ថ្លែងក្នុងពិធីបើកការបោះជំរំយុវជនជាសាកលលើកទី៨ ក្រោមប្រធានបទ « ការអភិវឌ្ឍយុវជនក្នុងសង្គមឌីជីថល៖ តារារះនាទិសឧត្តរ » នាជើងភ្នំគូលែន ឃុំត្បែង ស្រុកបន្ទាយស្រី ខេត្តសៀមរាប កាលពីរាត្រីថ្ងៃទី២០ ខែធ្នូ ឆ្នាំ២០២២ ឯកឧត្តមបណ្ឌិត ស៊ាន បូរ៉ាត រដ្ឋលេខាធិការនៃក្រសួងអប់រំ យុវជន និងកីឡា បានលើកឡើងថា ការអភិវឌ្ឍយុវជន គឺជាគោលដៅអាទិភាពមួយរបស់រាជរដ្ឋាភិបាលកម្ពុជា ដូចបានកំណត់នៅក្នុងយុទ្ធសាស្រ្តចតុកោណដំណាក់កាលទី៤ ជាពិសេសបានសង្កត់ធ្ងន់អំពីភាពចាំបាច់ក្នុងការអភិវឌ្ឍធនធានសមត្ថភាពយុវជន ដើម្បីក្លាយជាសសរទ្រូងប្រទេសជាតិ តាមរយ:ការផ្តល់ការអប់រំប្រកបដោយគុណភាព សមធម៌ និងជំនាញ ដែលឆ្លើយតបទៅនឹងទីផ្សារការងារ ទាំងនៅក្នុងប្រទេស និងនៅក្នុងតំបន់។
ឯកឧត្តមបណ្ឌិត មានប្រសាសន៍បន្តថា ដើម្បីបង្ហាញពីការប្តេជ្ញាចិត្តក្នុងការអភិវឌ្ឍយុវជនកម្ពុជា ដោយរាជរដ្ឋាភិបាលកម្ពុជាបានដាក់ចេញនូវ «គោលនយោបាយជាតិ ស្តីពីការអភិវឌ្ឍយុវជនកម្ពុជា» ដែលមានចក្ខុវិស័យវែងឆ្ងាយ ក្នុងការប្រមូលផ្តុំកម្លាំងគ្រប់មជ្ឈដ្ឋាន សំដៅរួមចំណែកអភិវឌ្ឍយុវជនឱ្យកាន់តែមានលក្ខណ:សម្បត្តិវិជ្ជមាន និងផ្តល់ឱកាសដល់យុវជន ក្នុងការអភិវឌ្ឍជំនាញ ប្រកបដោយសក្តានុពលរបស់ខ្លួន ទាំងនៅក្នុងការទទួលបានការអប់រំលើមុខរបរការងារ ការចូលរួមធ្វើសេចក្តីសម្រេចចិត្ត និងការចូលរួមចំណែកអភិវឌ្ឍគ្រួសារ សហគមន៍ ប្រទេសជាតិ និងពិភពលោក។ ស្ថិតក្នុងបរិការណ៍នៃការវិវត្តខាងផ្នែកសេដ្ឋកិច្ចរបស់ប្រទេសកម្ពុជា និងពិភពលោកនាពេលបច្ចុប្បន្ន កម្ពុជាក៏កំពុងផ្តោតការបណ្ដុះបណ្ដាលយុវជន គ្រប់ជំនាញ ដើម្បីឈានទៅសម្រេចគោលដៅអភិវឌ្ឍប្រកបដោយចីរភាពនៅឆ្នាំ២០៣០។ កម្ពុជាមានតម្រូវការចាំបាច់ក្នុងការប្រើប្រាស់សក្តានុពលពេញលេញរបស់មនុស្សគ្រប់ជំនាន់ ជាពិសេសកម្លាំងយុវជន។ ក្នុងនោះទាមទារឱ្យយើងទាំងអស់គ្នាត្រូវតែសហការគ្នា ដើម្បីជំរុញទំនាក់ទំនង និងភាពជាដៃគូអន្តរជំនាន់ប្រកបដោយភាពសកម្ម និងដោយស្មើភាពគ្នា ព្រោះថាយុវជនម្នាក់ៗ គឺពិតជាតួអង្គដ៏សំខាន់។
