នៅថ្ងៃទី២១ ខែឆ្នូ ឆ្នាំ២០២២នេះ ឃុំពង្រលើ ក្នុងស្រុកជីក្រែង ខេត្តសៀមរាប បានប្រកាសដាក់ឲ្យដេញថ្លៃ គម្រោងជួសជុលផ្លូវដីក្រាលគ្រួសក្រហម ០៣ខ្សែប្រវែង១,៦៧៥ គ.ម ដោយមានការចូលរួមពីមន្ត្រីបច្ចេកទេសសាលាខេត្តសៀមរាប គណៈកម្មការលទ្ធកម្មឃុំ និងក្រុមហ៊ុនម៉ៅការចំនួន០៧។
លោក ខៀវ ប៊ុនឈឿន ប្រធានគណ:កម្មការលទ្ធកម្មឃុំពង្រលើ មានប្រសាសន៏ថាគណៈកម្មការលទ្ធកម្មនឹងពិនិត្យសុពលភាពនៃសំណើដេញថ្លៃ ពិនិត្យមើល ថាតើសំណើដេញថ្លៃទាំងនេះបានដាក់ដេញថ្លៃ ដោយអ្នកដេញថ្លៃដែលមាន សិទ្ធិក្នុងការចូលដេញថ្លៃដែរឬទេ ពិនិត្យមើល ថាតើសំណើដេញថ្លៃបានបំពេញត្រឹមត្រូវដែរឬទេ
និង ពិនិត្យមើល ថាតើសំណើដេញថ្លៃមានភ្ជាប់មកជាមួយនូវលិខិតធានាប្រាក់កក់ធានាការ ដេញថ្លៃ សេចក្តីប្រកាសស្តីពីក្រមសីលធម៌ ការមិនក្លែងបន្លំ និងការមិនប្រព្រឹត្តិអំពើពុករលួយ និង ប័ណ្ណពន្ធប៉ាតង់ដែលមានសុពលភាព ។សំណើដេញថ្លៃដែលឈ្នះ គឺជាសំណើដេញថ្លៃដែលមានសុពលភាព និងបានដាក់តម្លៃដេញថ្លៃទាប ជាងគេបំផុត។
ប្រធានគណ:កម្មការលទ្ធកម្មឃុំ ពង្រលើ បានឲ្យដឹងថា គម្រោងជួសជុលផ្លូវដីសក្រាលគ្រួសក្រហម ០៣ខ្សែប្រវែង១,៦៧៥ គ.ម ទទឹង៦ម៉ែត្រ គម្រាស់គ្រួសក្រហម ០.១៥ម៉ែត្រ សាងសង់លូមូលទោលកាត់មុខផ្លូវចំនួន០៤កន្លែង លូការពារផ្លូវ៤កង់ និងស្លាកសញ្ញាគម្រោងចំនួន១កន្លែង ដែលមានតម្លៃប៉ាន់ស្មានចំនួន ១៤៣.៤០២.៦៨១រៀល ដែលនៅពេលនេះមានក្រុមហ៊ុនចំនួន៧ បានចូលរួមដេញថ្លៃ រួមមាន ៖ ១. ក្រុមហ៊ុន អំ ឡូ , ២. ហ៊ូរ ឆូយ, ៣. AMRL ៤. រស់ ចំរើន ៥.GSB ៦.ម៉ូវ សៀកផៃ ៧.អ៊ីង លីសួរ ។
ក្រោយពីពិនិត្យ និង ពិភាក្សារួច គណៈកម្មការលទ្ធកម្មឃុំ បានរកឃើញថា ក្រុមហ៊ុន អំ ឡូ ទទួលបានតម្លៃទាបទី១ ក្នុងទឹកប្រាក់ចំនួន ១០៦,០២៧,៩០០ រៀល ក្រុមហ៊ុន GSB ទទួលបានតម្លៃទាបទី២ ក្នុងទឹកប្រាក់ចំនួន ១០៦,១២៥,០០០ រៀល ក្រុមហ៊ុន AM RL ទទួលបានតម្លៃទាបទី៣ ក្នុងទឹកប្រាក់ចំនួន ១១៣,២៣០,៤០០ រៀល ក្រុមហ៊ុន រស់ ចំរើន ទទួលបានតម្លៃទាបទី៤ ក្នុងទឹកប្រាក់ចំនួន ១១៦,៥៤០,០០០ រៀល ក្រុមហ៊ុន ម៉ូវ សៀកផៃ ទទួលបានតម្លៃទាបទី៥ ក្នុងទឹកប្រាក់ចំនួន ១១៨,៥៩០,៤០០ រៀល ចំណែកក្រុមហ៊ុនចំនួនពីរទៀតការដេញថ្លៃគ្មានសុពលភាព។
លោក ទុំ មិញ តំណាងក្រុមហ៊ុន អំ ឡូ ដែលទទួលបានតម្លៃទាបទី១នោះ បានធ្វើការប្ដេជ្ញាចិត្ត ដោយសន្យាឲ្យបានត្រឹមត្រូវតាមក្បួនច្បាប់បច្ចេកទេស ដូចមានចែងក្នុងកិច្ចសន្យាស្រាប់ ៕
អត្ថបទ និងរូបភាព៖ លោក ធន់ ពូថេ
