អ្នកពាក់ព័ន្ធដែលធ្វើការងារលើផ្នែកកិច្ចការពារកុមារថ្នាក់ជាតិ បានសហការជាមួយអង្គការសង្គមស៊ីវិល រៀបចំកិច្ចប្រជុំ ដើម្បីបង្ហាញពីការយកចិត្តទុកដាក់រួមគ្នា សំដៅធ្វើឲ្យកាន់តែប្រសើរឡើង នៅការលើកកម្ពស់កិច្ចការពារកុមារ និងឧត្តមប្រយោជន៍របស់កុមារគ្រប់រូប។កិច្ចប្រជុំនេះ ធ្វើឡើងនៅខេត្ដសៀមរាប មានរយ:ពេល ២ថ្ងៃ ចាប់ពីថ្ងៃទី២២ ដល់ថ្ងៃទី២៣ ខែធ្នូ ឆ្នាំ២០២២នេះ។
ឯកឧត្ដម គីម សុវណ្ណឌី អគ្គលេខាធិការ នៃអគ្គលេខាធិការដ្ឋាន ក្រុមប្រឹក្សាជាតិកម្ពុជាដើម្បីកុមារ “ក.ជ.ក” មានប្រសាសន៍ថា កិច្ចប្រជុំនេះមានគោលបំណងពិនិត្យ និងផ្តល់ការឯកភាពលើឧបករណ៍ពិនិត្យតាមដាន និងវាយតម្លៃ លើកកម្ពស់ការចូលរួមរបស់ក្រសួង ស្ថាប័ន ក្នុងការប្រើប្រាស់ឧបករណ៍ពិនិត្យតាមដាន និងវាយតម្លៃសម្រាប់អនុវត្តអនុសញ្ញា ស្តីពីសិទ្ធិកុមារឱ្យមានប្រសិទ្ធភាព។ លើកកម្ពស់ការប្រតិបត្តិការពិនិត្យតាមដាន និងវាយតម្លៃសម្រាប់ការអនុវត្តអនុសញ្ញា ស្តីពីសិទ្ធិកុមារ ស្របតាមអនុសាសន៍អង្គការសហប្រជាជាតិ។ ឯកឧត្ដម បានបន្ដថា ប្រទេសកម្ពុជាបានផ្តល់សច្ចាប័នលើអនុសញ្ញា ស្តីពីសិទ្ធិកុមារ និងពិធីសារបន្ថែម នៃអនុសញ្ញា ស្តីពីសិទ្ធិកុមារមួយចំនួនទៀត រួមមាន ពិធីសារស្តីពីការចូលរួមរបស់កុមារ នៅក្នុងជម្លោះប្រដាប់អាវុធ និងពិធីសារស្តីពីការជួញដូរកុមារ ការធ្វើពេស្យាកម្មកុមារ និងរូបភាពអាសអាភាសកុមារ នៅឆ្នាំ២០០២។ជាមួយគ្នានោះ អនុសញ្ញាស្តីពីការកម្រិតអាយុអប្បបរមាសម្រាប់ការចូលធ្វើការ នៅឆ្នាំ១៩៩៩។ អនុសញ្ញា ស្តីពីការហាមប្រាម និងសកម្មភាពបន្ទាន់សម្រាប់ការលុបបំបាត់ទម្រង់ធ្ងន់ធ្ងរ នៃពលកម្មកុមារនៅឆ្នាំ២០០៥ និងអនុសញ្ញាក្រុងឡាអេ ស្តីពីការការពារកុមារ និងសហប្រតិបត្តិការទាក់ទងនឹងស្មុំកូនអន្តរប្រទេសនៅឆ្នាំ២០០៧។ ជាមួយគ្នានោះ កម្ពុជាក៏បានចុះហត្ថលេខាលើសេចក្តីថ្លែងការណ៍ WePROTEC នៅទីក្រុងអាប៊ុយដាប៊ី ឆ្នាំ២០១៥ ពាក់ព័ន្ធនឹងសកម្មភាពទប់ស្កាត់ការរំលោភបំពាន និងកេងប្រវ័ញ្ចលើកុមារតាមប្រព័ន្ធអនឡាញ និងបានចូលជាសមាជិកនៃប្រទេសភាពជាដៃគូសកល ដើម្បីលុបបំបាត់អំពើហិង្សាលើកុមារ កាលពីឆ្នាំ២០១៩ផងដែរ។ ឯកឧត្ដម បានបញ្ជាក់ថា ក្នុងនាមជាប្រទេសហត្ថលេខី រាជរដ្ឋាភិបាលកម្ពុជា បានដាក់ចេញនូវយុទ្ធសាស្រ្តចតុកោណ ផែនការយុទ្ធសាស្រ្តអភិវឌ្ឍន៍ជាតិ គោលនយោបាយ លិខិតបទដ្ឋានគតិយុត្ត ផែនការសកម្មភាពជាតិពាក់ព័ន្ធនឹងកុមារ និងផែនការអភិវឌ្ឍតាមវិស័យរយ:ពេលវែង និងមធ្យមផ្សេងៗទៀតទាក់ទងទៅនឹងការលើកកម្ពស់ និងការការពារសិទ្ធិកុមារ និងធានាសម្រេចបានតាមគោលដៅអភិវឌ្ឍន៍ប្រកបដោយចីរភាពកម្ពុជាឆ្នាំ២០១៦ -២០៣០ ហើយក៏មានការបង្កើតយន្តការការពារកុមារ ដែលមានលក្ខណ: ប្រទាក់ក្រឡាជាពហុវិស័យនៅថ្នាក់ជាតិ និងថ្នាក់ក្រោមជាតិ ដើម្បីបង្ការទប់ស្កាត់ និងឆ្លើយតបគ្រោះមហន្តរាយភាពក្រីក្រ អំពើហិង្សាក្នុងគ្រួសារ ការធ្វើចំណាកស្រុក ការទុកកូនចោល និងការជាប់ពន្ធនាគាររបស់ឪពុកម្តាយ ជាហេតុធ្វើឱ្យកុមារទទួលរងនូវបញ្ហាប្រឈមនានា រួមមាន កុមារបែកចេញពីគ្រួសារ ការជួញដូរ អំពើហិង្សា ការគំរាមកំហែង ការរំលោភបំពានទាំងផ្លូវកាយ ផ្លូវចិត្ត និងផ្លូវភេទ រួមទាំងការកេងប្រវ័ញ្ចគ្រប់ទម្រង់។
សូមរំលឹកថា ព្រះរាជាណាចក្រកម្ពុជា បានផ្តល់សច្ចាប័នលើអនុសញ្ញាស្តីពីសិទ្ធិកុមារនៅថ្ងៃទី១៥ ខែតុលា ឆ្នាំ១៩៩២។ បន្ទាប់មកនៅឆ្នាំ១៩៩៥ រាជរដ្ឋាភិបាលកម្ពុជាបានបង្កើតក្រុមប្រឹក្សាជាតិកម្ពុជាដើម្បីកុមារ (ក.ជ.ក) ជាយន្តការសម្របសម្រួល ពិនិត្យតាមដាន និងវាយតម្លៃលើការអនុវត្តអនុសញ្ញាស្តីពីសិទ្ធិកុមារ និងពិធីសារបន្ថែម ជាពិសេស ការអនុវត្តអនុសាសន៍របស់គណ:កម្មាធិការសិទ្ធិកុមារ នៃអង្គការសហប្រជាជាតិ។ កម្ពុជាមានកាតព្វកិច្ចធ្វើរបាយការណ៍លើកដំបូងក្នុងរយ:ពេល ២ឆ្នាំបន្ទាប់ពីបានផ្តល់សច្ចាប័ន និងធ្វើរបាយការណ៍ទៀងទាត់ តាមកាលកំណត់រៀងរាល់ ៥ឆ្នាំម្តង។ ក្រុមប្រឹក្សាជាតិកម្ពុជាដើម្បីកុមារ ត្រូវពង្រឹងប្រព័ន្ធពិនិត្យតាមដាន និងវាយតម្លៃ ជាពិសេស បង្កើតប្រពន្ធ័ទិន្នន័យកុមារឱ្យបានទូលំទូលាយ ហើយត្រូវបំពេញតួនាទីជាសេនាធិការជូនរាជរដ្ឋាភិបាល ដោយកំណត់ជាច្រកចេញចូលតែមួយ នៃការងារដែលផ្តោតលើវិស័យកុមារ និងត្រូវពង្រឹងការសម្របសម្រួលការអនុវត្តអនុសញ្ញាស្តីពីសិទ្ធិកុមារ និងអនុសាសន៍នៃសេចក្តីសង្កេតចុងក្រោយ ដោយពិនិត្យ និងបែងចែកអនុសាសន៍ទៅក្រសួង ស្ថាប័ន ព្រមទាំងជំរុញឱ្យក្រសួង ស្ថាប័ន ដាក់បញ្ចូលគ្រប់អនុសាសន៍ពាក់ព័ន្ធនឹងសមត្ថកិច្ចរបស់ខ្លួន ទៅក្នុងផែនការយុទ្ធសាស្រ្តរបស់ខ្លួន ដើម្បីធានាថាកុមារគ្រប់រូបទទួលបាននូវសុខុមាលភាព និងសុវត្ថិភាពស្មើៗគ្នា៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
