរួមជួយរៀបចំព្រឹត្តិការណ៍ប្រណាំងកង់ពិភពលោក ដែលកម្ពុជាធ្វើជាម្ចាស់ផ្ទះ កាលពីដើមឆ្នាំ២០២០ រួចមកហើយ។លោកថា គោលដៅនៃការរៀបចំព្រឹត្តិការណ៍ប្រកួតជើងឯកថ្នាក់ជាតិឆ្នាំ២០២០នេះ មានចំនួន២ គឺទី១ -អនុវត្តន៍តាមផែនការយុទ្ធសាស្រ្តរបស់សហព័ន្ធ មានការឯកភាពពីឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាទោចក្រយាន ដែលបានដាក់ចេញ គឺត្រូវពង្រឹងសមត្ថភាពគណ:កម្មការបច្ចេកទេស និងគណ:កម្មការៀបចំ ក្នុងដំណើរឈានទៅទទួលរៀបចំធ្វើជាម្ចាស់ផ្ទះ ការប្រកួតកីឡាស៊ីហ្គេម លើកទី៣២ ឆ្នាំ២០២៣ ក៏ដូចជាការប្រកួតកីឡាទោចក្រយានលើឆាកអន្តរជាតិផ្សេងៗទៀត នាពេលខាងមុខ។ លោក អុឹង គឹមលាង អភិបាលរងខេត្ត បានចាត់ទុកព្រឹត្តិការណ៍កីឡាប្រណាំងកង់នេះថាពិតជាមានសារសំខាន់យ៉ាងពិសេសមួយរួមចំណែកជយលើកស្ទួយវិស័យទេសចរណ៍នៅកម្ពុជា ឱ្យកាន់តែមានសន្ទុះស្ទុះឡើងជាបន្តបន្ទាប់ និងក៏ជា ដំណើរអភិវឌ្ឍវិស័យកីឡា ទោចក្រយានកម្ពុជា ឆ្ពោះទៅគោលដៅនៃការទទួល ធ្វើជាម្ចាស់ផ្ទះ កីឡាស៊ីហ្គេមលើកទី ៣២ ឆ្នាំ ២០២៣ ឲ្យទទួលបានជោគជ័យ ជាប្រវត្តិសាស្ត្រ។ លោកបានសំណូមពរដល់ក្រុមការងារគណ:កម្មការសហព័ន្ឋកីឡាប្រណាំងទោចក្រយាន សហការឱ្យបានស្អិតរមួតជាមួយសមត្ថកិច្ច អាជ្ញាធរដែនដី និងអង្គភាពស្ថាប័ន មន្ទីរពាក់ព័ន្ឋគ្រប់ជាន់ថ្នាក់ពិនិត្យមើលស្ថានភាពភូមិសាស្ត្រនៃបណ្តាផ្លូវគោលដៅ ដែលបានកំណត់រួចហើយ ដូចជាចំណុចតំបន់ផ្លូវឡើងភ្នំ សំដៅរក្សាបាននូវសន្តិសុខ សុវត្ថិភាពដល់កីឡាករ កីឡាការិនី និងភ្ញៀវ ដែលចូលរួមប្រកួត និងចូលរួមទស្សនា៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
