ក្រុមអ្នកលក់ដូរវត្ថអនុវស្សាវរីយ៍ សម្រាប់ភ្ញៀវទេសចរ នៅខេត្ដសៀមរាប បានសម្ដែងការរីករាយ និងសប្បាយចិត្ដ បន្ទាប់ពីទីផ្សារវត្ថុអនុស្សាវរីយ៍ សម្រាប់ភ្ញៀវទេសចរបានចាប់ផ្ដើមកំរើកទីផ្សារឡើងវិញជាបន្ដបន្ទាប់។
អ្នកលក់ដូរនៅក្នុងផ្សារផលិតផលកម្ពុជា បានឱ្យដឹងថា ក្នុងរយ:ពេល ៣ខែចុងក្រោយនេះ ការលក់វត្ថុអនុស្សាវរីយ៍ដែលជាផលិតផលកូនខ្មែរ មានទីផ្សារល្អ ពោលបានចាប់ផ្ដើមមានអ្នកទេសចរទិញច្រើន បើធៀបពីឆ្នាំមុនៗ ដែលបានរាតត្បាតដោយសារជំងឺកូវីដ-១៩។ពួកគាត់បន្ដថា ជារៀងរាល់ថ្ងៃនេះ មានអ្នកទេសចររាប់រយនាក់ទៅរកវត្ថុអនុស្សាវរីយ៍នៅក្នុងផ្សារផលិតផលកម្ពុជានោះ ប៉ុន្ដែភាគច្រើនជាអ្នកទេសចរអន្ដរជាតិ ខណ:ដែលអ្នកទេសចរជាតិមិនសូវស្គាល់ផ្សារនេះនឡើយទេ។ ពួកគាត់បន្ថែមថា ការដំណើរនៃការលក់វត្ថុអនុស្សាវរីយ៍នេះ បង្ហាញពីភ្ញៀវទេសចរ ចាប់ផ្ដើមកើនឡើងច្រើនគួរជាទីមោទក: នៅក្នុងខេត្ដសៀមរាប។ ជាមួយគ្នានោះ ពួកគាត់បានអំពាវដល់អ្នកទេសចរជាតិ ដែលទៅកំសាន្ដនៅខេត្ដសៀមរាប ចូលរួមគាំទ្រផលិតផលកូនខ្មែរ ដែលមានផលិតអនុស្សាវរីយ៍ជាច្រើន នៅក្នុងផ្សារផលិតផលកម្ពុជា។
លោក អ៊ុន សាវ៉ាន់ អ្នកគ្រប់គ្រងផ្សារផលិតផលកម្ពុជា បានឱ្យដឹងថា កន្លែងលក់វត្ថុអនុស្សាវរីយ៍នេះ បានចាប់ផ្ដើមបើកឡើងវិញ កាលពីដើមខែមករាឆ្នាំ២០២២នេះ ហើយវាបានដំណើរការដោយមានអ្នកទេសចរជាបន្ដបន្ទាប់រហូតដល់ពេលនេះ បន្ទាប់ពីបានបិទមួយរយ:ដោយសារការរាត្បាតសកលនៃជំងឺកូវីដ-១៩។ លោកបន្ថែមថា ភ្ញៀវទេសចរអន្ដរជាតិភាគច្រើន ពួកគាត់បានទៅស្វែងរកវត្ថុអនុស្សាវរីយ៍នៅពេលយប់ ដោយចាប់ផ្ដើមពីម៉ោង ៦ល្ងាចទៅ ហើយនៅក្នុងផ្សារនេះគឺជាផលិតផលវត្ថុអនុស្សាវរីយ៍ស្នាដៃកូនខ្មែរសុទ្ធសាត។លោកបានសម្ដែងការសប្បាយចិត្ដ ដោយមានលំហូរទេសចរអន្ដរជាតិនេះ ហើយនៅពេលខាងមុខឆាប់ៗនេះ លោកសង្ឃឹមថា វិស័យទេសចរបានរស់ឡើងវិញ។ លោកក៏បានអំពាវដល់ពលរដ្ឋខ្មែរ ចូលរួមលើកកំពស់ផលិតផលខ្មែរ ខណ:ដែលអ្នកទេសចរអន្ដរជាតិ ពួកគាត់ចាប់អារម្មណ៍ និងគាំទ្រខ្លាំងនូវសម្ភារ:ស្នាដៃកូនខ្មែរ ។
ផ្សារផលិតផលកម្ពុជា មានទីតាំងនៅជិតសាលារៀន១០មករា ស្ថិតនៅសង្កាត់ស្វាយដង្គុំ ក្រុងសៀមរាប ដែលមានលក់សម្ភារ:អនុស្សាវរីយ៍៩០ភាគរយ បន្ទាប់ពីប្ដូរទីតាំងចេញពីខាងស្ទឹងសៀមរាប។ ការបើកដំណើរការផ្សារនេះ មានគោលបំណងចង់ឱ្យប្រជាពលរដ្ឋទទួលបានប្រាក់ចំណូលពីការលក់ផលិតផលខ្មែរ ឱ្យអ្នកទេសចរ។ ជាមួយគ្នានេះ ក៏ជាកន្លែងមជ្ឍមណ្ឌលបង្រៀនអាជីវកម្មខ្នាតតូច ដែលអាចឱ្យប្រជាពលរដ្ឋខ្មែរក្លាយខ្លួនជាអាវជីកម្មខ្នាតធំ និងមានកម្មសិទ្ធិបញ្ញាត្រឹមត្រូវ មានគំនិតច្ឆៃប្រឌិតវត្ថុអនុស្សាវរីយ៍ ដែលមានការទទួលស្គាល់ស្នាដៃរបស់ខ្លួនលើពិភពកលោក។ លោក អ៊ុន សាវ៉ាន់ បានបញ្ជាក់ថា ផ្សារផលិតផលកម្ពុជា ប្រមូលផ្តុំស្នាដៃផលិតដោយដៃរបស់កូនខ្មែរ ដែលមានទេពកោសល្យ មកពីសិប្បកម្ម និងតាមសហគមន៍មួយចំនួន ក្នុងខេត្តសៀមរាប ហើយផលិតផលរបស់កម្ពុជា នាពេលបច្ចុប្បន្ន ដែលត្រូវបានផលិតដោយស្នាដៃកូនខ្មែរ ជំនាន់ក្រោយពោរពេញដោយទេពកោសល្យល្អប្រសើរ៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