ក្នុងឱកាសនោះដែរ លោក អុឹង គឹមលាង អភិបាលរងខេត្តសៀមរាប បានមានប្រសាសន៍ថា ការបោះជំរុំរបស់យុវជននាពេលនេះ បានបង្ហាញនូវសាមគ្គីភាពអន្តរជំនាន់ និងធ្វើឱ្យការប្រាស្រ័យទាក់ទង និងការយល់ពីគ្នាទៅវិញទៅមកកាន់តែប្រសើររវាងអ្នកជំនាន់មុន និងអ្នកជំនាន់ក្រោយ ជាពិសេសការដកពិសោធន៍ ការចែករំលែកចំណេះដឹងឲ្យគ្នាបានយ៉ាងល្អប្រសើរ។ លោកអភិបាលរងខេត្ត បន្តថា ការរក្សាគុណតម្លៃសង្គម ភាពបត់បែនសម្រាប់ការផ្លាស់ប្តូរថ្មីៗ ការធ្វើសេចក្តីសម្រេចចិត្តប្រកបដោយចីរភាពកាន់តែប្រសើរឡើងនៃសមភាពអន្តរជំនាន់។ ដូច្នេះការបោះជំរំយុវជនជាសាកលលើកទី៨ ក្រោមប្រធានបទ «ការអភិវឌ្ឍយុវជនក្នុងសង្គមឌីជីថល៖ តារារះនាទិសឧត្តរ» ដែលបានរៀបចំឡើងដោយគណ:កម្មការអន្តរក្រសួង ហើយមានក្រសួងអប់រំ យុវជន និងកីឡាជាអ្នកដឹកនាំ ធ្វើឡើងក្នុងគោលបំណងអភិវឌ្ឍសមត្ថភាព និងបណ្តុះបណ្តាលយុវជនលើជំនាញបច្ចេកវិទ្យាព័ត៌មាន និងឌីជីថល ដើម្បីឆ្លើយតបទៅនឹងយុទ្ធសាស្ត្រកំណែទម្រង់វិស័យអប់រំបែបឌីជីថលក្រោមក្របខណ្ឌនៃគោលនយោបាយរដ្ឋាភិបាលឌីជីថលកម្ពុជា (២០២២-២០៣៥)។
លោកអភិបាលរងខេត្ត មានប្រសាសន៍បន្ថែមថា ជាមួយនឹងយុទ្ធសាស្ត្រកំណែទម្រង់នេះដែរ យុវជននឹងទទួលបានការបណ្តុះបណ្តាលជំនាញ ការបង្កើតគំនិតថ្មី ឱកាសការងារល្អ និងអាជីពសមរម្យក្នុងយុគសម័យបដិវត្តឧស្សាហកម្ម៤.០ ។ ជាមួយគ្នានោះយុវជនក៏នឹងទទួលបាននូវទម្រភ្ជាប់ទំនាក់ទំនង ការបណ្តុះស្មារតីសហគ្រិនភាពបែបឌីជីថល ភាពជាអ្នកដឹកនាំក្នុងការចូលរួមលើកស្ទួយ និងផ្សព្វផ្សាយទេសចរណ៍ និងបំណិតជីវិតក្នុងយុគសម័យរីកចម្រើននៃបច្ចេកវិទ្យាព័ត៌មាន។ ដោយឡែកសម្រាប់ការបោះជំរំយុវជនជាសាកលលើកទី៨ នេះដែរ ក៏ជាបទពិសោធន៍ថ្មីមួយបន្ថែមទៀតដល់ប្អូនៗយុវជនរបស់យើង ជុំវិញការរស់នៅជាក្រុម ប្រៀបដូចជាគ្រួសារតែមួយ ស្របតាមប្រសាសន៍សម្តេចតេជោ កម្ពុជាក្រោមដំបូល” សន្តិភាព ” ពេញលេញ។
គួរឲ្យដឹងថា បើតាមរបាយការណ៍របស់អគ្គនាយកដ្ឋានយុវជន ការបោះជំរំយុវជនជាសាកលបានចាប់ផ្តើមតាំងពីឆ្នាំ២០១០ ក្រោមគំនិតផ្តួចផ្តើមរបស់សម្តេចតេជោ ហ៊ុន សែន នាយករដ្ឋមន្ត្រី។ ហើយក្នុងឆ្នាំ២០២១ ដើម្បីផ្តល់ឱកាសដល់យុវជននៅតាមរាជធានី ខេត្តបានជួបជុំ អគ្គនាយកដ្ឋានយុវជនបានធ្វើទំនើបកម្មលើកម្មវិធី និងទម្រង់នៃការបោះជំរំយុវជនជាសាកលលើកទី៧ តាមទម្រង់ឌីជីថល និងបច្ចេកវិទ្យាព័ត៌មានទាំងស្រុង។ ដោយឡែកសម្រាប់ការបោះជំរំយុវជនជាសាកលលើកទី៨ នៅឆ្នាំ២០២២នេះ គឺប្រព្រឹត្តទៅរយ:ពេល ៦ថ្ងៃ ចាប់ពីថ្ងៃទី១៩-២៤ ខែធ្នូ ឆ្នាំ២០២២ ដែលមានចំនួនយុវជនចូលរួមសរុប ១៨៣នាក់ មកពី ២៥រាជធានី ខេត្ត ក្នុងនោះយុវជនជាប្រតិភូចំនួន ១៥៣នាក់ និងយុវជនស្ម័គ្រចិត្ត ៣០នាក់ផងដែរ៕
អត្ថបទ និងរូបភាព: លោកអ៊ុន ណារាជ្យ និងលោកជា ស្រស់ កែសម្រួលដោយ លីវ សុខុន!!!
